Ani Ootao Nilee ni Nyɔŋmɔ Gbeyeishemɔ Yɔɔ Mli?

¹ “Yaa nɔ Otao Tamɔ Jwetrii ni Aŋɔtee” ji wiemɔ ni kanyaa mɔ ni aha yɛ “Ŋwɛi Jalɛsaneyeli” Kpokpaa Wuji anɔ kpeei lɛ gbi ni ji enyɔ lɛ nɔ lɛ yitso. Ani wɔɔmiitsu nibii ni wɔnu lɛ ahe nii ni ani wɔmiibɔ mɔdɛŋ ni wɔfee mɛi ni kɛ ekaa taoɔ nilee mli jwetrii?​—Abɛi 2:​1-6.

² Wɔbaafee jwetri taolɔi ni ebɔɔɔ mɔdɛŋ kɛji akɛ wɔfɔɔɔ Biblia lɛ kanemɔ aloo wɔkaneee Buu-Mɔɔ lɛ kɛ Awake! woji tɛtrɛbii lɛ. Ani wɔtsaa shi kɛtaoɔ nilee ni jɛ Nyɔŋmɔ Wiemɔ lɛ mli ni tamɔ jwetrii ni anyɛŋ ahe lɛ yɛ be mli ni wɔsaa wɔhe kɛhaa wiemɔ ko lɛ, yɛ be mli ni wɔsusuɔ Biblia mli sanebimɔ ko hetoo he, aloo yɛ be mli ni wɔtaoɔ naagba ko he tsabaa lɛ? Be ni ayeɔ yɛ niiamlipɛimɔ kɛ ehesusumɔ mli lɛ he miihia dani mɔ ko nine ashɛ Biblia mli jwetrii anɔ, shi mɛɛ miishɛɛ jɛɔ mli baa nɛkɛ!​—Abɛi 3:​13-18.

³ Agbɛnɛ wɔbaanyɛ wɔkɛ wolo hee ni ji Insight on the Scriptures lɛ atsu nii kɛfata Index, Concordance, kɛ Reference Bible, lɛ kɛ woji krokomɛi ni ale jogbaŋŋ ni yɔɔ wɔ teokrase wojiatoo he lɛ ahe. Kwɛ bɔ ni Yehowa kɛ yelikɛbuamɔ ni he hiaa wɔ lɛ eha wɔ babaoo koni wɔkɛtao “Nyɔŋmɔ nibii ni mli kwɔlɔ lɛ amli”!​—1 Kor. 2:⁠10.

⁴ Wɔmumɔŋ hewalɛnamɔ kɔɔ Nyɔŋmɔ he nilee he yɛ gbɛ pɔtɛɛ nɔ. Akɛ ŋaawoi kpakpai ha wɔ yɛ wiemɔ ni yitso ji “Ni Wɔɔhiɛ Hewalɛnamɔ Kpakpa Mli yɛ Jeŋ ni he Yeɔ Mli” lɛ mli yɛ Hɔgbaa leebi yɛ kpee lɛ shishi. Ani okaiɔ gbɛ ni wɔɔtsɔ nɔ wɔtsi wɔhe kɛjɛ mumɔŋ helai ni baa kɛjɛɔ heloo lɛ gbɔjɔmɔi, hewalɛ ni je lɛ naa yɛ wɔnɔ, kɛ Abonsam ŋaatsɔɔi ahe lɛ? Kpee lɛ shishi wielɔ lɛ ma nɔ mi akɛ wɔbaanyɛ wɔtswa mumɔŋ hewalɛnamɔ wɔma shi ni wɔhiɛ mli kɛtsɔ wɔhiɛ ni wɔkuŋ wɔshwieŋ lɛɛ ni wɔɔlɛ wɔhe yɛ mumɔŋ kɛtsɔ nikasemɔ nɔ lɛ nɔ, kɛtsɔ kpeeyaa ni wɔkɛ wɔhe aaawo mli hu nɔ, kɛ agbɛnɛ ni wɔɔna gbɛfaŋnɔ ni yeɔ emuu yɛ shiɛmɔ nitsumɔ lɛ mli lɛ nɔ. Kɛ wɔhala gbɛi ni haŋ wɔbote oshara mli tamɔ wɔhe ni wɔɔtsi kɛaajɛ nanemɛi gbohii ahe kɛ je lɛ hiɛtserɛjiemɔi ni baa mɔ shi lɛ ahe, yɛ be mli ni wɔtsiɔ wɔhe kɛjɛɔ mɛi ni “ewieee wiemɔi ni tsaa mɔ lɛ” ahe lɛ, ebaaye ebua wɔ koni wɔna hemɔkɛyeli ni wa.​—1 Tim. 6:​3, 4; Tito 1:⁠13.

⁵ Yɛ be mli ni wɔnyiɛɔ yɛ otii ni wɔkase yɛ “Ŋwɛi Jalɛsaneyeli” Kpokpaa Wulu nɔ kpee lɛ shishi lɛ anaa lɛ, nyɛhaa wɔtswaa wɔfai shi akɛ wɔbaasusu nibii ni wɔnuɔ yɛ Kristofoi akpeei ashishi lɛ ahe jogbaŋŋ ni wɔna Nyɔŋmɔ he nilee kɛ sɛɛyoomɔ babaoo.​—2 Tim. 2:⁠7.