Ani Esa akɛ Aná Hekɛnɔfɔɔ yɛ Mɔ Fɛɛ Mɔ Mli?

BENI Berlin Gbogbo lɛ kumɔ yɛ afi 1989 lɛ mli sɛɛ lɛ, ajie teemɔŋ saji babaoo ni akɛto gbidigbidi lɛ akpo. Ákɛ nɔkwɛmɔnɔ lɛ, Lydiaa ná ele akɛ beni Kwamaŋ nɔyeli lɛ yeɔ nɔ yɛ East Germany lɛ, Stasi loo Maŋ Shweshweeshwefeemɔ Nitsumɔhe lɛ ŋmala eteemɔŋ nifeemɔi ahe saji amɛshwie shi. Eyɛ mli akɛ Lydia naa kpɛ ehe beni ena ehe saji ni aŋmala ashwie shi lɛ moŋ, shi ehe jɔ̃ ehe waa beni ená ele mɔ ni kɛ saji lɛ yaha Stasi lɛ—ewu. Mɔ ko ni kulɛ ebaanyɛ ekɛ ehe afɔ̃ enɔ kwraa lɛ etsɔɔ esɛɛ gbɛ.

London adafitswaa wolo, ni ji The Times lɛ bɔ amaniɛ akɛ, Robert ni ji nuu onukpa ni ji owula lɛ ná “bulɛ, hiɛsɔɔ, kɛ hekɛnɔfɔɔ kwraa” yɛ datrɛfonyo ni kwɛɔ lɛ lɛ mli. Atsɔɔ mli akɛ datrɛfonyo lɛ yɛ “mlihilɛ kɛ musuŋtsɔlɛ su.” Kɛkɛ ni trukaa lɛ Robert gbo. Ani tsui hela loo kuumɔ hela ji nɔ ni gbe lɛ? Dabi. Nɔyeli hegbɛi lɛ mu sane naa akɛ datrɛfonyo lɛ tee Robert ŋɔɔ yɛ shia, ni egbu lɛ tsofa ko ni gbeɔ mɔ ní Robert kɛ eweku lɛ leee he nɔ ko. Etamɔ nɔ ni mɔ ko ni Robert kɛ ehe fɔ̃ enɔ kwraa lɛ gbe lɛ.

Afite hekɛnɔfɔɔ ni Lydia kɛ Robert fɛɛ yɔɔ yɛ mɛi amli lɛ kwraa, ni nibii ni jɛ mli kɛba lɛ ehiii kwraa. Yɛ shihilɛi krokomɛi amli lɛ, nibii ni jɛɔ mli kɛbaa lɛ mli waaa nakai. Shi kɛlɛ, ákɛ mɔ ko ni wɔyɔɔ hekɛnɔfɔɔ yɛ emli lɛ aaaha wɔnine anyɛ shi lɛ jeee nɔ ko ni efɔɔɔ kaa. Amaniɛbɔɔ ko ni Germany niiamlipɛimɔ gbɛjianɔtoo ko ni ale waa, ni ji Allensbacher Jahrbuch der Demoskopie 1998-2002 lɛ tsɔɔ akɛ, yɛ niiamlipɛimɔ ko ni afee lɛ mli lɛ, mɛi ni abi amɛ saji lɛ 100 mlijaa 86 tsɔɔ mli akɛ mɔ ko ni amɛyɔɔ hekɛnɔfɔɔ yɛ emli lɛ eha amɛnine enyɛ shi. Ekolɛ bo hu oná niiashikpamɔ ni tamɔ nakai nɔŋŋ. No hewɔ lɛ, esaaa akɛ efeɔ wɔ naakpɛɛ akɛ Switzerland adafitswaa wolo ni ji Neue Zürcher Zeitung lɛ bɔ amaniɛ yɛ afi 2002 mli akɛ, “hekɛnɔfɔɔ ni ayɔɔ yɛ wekukpaai ni yɔɔ mɛi ateŋ lɛ mli lɛ etee nɔ efite yɛ Anaigbɛ jarayeli maji lɛ amli yɛ afii babaoo mli.”

Enámɔ Heɔ Be, Shi Efitemɔ Waaa

Mɛni ji hekɛnɔfɔɔ? Taakɛ wiemɔ komekomei ashishitsɔɔmɔ wolo ko tsɔɔ mli lɛ, ákɛ okɛ ohe aaafɔ̃ mɛi krokomɛi anɔ lɛ tsɔɔ akɛ “obaahe oye akɛ amɛyeɔ jalɛ sane ni amɛyeɔ anɔkwa, ni ákɛ amɛjeŋ gbɛ amɛfeŋ nɔ ko ni baagba onaa.” Hekɛnɔfɔɔ námɔ heɔ be, shi ebaanyɛ efite yɛ hiŋmɛitswaaoo ko mli. Akɛni mɛi babaoo eyoo akɛ afite hekɛnɔfɔɔ ni amɛyɔɔ yɛ mɛi amli lɛ hewɔ lɛ, ani eyɛ naakpɛɛ akɛ mɛi sumɔɔɔ ni amɛnáa hekɛnɔfɔɔ yɛ mɛi krokomɛi amli? Taakɛ niiamlipɛimɔ ko ni afee ni akala yɛ Germany yɛ afi 2002 mli lɛ tsɔɔ lɛ, “mɛi ni shɛɛɛ 1 yɛ oblahii kɛ oblayei 3 ateŋ lɛ yɛ shishijee hekɛnɔfɔɔ yɛ mɛi krokomɛi amli.”

Ekolɛ wɔbaabi wɔhe akɛ: ‘Ani wɔbaanyɛ wɔkɛ wɔhe afɔ̃ mɔ ko nɔ diɛŋtsɛ? Ani ehi akɛ wɔkɛ wɔhe afɔ̃ mɔ ko nɔ yɛ be mli ni ebaanyɛ eba akɛ mɔ lɛ baaha wɔnine anyɛ shi?’

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 3]

Niiamlipɛimɔ ko ni afee lɛ tsɔɔ akɛ mɛi ni abi amɛ saji lɛ 100 mlijaa 86 tsɔɔ mli akɛ mɔ ko ni amɛyɔɔ hekɛnɔfɔɔ yɛ emli lɛ eha amɛnine enyɛ shi