Ani ‘Hegbɛ ni Haa Ajɛɔ Mlihilɛ Mli akɛ Nɔ ni Ayɔɔ Haa lɛ’ Haa Onáa Miishɛɛ?

ALE mra beaŋ Kristofoi ni hi shi yɛ Filipi lɛ akɛ mɛi ni kɛ amɛnibii fi anɔkwa jamɔ sɛɛ babaoo. Beni akɛ mumɔ tsirɛ bɔfo Paulo ni eŋma amɛ wolo lɛ, eŋma akɛ: “Midaa mi-Nyɔŋmɔ lɛ shi be fɛɛ be ni mikaiɔ nyɛ yɛ midaa faikpamɔi fɛɛ ni mikpaa mihãa nyɛ fɛɛ lɛ mli, ni mikɛ miishɛɛ kpaa fai, yɛ wa ni nyɛwa yɛ sanekpakpa lɛ gbɛfaŋ kɛjɛ klɛŋklɛŋ gbi lɛ nɔ kɛbashi be nɛ lɛ hewɔ.” (Fil. 1:3-5, Ga Biblia hee) Paulo hiɛ kpaaa nɔ kwraa akɛ beni abaptisi Lidia kɛ ewe lɛ, Lidia kpa lɛ kɛ enanemɛi ni ekɛshiɛɔ lɛ fai aahu akɛ amɛhi ewe lɛ koni efee amɛ gbɔ.—Bɔf. 16:14, 15.

No sɛɛ etsɛɛɛ lɛ, Paulo kɛ nyɛmimɛi ni yɔɔ Tesalonika lɛ hi shi otsii abɔ komɛi; nakai otsii lɛ amli lɛ, asafo hee ni ato shishi yɛ Filipi ni kɛ Tesalonika jekɛmɔ aaafee kilomitai 160 lɛ kɛ nibii komɛi maje Paulo shii enyɔ. (Fil. 4:15, 16) Afii fioo komɛi asɛɛ, beni Filipibii lɛ kɛ nyɛmimɛi krokomɛi ni yɔɔ Makedonia lɛ miina amane ni amɛmiiye ‘ohia katekate’ hu lɛ, amɛnu akɛ Yerusalem Kristofoi ni aawa amɛyi lɛ ahe efi amɛ, ni amɛná he miishɛɛ akɛ amɛbaaye amɛbua amɛ. Paulo ye odase akɛ “amɛha fe bɔ ni amɛaanyɛ tete.” Fɛɛ sɛɛ lɛ, eŋma akɛ: “Amɛkɛ tutɔmɔ babaoo kpa wɔ fai koni wɔha amɛná hegbɛ ni amɛjɛ mlihilɛ mli amɛkɛ nɔ ni amɛyɔɔ lɛ aha.”—2 Kor. 8:1-4, NW; Rom. 15:26.

Beni Filipibii lɛ mɔ Kristojamɔ mli klɛŋklɛŋ kwraa lɛ, no sɛɛ aaafee afii nyɔŋma lɛ, no mli lɛ amɛkahe amɛjieɔ nakai nɔhamɔ mumɔ lɛ kpo. Beni amɛnu akɛ awo Paulo tsuŋ yɛ Roma lɛ, amɛtsu Epafrodito ni efa gbɛ ni jekɛmɔ aaafee kilomitai 1,287 kɛtsɔ shikpɔŋ nɔ kɛ ŋshɔ hiɛ koni ekɛ nibii ayaha bɔfo Paulo. Ŋwanejee ko bɛ he akɛ, Filipibii lɛ miisumɔ ni amɛye amɛbua Paulo koni enyɛ eya nɔ ewaje nyɛmimɛi lɛ ni eshiɛ hu beni awo lɛ tsuŋ po lɛ.—Fil. 1:12-14; 2:25-30; 4:18.

Ŋmɛnɛ lɛ, anɔkwa Kristofoi naa lɛ akɛ eji hegbɛ ni amɛná akɛ amɛye amɛbua koni atsu Maŋtsɛyeli shiɛmɔ kɛ kaselɔfeemɔ nitsumɔ lɛ. (Mat. 28:19, 20) Amɛkɛ amɛbe, amɛnyɛmɔ, kɛ amɛshika yeɔ amɛbua koni Maŋtsɛyeli lɛ he nibii lɛ ashwere. Akrabatsa ni fata he nɛɛ tsɔɔ gbɛi komɛi ni obaanyɛ otsɔ nɔ ofi nitsumɔ ni jɛ Nyɔŋmɔ ŋɔɔ nɛɛ sɛɛ.

[Akrabatsa ni yɔɔ baafa 22, 23]

GBƐI NI MƐI KOMƐI TSƆƆ NƆ AMƐKEƆ NII

ONIATSUMƆI KƐHA JEŊ MUU FƐƐ NITSUMƆ LƐ

Mɛi pii kɛ shika abɔ ko ni amɛkpɛ mli amɛto lɛ woɔ oniatsumɔ adekai ni akadi amɛ akɛ “Jeŋ Muu Fɛɛ Nitsumɔ Lɛ” amli.

Daa nyɔɔŋ nɔ lɛ, asafoi kɛ shika nɛɛ majeɔ Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Mɛi baanyɛ amɛkɛ shika ni amɛtaoɔ amɛkɛke lɛ hu amaje tɛ̃ɛ kɛyaha Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, aloo amɛbaanyɛ amɛkɛya Yehowa Odasefoi anitsumɔhe nine ni kwɛɔ maŋ ni amɛyɔɔ mli lɛ nɔ lɛ. (Mɛi baanyɛ amɛtsɔ gbɛi ni atsɔɔ nɔ atsuɔ onia ni atsĩ tã yɛ shishigbɛ lɛ hu nɔ amɛkɛ nibii ni amɛmiitao amɛkɛye amɛbua lɛ amaje Yehowa Odasefoi anitsumɔhe nine ni kwɛɔ maŋ ni amɛyɔɔ mli lɛ nɔ lɛ.) Kɛ́ akɛ tsɛk miitsɔ adrɛs ni yɔɔ yiteŋgbɛ lɛ nɔ kɛmiiha lɛ, esa akɛ aŋma “Watchtower” yɛ nɔ ákɛ mɛi ni aawo shika lɛ aaha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe, ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika aha Watch Tower Bible and Tract Society of Pennsylvania koni ekɛtsu enibii ahe nii yɛ jeŋ fɛɛ. Shi kɛ́ mɔ ni kɛha lɛ miitao lɛ, akɛbaaha lɛ. Kɛ́ ootao ole sane nɛɛ mli jogbaŋŋ lɛ, ofainɛ ŋmaa kɛyabi yɛ Treasurer’s Office lɛ kɛtsɔ adrɛs ni atsɔɔ yɛ yiteŋgbɛ lɛ nɔ loo obaanyɛ otswa tɛlifoŋ kɛya (718) 560-7500.

GBƐI KROKOMƐI NI ABAANYƐ ATSƆ NƆ AYE ABUA

Kɛfata shika ni akɛkeɔ kwraa lɛ he lɛ, ayɛ gbɛi krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshuɔrans: Mɔ ko baanyɛ aŋma Watch Tower Bible and Tract Society of Pennsylvania gbɛ́i awo inshuɔrans ko nɔ akɛ mɛi ni akɛ inshuɔrans lɛ aha yɛ mɔ lɛ gbele sɛɛ loo mɛi ni akɛ mɔ lɛ pɛŋshɛŋ shika lɛ aha.

Shika ni Akɛto Shikatoohe: Mɔ ko baanyɛ ekɛ shika ni ekɛto yɛ shikatoohe, shika ko ni ekɛha shikatoohe ko be kukuoo ko lɛ, loo epɛŋshɛŋ shika awo Watch Tower Bible and Tract Society of Pennsylvania lɛ gbɛ́i mli, loo ebaanyɛ eŋma yɛ nibii nɛɛ ahe woji lɛ anɔ ákɛ akɛ shikai nɛɛ aha Watch Tower Bible and Tract Society of Pennsylvania yɛ egbele sɛɛ, ni ebaafee enɛ yɛ mlai ni maŋ ni eyɔɔ nɔ lɛ ewo yɛ saji ni tamɔ nakai lɛ ahe lɛ anaa.

Shika ni Akɛwo Nitsumɔ ko Mli loo Akɛfa Shikatoohe: Mɔ ko baanyɛ ekɛ shika ni ekɛwo nitsumɔ ko mli loo ekɛfa shikatoohe ko lɛ aha Watch Tower Bible and Tract Society of Pennsylvania akɛ nibii ni ekɛmiike kwraa loo efee shamaŋsheo akɛ kɛ́ egbo lɛ akɛ nibii nɛɛ aha Watch Tower Bible and Tract Society of Pennsylvania.

Shikpɔji kɛ Tsũi: Mɔ ko baanyɛ ekɛ shikpɔji kɛ tsũi ni baahi hɔɔmɔ ake kwraa, loo ekɛ lɛ diɛŋtsɛ eshĩa ko ni eyɔɔ mli lɛ aha akɛ ekɛmiike kwraa shi ebaahi shĩa lɛ mli kɛyashi be mli ni ebaagbo. Ha nitsumɔhe nine ni yɔɔ maŋ ni oyɔɔ nɔ lɛ ale dani okɛ shikpɔŋ loo tsũ ko aha.

Shika ni Mɔ ko Kɛke Shi Daa Afi lɛ Abaaha lɛ Shika Abɔ ko: Mɔ ko baanyɛ ekɛ shika, shika ni ekɛwo nitsumɔ ko mli, loo ekɛfa shikatoohe ko lɛ ake Yehowa Odasefoi anitsumɔ kuu ko ni akɛwo mla shishi. Yɛ enɛ gbɛfaŋ lɛ, abaaha mɔ ni kɛke lɛ, loo mɔ kroko ni mɔ ni kɛke lɛ ehala lɛ lɛ shika abɔ ko daa afi yɛ ewala beaŋ fɛɛ. Yɛ afi ni mɔ lɛ kɛ shika lɛ ke lɛ mli lɛ, atseɔ too ni esa akɛ mɔ ni kɛ shika lɛ ke lɛ awo yɛ shika ni enáa lɛ he lɛ nɔ.

Shamaŋsheo kɛ Nii ni Ahaa Mɔ Kroko Gbɛ́i Kãa Nɔ: Abaanyɛ akɛ nibii ni ayɔɔ loo shika ake Watch Tower Bible and Tract Society of Pennsylvania kɛtsɔ shamaŋsheo ni aŋma yɛ mla naa lɛ nɔ, aloo abaanyɛ aha Watch Tower Bible and Tract Society of Pennsylvania gbɛ́i akã shika ko ni akɛto lɛ nɔ akɛ mɔ ni baaná he sɛɛ. Bei komɛi lɛ, kɛ́ mɔ ko kɛ shika ko ni ekɛto shikatoohe wo jamɔ gbɛjianɔtoo ko gbɛ́i mli lɛ, no baanyɛ aha atse too ni mɔ lɛ woɔ lɛ nɔ.

Ebaabi ni mɔ ko ni miitao ni ekɛ nibii ni atsi tã kɛtsɔ hiɛ lɛ eko ake lɛ, ato he gbɛjianɔ. Afee wolo bibioo ko yɛ Blɔfo kɛ Spain wiemɔi amli ni yitso ji Charitable Planning to Benefit Kingdom Service Worldwide koni akɛye abua aŋkroaŋkroi ni miisumɔ ni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ gbɛjianɔtoi nɛɛ ateŋ eko nɔ. Aŋma wolo bibioo nɛɛ koni eha ale gbɛi srɔtoi anɔ ni abaanyɛ atsɔ akɛ nibii kɛ shika ake amrɔ nɛɛ, loo bɔ ni mɔ aaafee eha nine ashɛ shika loo nɔ ko ni ekɛke lɛ nɔ yɛ egbele sɛɛ. Mɛi babaoo yɛ ni beni amɛkane wolo bibioo nɛɛ amɛgbe naa ni amɛkɛ mlalelɔi kɛ toowoo he nilelɔi esusu he lɛ sɛɛ lɛ, amɛnyɛ amɛfi Yehowa Odasefoi ajamɔ lɛ kɛ nitsumɔi ni amɛtsuɔ yɛ jeŋ fɛɛ kɛyeɔ amɛbuaa adesai lɛ asɛɛ, ni enɛ eha atse too ni mɛi nɛɛ woɔ lɛ nɔ. Kɛ́ mɔ ko miitao enine ashɛ wolo bibioo nɛɛ eko nɔ lɛ, ebaanyɛ eshɛ eko tɛ̃ɛ kɛjɛ Charitable Planning Office lɛ dɛŋ.

Kɛ́ ootao ole sane nɛɛ mli jogbaŋŋ lɛ, obaanyɛ otsɔ adrɛs ni atsɔɔ yɛ shishigbɛ lɛ nɔ oŋma Charitable Planning Office lɛ, otswa tɛlifoŋ nɔmba ni yɔɔ shishigbɛ lɛ loo obi nitsumɔhe nine ni sɔmɔɔ maŋ ni oyɔɔ mli lɛ.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707