Kpɔmɔnɔ Lɛ Wóɔ Nyɔŋmɔ Jalɛ lɛ Nɔ Gojoo

YƐ Adam kɛ Hawa atuatsemɔ lɛ sɛɛ lɛ, Yehowa tsɔɔ akɛ eyiŋtoo ni ehiɛ ji akɛ ebaatee Seshi ko ni abaatswa enanetsitsi nɔ̃ lɛ shi. (1 Mose 3:15) Enɛ ba mli beni Nyɔŋmɔ henyɛlɔi lɛ gbe Yesu Kristo yɛ sɛŋmɔtso nɔ lɛ. (Galatabii 3:13, 16) Akɛni aŋɔ Yesu hɔ́ yɛ oblayoo fro fɔmɔ kotoku mli yɛ naakpɛɛ gbɛ nɔ kɛtsɔ mumɔ krɔŋkrɔŋ lɛ hewalɛ nɔ hewɔ lɛ, esha bɛ ehe. No hewɔ lɛ, abaanyɛ akɛ elá ni efɔse eshwie shi lɛ atsu nii akɛ kpɔmɔnɔ koni akɛha adesai ni ná esha kɛ gbele kɛjɛ Adam ŋɔɔ kɛtsɔ fɔmɔ mli lɛ aye amɛhe.—Romabii 5:12, 19.

Nɔ ko nɔ ko nyɛŋ atsĩ Yehowa, ni ji Nyɔŋmɔ ofe lɛ naa akɛ ekatsu eyiŋtoi ahe nii. No hewɔ lɛ, beni gbɔmɔ fee esha sɛɛ lɛ, Yehowa le akɛ kpɔmɔnɔ lɛ he jara ni abaawo lɛ baajie esha kɛya, ni akɛ ebaanyɛ ekɛ mɛi ni náa hemɔkɛyeli akɛ eshiwoi lɛ baaba mli anɔkwale lɛ abɔ naanyo. Enɛ ha Adam seshibii ni esha yɔɔ amɛhe tamɔ Henok, Noa kɛ Abraham nyɛ amɛkɛ Nyɔŋmɔ nyiɛ ni ekɛ amɛ bɔ naanyo, ni enɛ fiteee E-krɔŋkrɔŋfeemɔ lɛ.—1 Mose 5:24; 6:9; Yakobo 2:23.

Aŋkroaŋkroi komɛi ni ná hemɔkɛyeli yɛ Yehowa mli lɛ fee eshai ni hiɛdɔɔ yɔɔ he. Maŋtsɛ David ji amɛteŋ mɔ kome. Ekolɛ obaabi akɛ, ‘Te aaafee tɛŋŋ ni Yehowa aaaya nɔ ajɔɔ Maŋtsɛ David yɛ be mli ni David kɛ Batsheba fite gbala ni no sɛɛ lɛ eha agbe ewu Uria hu lɛ?’ Nɔ titri hewɔ ji akɛ David jie anɔkwa tsuitsakemɔ kpo, ni ená hemɔkɛyeli. (2 Samuel 11:1-17; 12:1-14) Akɛni no mli lɛ aakpá Yesu Kristo afɔleshaa lɛ ní baaba wɔsɛɛ lɛ gbɛ hewɔ lɛ, Nyɔŋmɔ baanyɛ ekɛ David ni etsake etsui lɛ he eshai ake lɛ koni yɛ nakai beaŋ nɔŋŋ lɛ, E-ya nɔ E-hiɛ Lɛ diɛŋtsɛ E-jalɛsaneyeli kɛ E-jalɛ lɛ mli. (Lala 32:1, 2) Biblia lɛ tsɔɔ nɔ ni yɔɔ miishɛɛ fe fɛɛ ni Yesu kpɔmɔnɔ lɛ tsu he nii kɛye enɛ he odase lɛ mli, akɛ no ji “koni ejie [Nyɔŋmɔ] ejalɛ lɛ kpo, yɛ ehiɛ ní eku efɔ̃ eshai ní afee sá lɛ anɔ” kɛ agbɛnɛ hu “yɛ benɛbe nɛɛ mli.”—Romabii 3:25, 26.

Hɛɛ, adesai anine shɛɔ sɛɛnamɔi babaoo anɔ yɛ Yesu lá lɛ jara lɛ hewɔ. Yɛ kpɔmɔnɔ lɛ he hewɔ lɛ, adesai eshafeelɔi ni etsake amɛtsui lɛ baanyɛ aná amɛkɛ Nyɔŋmɔ teŋ wekukpãa ni bɛŋkɛ kpaakpa. Kɛfata he lɛ, kpɔmɔnɔ lɛ baaha atee gbohii lɛ ashi kɛba wala mli yɛ Nyɔŋmɔ jeŋ hee lɛ mli. Mɛi ni baafata he ji Nyɔŋmɔ tsuji anɔkwafoi ni gboi dani Yesu wo kpɔmɔnɔ lɛ he nyɔmɔ lɛ, kɛ agbɛnɛ hu mɛi pii ní náaa Nyɔŋmɔ he nilee ní amɛjáaa Lɛ hu dani amɛgboi lɛ. Biblia lɛ kɛɔ akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Yɛ nakai beaŋ lɛ, Yehowa baatsɔ kpɔmɔnɔ lɛ nɔ eha adesai fɛɛ ni feɔ toiboo lɛ aná naanɔ wala. (Yohane 3:36) Yesu diɛŋtsɛ tsɔɔ enɛ mli akɛ: ‘Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.’ (Yohane 3:16) Adesai baaná nɛkɛ nibii nɛɛ fɛɛ ahe sɛɛ yɛ kpɔmɔ afɔleshaa ni Nyɔŋmɔ kɛha lɛ hewɔ.

Shi kɛlɛ, jeee sɛɛnamɔi ni wɔnáa kɛjɛɔ kpɔmɔnɔ lɛ mli lɛ ji nɔ ni haa ebafeɔ nɔ ni he hiaa fe fɛɛ. Nɔ ni he hiaa fe fɛɛ ji nɔ ni Kristo kpɔmɔnɔ lɛ feɔ yɛ Yehowa gbɛi lɛ he. Etsɔɔ akɛ Yehowa ji Nyɔŋmɔ ni yeɔ jalɛ sane ni hi jogbaŋŋ kɛmɔ shi, ni ebaanyɛ ekɛ adesai eshafeelɔi aye ni ekã he ehi shi akɛ mɔ ni he tse ni yɔɔ krɔŋkrɔŋ. Eji Nyɔŋmɔ etooo eyiŋ akɛ ekɛ kpɔmɔnɔ lɛ baaha kulɛ, Adam seshinyo ko seshinyo ko ni Henok, Noa kɛ Abraham fata he lɛ po nyɛŋ ekɛ Yehowa anyiɛ loo ni efee enaanyo. Lalatsɛ lɛ yɔse enɛ ni eŋma akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ, Nuŋtsɔ, namɔ po aaanyɛ shi adamɔ?” (Lala 130:3) Kwɛ bɔ ni esa akɛ wɔjie hiɛsɔɔ kpo wɔha Yehowa akɛ etsu esuɔmɔ Bi lɛ kɛba shikpɔŋ nɔ, ni kwɛ bɔ ni esa akɛ wɔjie hiɛsɔɔ hu kpo wɔtsɔɔ Yesu akɛ ejɛ esuɔmɔ mli ekɛ ewala ha akɛ kpɔmɔnɔ!—Marko 10:45.