SANEBIMƆI NI BIBLIA LƐ EHA HETOO
Mɛɛ gbɛ nɔ wɔnáa Yesu gbele lɛ he sɛɛ?
Beni Nyɔŋmɔ bɔ adesai lɛ, eyiŋtoo ji ni amɛhi shikpɔŋ lɛ nɔ kɛya naanɔ ni hela mɔɔɔ amɛ lɛ, amɛgbooo hu. Shi, Adam, ni ji klɛŋklɛŋ gbɔmɔ lɛ, gbo Bɔlɔ lɛ nɔ toi, ni enɛ ha naanɔ wala he hiɛnɔkamɔ lɛ ŋmɛɛ lɛ. Akɛ Adam seshibii lɛ, wɔná gbele akɛ gboshinii. (Romabii 5:8, 12; 6:23) Yehowa, ni ji anɔkwa Nyɔŋmɔ lɛ, tsu Yesu, ni ji e-Bi lɛ lɛ, kɛba shikpɔŋ lɛ nɔ ni ebagbo koni adesai aná hiɛnɔkamɔ ni ŋmɛɛ Adam lɛ ekoŋŋ.—Kanemɔ Yohane 3:16.
Yesu gbo bɔni afee ni adesai anyɛ ahi shi kɛya naanɔ. Kɛ́ okwɛ lɛ, ani efeŋ miishɛɛ akɛ wɔɔhi shikpɔŋ lɛ nɔ kɛya naanɔ?
Yesu gbele lɛ hewɔ lɛ, abaanyɛ akɛ wɔhe eshai ake wɔ ni wɔná naanɔ wala. Biblia lɛ haa wɔnaa bɔ ni shikpɔŋ nɔ shihilɛ baafee beni gbɔlɛ, hela, kɛ gbele bɛ dɔŋŋ.—Kanemɔ Yesaia 25:8; 33:24; Kpojiemɔ 21:4, 5.
Mɛni esa akɛ wɔfee kɛkai Yesu gbele lɛ?
Gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ ekaselɔi lɛ akɛ amɛye gbi jurɔ ko ni bɛ haŋtsii ni amɛkɛkai egbele lɛ. Kɛ́ wɔkai Yesu gbele lɛ yɛ nakai gbɛ nɔ daa afi lɛ, ehaa wɔsusuɔ suɔmɔ ni nɔ bɛ ni Yesu kɛ Yehowa yɔɔ kɛha adesai lɛ he waa.—Kanemɔ Luka 22:19, 20; 1 Yohane 4:9, 10.
Afi nɛɛ, Yesu gbele lɛ Kaimɔ lɛ baagbee Ju, April 14, beni hulu enyɔ shi. Wɔmiifɔ̃ bo nine ni ofata Yehowa Odasefoi ni yɔɔ he ni oyɔɔ lɛ ahe kɛye gbi jurɔ nɛɛ.—Kanemɔ Romabii 1:11, 12.