Mlijɔlɛ Kpo ní Ajieɔ yɛ Jeŋ Fɔŋ Mli

ATIRIDII ko batswa nuu ko waa yɛ Burundi. Esa ákɛ akɛ lɛ aya helatsamɔhe amrɔ nɔŋŋ. Shi te abaafee tɛŋŋ akɛ lɛ aya? Tsɔne bɛ ni akɛbaawo lɛ kɛya. Eshieŋtsɛmɛi enyɔ baye amɛbua lɛ. Amɛwo lɛ amɛtá okɔokpe nɔ, ni amɛkɛ deŋmegbomɔ tsi lɛ ŋmɛlɛtswai enumɔ sɔŋŋ kɛtsɔmɔ gɔji anɔ. Amɛkɛ lɛ yafo bɔs kɛtee helatsamɔhe ni bɛŋkɛ amɛ fe fɛɛ lɛ. Gbii fioo komɛi asɛɛ lɛ, ehe bawa lɛ saŋŋ.

Yɛ August afi 2005 beni ahum ko ni kpãtaa nii ahiɛ ni atsɛɔ lɛ Katrina lɛ tswa ní ekpata nibii ahiɛ yɛ United States wuoyigbɛ maji lɛ ekomɛi amli lɛ, mɛi komɛi ni kɛ amɛhe eha kɛmiiye miibua mɛi lɛ yana tsũ ko ni tsei ekumɔ egbee nɔ, ni tsũ lɛ diɛŋtsɛ hu ekumɔ. Eyɛ mli akɛ amɛlé shiatsɛ lɛ moŋ shi amɛtsu nii gbi muu fɛɛ ni amɛkɛ saalai folɔ tsei lɛ, ni amɛjie nibii ni ekumɔkumɔi lɛ fɛɛ. Shiatsɛ lɛ kɛɛ akɛ: ‘Mihiɛ esɔ nɔ ni amɛfee lɛ waa.’

Bei pii lɛ afɔɔ awuiyeli kɛ niseniianifeemɔi ahe adafitswaa, ni awoɔ he. Bei pii lɛ enɛɛmɛi haaa ana mlijɔlɛ kɛ mlihilɛ ni mɛi jieɔ lɛ kpo daa gbi lɛ. Ni kɛlɛ, enɛ tsakeee anɔkwale ni eji akɛ adesai ni yɔɔ he fɛɛ he lɛ miisumɔ waa ni ajie suɔmɔ, mɔ hedɔɔ, kɛ mɔbɔnalɛ kpo atsɔɔ amɛ. Wɔmiisumɔ ni mɛi ajie mlijɔlɛ kpo atsɔɔ wɔ! Anaa enɛ waa yɛ Blonyayeli beaŋ beni mɛi babaoo wieɔ akɛ ‘hejɔlɛ aba ní aná gbɔmɛi ahe tsuijurɔ’ lɛ.—Luka 2:14.

Ebaanyɛ efee nɔ ni wa akɛ aaajie mlijɔlɛ kpo yɛ jeŋ ni mɛi babaoo edɔɔɔ mɔ he ní amɛjieee mlihilɛ kpo nɛɛ mli. Susumɔ ni mɛi pii hiɛ ji akɛ dani obaaye omanye yɛ shihilɛ mli lɛ, esa akɛ ofee mɔ ni yi wa ní nuuu nii ahe ehaaa mɛi. Etamɔ nɔ ni mɛi babaoo kɛ wiemɔ ni ji nilee yɛ mli akɛ oyi aaawa fe nɔ ni ooojie mlijɔlɛ kpo lɛ tsuɔ nii. Hiɛkɔɔ kɛ ŋkomeŋfa sui haaa mɛi ajie mlijɔlɛ kpo.

Enɛ hewɔ lɛ, mɛi babaoo susuuu mɛi krokomɛi ahe yɛ gbɛ ko kwraa nɔ. Bei pii lɛ, akaŋshilɔi kɛ sinifeelɔi ni amɛfee gbɛi waa lɛ ji mɛi ni edɔɔɔ mɛi ahe yɛ akaŋshii mli loo sinii amli. Maŋkwramɔŋ nɔyelɔi komɛi hu feɔ amɛnii yɛ nakai gbɛ nɔŋŋ nɔ.

No hewɔ lɛ, ehi jogbaŋŋ akɛ wɔɔbi akɛ: Mɛni hewɔ esa akɛ wɔna mɛi amɔbɔ? Ani mlijɔlɛ náa mɛi anɔ hewalɛ kpakpa? Mɛni baanyɛ aye abua wɔ ni wɔjie mlijɔlɛ kpo? Sane ni nyiɛ sɛɛ lɛ baaha sanebimɔi nɛɛ ahetoo.

[Akrabatsa ni yɔɔ baafa 3]

•Kɛ́ mɔ ko jie mlijɔlɛ kpo lɛ, ani no tsɔɔ akɛ ehiɛ waaa?

•Ani mlijɔlɛ náa mɛi anɔ hewalɛ kpakpa?

•Mɛi gbɛ̀i anɔ obaanyɛ otsɔ ojie mɔbɔnalɛ kpo?