Yesu Kristo Bɔ ni Eshɛɛ Sane lɛ Ná Mɛi Anɔ Hewalɛ
“Ekã shi faŋŋ akɛ nɔ ni sa kadimɔ waa yɛ nuu nilelɔ ni jɛ Kapernaum lɛ he ji akɛ, ekã he eená mɛi ashihilɛi anɔ hewalɛ.”a—WOLOŊMALƆ GREGG EASTERBROOK.
WIEMƆI yɛ hewalɛ. Nilee wiemɔi ni ahala lɛ jogbaŋŋ lɛ baanyɛ atsirɛ tsuii, eha aná hiɛnɔkamɔ, ní etsake mɛi ashihilɛ. Mɔ ko kwraa bɛ ni ewiemɔ ená mɛi anɔ hewalɛ tamɔ Yesu Kristo. Mɔ ko ni nu Yesu wiemɔ ni eha, ni amrɔ nɛɛ wɔle lɛ akɛ Gɔŋ nɔ Shiɛmɔ lɛ ŋma yɛ sɛɛ mli akɛ: “Beni Yesu egbe wiemɔi nɛɛ anaa lɛ, mɛi lɛ ahe jɔ̃ amɛhe yɛ enitsɔɔmɔ lɛ hewɔ.”—Mateo 7:28.
Kɛbashi ŋmɛnɛ lɛ, yɛ je lɛŋ he fɛɛ he lɛ mɛi yɛ ni le Yesu wiemɔi lɛ babaoo. Kwɛmɔ nilee wiemɔi ni shishinumɔ yɔɔ mli lɛ ekomɛi.
“Nyɛnyɛŋ Nyɔŋmɔ kɛ mamona niifálɛ nyɛsɔmɔ.”—Mateo 6:24.
“No hewɔ lɛ, nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.”—Mateo 7:12.
“Nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ!”—Mateo 22:21.
“Nɔhamɔ mli yɛ jɔɔmɔ fe hemɔ.”—Bɔfoi lɛ Asaji 20:35.
Shi jeee wiemɔi ni anyɛɔ akaiɔ pɛ Yesu kɛtsu nii. Shɛɛ sane ni eshiɛ lɛ yɛ hewalɛ ejaakɛ ekɛ anɔkwale ni kɔɔ Nyɔŋmɔ he lɛ ha, eha mɛi le bɔ ni amɛaafee amɛtsui anyɔ amɛmli yɛ shihilɛ mli, ni eha efee faŋŋ akɛ Nyɔŋmɔ Maŋtsɛyeli lɛ pɛ baanyɛ ekɛ adesai apiŋmɔi aba naagbee. Be ni wɔpɛiɔ shɛɛ sane nɛɛ mli yɛ baafai ni nyiɛ sɛɛ nɛɛ amli lɛ, wɔbaana nɔ̃ hewɔ ni Yesu kã he eená mɛi akpekpei abɔ “ashihilɛi anɔ hewalɛ” lɛ.
[Shishigbɛ niŋmaa]