Obalaŋtai, Nyɛyea Odase Ni Mɔɔ Shi Yɛ Skul
1 Yehowa ni nyɛsɔmɔɔ lɛ yɛ be mli ni nyɛdarako ni eshiwoi ahe hiɛsɔɔ eyi nyɛmli obɔbɔ lɛ ji naakpɛɛ nii. (Jaj. 12:1) Obalaŋtai yɛ hegbɛ krɛdɛɛ ni ji anɔkwale lɛ ni amɛkɛ amɛ klasbii kɛ tsɔɔlɔi aaaja, ni amɛyɛ shikpɔŋkuku ni onukpai nyɛɛɛ atsu mli nii. Ani nyɛhiɛ yɛ gbɛi sɔrɔtoi babaoo ni nyɛaanyɛ nyɛtsɔ nɔ ni nyɛye odase trukaa yɛ skul lɛ nɔ?
2 Mɛni hewɔ ni ewa kɛha mɛi komɛi akɛ amɛkɛ anɔkwale lɛ aaaha mɛi krokomɛi yɛ skul lɛ? Ani eeenyɛ eba akɛ amɛmiishe nɔ ni amɛ klasbii baawie yɛ amɛhe kɛji akɛ amɛwie Nyɔŋmɔ he lɛ gbeyei? (Okɛto Marko 8:38 he.) Ekolɛ okɛ gbeyeishemɔ ni tamɔ nɛkɛ kpe beni oje shia-kɛ-shia ni okɛ sanekpakpa lɛ aaaya lɛ shishi lɛ. Shi, kɛji akɛ oyoo bɔ ni anɔkwale lɛ he hiaa obalaŋtai krokomɛi ha, kɛ agbɛnɛ gbɛnaa nii ni ka bo diɛŋtsɛ onɔ akɛ sanekpakpajajelɔ lɛ, obaatao hegbɛi koni okɛ Maŋtsɛyeli lɛ he sanekpakpa lɛ aha mɛi krokomɛi. (Mateo 9:36-38; Luka 12:8, 9) Bɔ ni afee ni odase ni oooye mɛi ni yɔɔ nyɛskul lɛ trukaa lɛ amɔ shi lɛ, ebiɔ hesaamɔ he gbɛjianɔtoo ni atsɔɔ hiɛ afeɔ yɛ ogbɛfaŋ.
Bɔ Ni Afeɔ Lɛ Ahaa
3 Shi ehe miihia moŋ ni wɔkwɛ jogbaŋŋ diɛŋtsɛ yɛ shihilɛ mli ni wɔbaje amrɔ nɛɛ lɛ hewɔ. Shi nyɛnaa wɔgbaa nyɛ nɔ ni obalaŋta ko fee yɛ be ko ni eho mli ni wo yibii babaoo. Ekaneɔ e-Bible Stories wolo lɛ yɛ skul daa gbi beni aha hejɔɔmɔ be ni yeɔ minitii 15 lɛ. Beni eklasnyo ko bi lɛ wolo lɛ he sane lɛ, gbekɛyoo nɛɛ fɔ lɛ nine akɛ ebata shi ni ekɛ lɛ fɛɛ asusu sane lɛ he. Yɛ no sɛɛ lɛ, gbekɛyoo lɛ emɛɛɛ ni afɔ nine atsɛ lɛ kɛha nikasemɔ dɔŋŋ, shi moŋ ebaa daa kɛ miishɛɛ koni amɛtsa sane lɛ nɔ. Egba enyɛ nɔ ni ekaseɔ lɛ. Nɔ ni jɛ mli ba ji akɛ enyɛ lɛ je Biblia lɛ kasemɔ shishi ni ebɔi kpeei baa yɛ Maŋtsɛyeli Asa lɛ nɔ kɛ ebiyoo fioo lɛ.
4 Ani ole Bible Stories wolo lɛ mli saji lɛ jogbaŋŋ? Oklasnyo loo tsɔɔlɔ ko baajie dɔlɛ kpo yɛ “naatsii” nɛɛ he aloo ebaabo bo kɔkɔ yɛ haomɔ ni ka Yehowa Odasefoi ahiɛ lɛ he. Obaanyɛ okɛɛ lɛ akɛ: “Miyɛ wolo ko ni tsɔɔ bɔ ni Nyɔŋmɔ baanyɛ abu etsuji anɔkwafoi ahe lɛ mli.” Yaa nɔ ni ogba lɛ nikasemɔ 79. Yɛ naagbee lɛ, obaanyɛ obi lɛ akɛ: “Ani osusuɔ akɛ Nyɔŋmɔ baahere ewebii ayiwala kɛtsɔ efɔŋfeemɔ ni eeefo sɛɛ yɛ wɔsɛɛ be mli lɛ nɔ?” Yɛ be mli ni oŋmɛ lɛ gbɛ koni etsɔɔ ejwɛŋmɔ lɛ, obaanyɛ okɛɛ, ni nikasemɔ 114 yɔɔ ojwɛŋmɔ mli akɛ: “Be kroko lɛ, kɛ oosumɔ lɛ, manyɛ matsɔɔ bo kɛjɛ miwolo ko mli bɔ ni Yehowa kpata efɔŋfeemɔ hiɛ ni ehere ewebii ayiwala lɛ.”
5 Enɛɛmɛi fɛɛ damɔ shihilɛ ni yɔɔ askul lɛ mli lɛ nɔ, aloo kɛ hegbɛ lɛ kɛ ehe ba diɛŋtsɛ lɛ, obaanyɛ ogbele Creation wolo lɛ baafa 83 mfoniri lɛ ni obi oklasnyo loo otsɔɔlɔ lɛ akɛ: “Ani osusuɔ akɛ wɔ blemabii lɛ tamɔ nɛkɛ?” Beni eha hetoo lɛ, obaanyɛ okɛ lɛ agba emli saji ni yɔɔ baafa 89, kukuji 19 kɛ 20 lɛ he sane. Abaanyɛ atee mɛi krokomɛi amiishɛɛ hu shi kɛ akɛ yitsei lɛ ahe saji ni ato naa yɛ baafa 5 lɛ tsɔɔ amɛ. Obaanyɛ odamɔ bɔ ni amɛaaha hetoo lɛ nɔ ogba amɛ saji krokomɛi ni jɛ Creation wolo lɛ mli, aloo obaanyɛ ofee gbɛ ni aaanyɛ atsɔ nɔ akase wolo lɛ he nɔkwɛmɔ nɔ kɛtsɔ kuku ko kanemɔ kɛ agbɛnɛ sanebimɔ ni yɔɔ baafa lɛ shishigbɛ lɛ bimɔ nɔ.
6 Beni obalaŋta ko ni ji shiɛlɔ bote high skul lɛ, ekɛfee oti ni ma ehiɛ akɛ ebaaje Biblia kasemɔ shishi. Eklasbii lɛ ateŋ mɔ ko kɛ efɔlɔi ena sane ni egba gbekɛyoo Odasefonyo nɛɛ nɛkɛ sane nɛɛ. Shiɛlɔ obalaŋta nɛɛ tsɔɔ lɛ ‘Obalaŋtai Biɔ Akɛ . . . ’ lɛ mli saji ni baa yɛ Awake! lɛ mli ni kɔɔ esane lɛ he pɛpɛɛpɛ lɛ. Eklasnyo lɛ na sane lɛ he miishɛɛ ni ebi saji babaoo. Kɛkɛ ni obalaŋta shiɛlɔ nɛɛ kɛ Obaanyɛ Ohi Shi Kɛya Naanɔ wolo lɛ ha lɛ, ni etsɔɔ mli kɛha lɛ akɛ enɛ baaye abua lɛ ni eha esanebimɔi lɛ ahetoo, kɛkɛ ekɛ lɛ je Biblia kasemɔ shishi.
7 Bɔ ni afee ni wɔfee odasefonyo wɔha Yehowa lɛ, esa akɛ wɔwie ehe. (Yes. 43:10-12) Ani obɔ mɔdɛŋ diɛŋtsɛ yɛ anɔkwayeli fɛɛ mli akɛ ooogba oklasbii kɛ tsɔɔlɔi ni yɔɔ skul lɛ anɔkwale lɛ he saji? Okɛ saji ni ŋɔɔ asaa ohe ni ogba amɛ. Bɔɔ enɛ feemɔ he mɔdɛŋ. Bi ofɔlɔi loo mɛi krokomɛi ni amɛye amɛbua bo. Sɔlemɔ oha Yehowa ni ejɔɔ omɔdɛŋbɔi lɛ anɔ, taakɛ bɔ ni ejɔɔ obalaŋtai shiɛlɔi krokomɛi babaoo ni ji odasefoi kɛha Yehowa ni amɛshiɛmɔ mɔ shi yɛ skul lɛ.—Kol. 1:9, 10.