Ani Okaiɔ?
Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:
• Mɛni nɔ adamɔ ahala December 25 akɛ gbi ni akɛyeɔ Yesu fɔmɔ he gbi jurɔ lɛ?
Nyɔŋmɔ Wiemɔ lɛ etsɔɔɔ gbi nɔ ni afɔ́ Yesu. Wolo ni ji Enciclopedia Hispánica lɛ wie akɛ: “Jeee gbi nɔ ni afɔ́ Yesu lɛ he akɔntaabuu ni ja pɛpɛɛpɛ nɔ adamɔ ato December 25 akɛ gbi kɛha Blonyayeli lɛ, shi moŋ kpɛlɛmɔ ni akpɛlɛ gbi ni jeɔ fɛ̃ibe shishi lɛ he gbijuji lɛ anɔ ákɛ Kristofoi agbijurɔyeli lɛ mli ajɛ ato.” Blema Romabii lɛ yeɔ hulu shitee yɛ fɛ̃ibe mli he gbijuji lɛ kɛtsɔ okpɔlɔŋmɛɛi, hiɛtserɛjiemɔi ni yɔɔ hoo, kɛ nikeei anɔ.—12/15, baafa 4-5.
• Ani Bɔfoi lɛ Asaji 7:59 lɛ tsɔɔ akɛ Stefano sɔle eha Yesu?
Dabida. Biblia lɛ tsɔɔ akɛ Yehowa Nyɔŋmɔ pɛ esa akɛ asɔle aha. Akɛni Stefano na Yesu yɛ ninaa mli hewɔ lɛ, eyɛ faŋŋ akɛ enu he akɛ ekɛ efaikpamɔ lɛ aha lɛ tɛ̃ɛ, ni ekɛɛ akɛ: “Nuŋtsɔ Yesu, heremɔ mimumɔ lɛ.” Stefano le akɛ aha Yesu hegbɛ ni etée gbohii ashi. (Yohane 5:27-29) No hewɔ lɛ, Stefano bi loo ekpá Yesu fai koni ekɛ ewala lɛ ato kɛyashi gbohiiashitee be lɛ mli.—1/1, baafa 31.
• Te wɔfeɔ tɛŋŋ wɔleɔ akɛ atsɔ̃ko hiɛ atoko nɔ ni baaba mɔ nɔ wɔsɛɛ lɛ he gbɛjianɔ afɔ̃ko shi momo?
Nyɔŋmɔ kɛ nihalamɔ mli heyeli eduro wɔ, ni heyeli nɛɛ kɛ hiɛ ni atsɔɔ atoɔ nibii ni baa mɔ nɔ he gbɛjianɔ afɔ̃ɔ shi lɛ bɛ tsakpãa ko. Kɛji akɛ Yehowa tsɔɔ hiɛ etoɔ gbɛ ni wɔbaakɔ lɛ he gbɛjianɔ efɔ̃ɔ shi dani afɔ́ɔ wɔ, kɛkɛ lɛ etsɔ ehe eebi ni wɔbu wɔnifeemɔi ahe akɔntaa wɔha lɛ lɛ, no baatsɔɔ akɛ eji mɔ ko ni bɛ suɔmɔ kɛ mɔ ni yeee jalɛsane hu. (5 Mose 32:4; 1 Yohane 4:8)—1/15, baafa 4-5.
• Mɛni hewɔ ebaafee nɔ ni nilee bɛ mli akɛ aaawie akɛ naakpɛɛ nifeemɔi nyɛŋ aba lɛ?
Akɛni jeŋ nilelɔi eyɔse akɛ nilee ni amɛná yɛ Nyɔŋmɔ adebɔɔ nibii ni yɔɔ naakpɛɛ lɛ ahe lɛ faaa hewɔ lɛ, amɛteŋ mɛi komɛi kpɛlɛɔ nɔ akɛ amɛnyɛŋ amɛkɛɛ kɛ nɔmimaa dɔŋŋ akɛ nɔ ko nyɛŋ aba shihilɛ mli. Kɛ́ eshi aahu lɛ, nɔ pɛ ni amɛkɛɔ kɛkɛ ji akɛ enyɛŋ efee anɔkwale.—2/15, baafa 5-6.
• Mɛni hewɔ Kojolɔ Samson kɛɛ efɔlɔi akɛ eesumɔ ni eŋɔ Filistibii abiyoo efee eŋa lɛ? (Kojolɔi 14:2)
Nyɔŋmɔ mla lɛ guɔ gbalashihilɛ mli ni akɛ apasa nyɔŋmɔi ajálɔ ko aaabote lɛ. (2 Mose 34:11-16) Shi kɛlɛ, Filisti yoo lɛ ji mɔ ni Samson ‘sumɔɔ.’ Samson ‘miitao Filistibii lɛ ahe gbɛ,’ ni yiŋtoo nɛɛ he nitsumɔ hewɔ ni esumɔɔ yoo lɛ. Yehowa tsɔ E-mumɔ lɛ nɔ efi Samson sɛɛ yɛ enɛ mli. (Kojolɔi 13:25; 14:3, 4, 6)—3/15, baafa 26.
• Ani esa akɛ Kristofonyo ake maŋ nitsulɔ ko shika loo eha lɛ nikeenii ko yɛ nɔ ni mɔ lɛ tsuɔ ehaa lɛ lɛ hewɔ?
Eji tɔmɔ ákɛ aaaha maŋ onukpa ko nyɔɔŋnii loo nikeenii ko ni jara wa koni no aha etsu nɔ ko ni mla eŋmɛɛɛ gbɛ he nii eha mɔ, loo ní etsɔ sane hiɛ ebu shi, loo ní etsu nɔ ni mɔ lɛ taoɔ lɛ he nii klɛŋklɛŋ. Shi shika ni aaake maŋ nitsulɔ ko loo ni aaaha lɛ nikeenii ko yɛ nii ni etsu eha mɔ lɛ hewɔ, loo koni no aha nikelɔ lɛ nine ashɛ nɔ̃ kpakpa ko ni ebiɔ ni atsu he nii lɛ nɔ, loo ní no akaha aye lɛ sane fɔŋ lɛ etsɔɔɔ nyɔɔŋnihamɔ.—4/1, baafa 29.