Obalaŋtai Ni Aaaye Abua Amɛ Ni Amɛjo Amanehulu Naa Foi
1 Yehowa miisumɔ ni wɔna enikeenii ni jara wa ni ji wala lɛ mli ŋɔɔmɔ. Yɛ enɛ hewɔ lɛ, eha wɔ heyeli ko koni wɔnyiɛ nɔ ni wɔtsuii shweɔ lɛ asɛɛ. Shi akɛ nɔ ni fata heyeli ni wɔkɛfeɔ nii ŋmɛnɛ lɛ he lɛ, Yehowa kɛ nɔ ni wɔfeɔ lɛ he gbɛnaa nii fɔɔ wɔnɔ yɛ gbɛ ni ja nɔ.—Jaj. 11:9.
2 Akɛni wɔyeee emuu ni wɔji,eshafeelɔi hu hewɔ lɛ, te wɔɔfee tɛŋŋ wɔjo amanehulu ni aaanyɛ aba wɔnɔ yɛ gbɛ ni wɔtsɔɔ nɔ wɔkudɔɔ wɔshihilɛ wɔhaa lɛ naa foi? (Jaj. 11:10) Ani obalaŋtai ni bɛ niiashikpamɔ lɛ aaanyɛ akwa amanehulu? Yɛ miishɛɛ mli lɛ, hetoo lɛ ji hɛɛ. Yehowa le bɔ ni gbɛtsɔɔmɔ he hiaa wɔ lɛ jogbaŋŋ, ni etsɔ suɔmɔ nɔ ekɛ ŋaawoo kɛ gbɛtsɔɔmɔ eha koni ekɛye ebua obalaŋtai kɛ onukpai fɛɛ koni amɛtsɔ haomɔi ni yaa hiɛ ni eyi wɔgbii nɛɛ amli obɔ lɛ amii shweshweeshwe.—Lala 19:7; 119:9; 2 Tim. 3:1.
Fɔlɔi Agbɛnaa Nii
3 Kɛ haomɔ ko ba lɛ, fɔlɔi ni tsuɔ amɛgbɛnaa nii ahe nii he bahiaa obalaŋtai koni ‘amɛwo niji ni mli eje wui lɛ mli hewalɛ koni mɔ ni egbɔjɔ lɛ akashane shi moŋ koni atsa lɛ. (Heb. 12:12, 13) Bɔni afee ni amɛyɛ amɛbua amɛbii koni amɛnyiɛ gbɛ ni kɛ mɔ yaa wala mli lɛ nɔ lɛ, esa akɛ fɔlɔi aya nɔ ni amɛjaje amɛbii lɛ asusumɔ yɛ be kɛ bei amli. Enɛ biɔ tsuishitoo kɛ hesaa. kɛ Yehowa jɔɔmɔi babaoo.
4 Fɔlɔi nyɛŋ amɛtsi amɛbii anaa kwraa kɛjɛ subaŋi fɔji ahe. Shi te aaafee tɛŋŋ ni awaje gbekɛ lɛ jwɛŋmɔ? Kɛtsɔ ‘tsɔsemɔ ni aaatsɔse lɛ yɛ Yehowa ŋaawoo mli lɛ nɔ.’ (Efe. 6:4) Nɔ ni fata enɛɛmɛi ahe ji weku nikasemɔ, mumɔŋ kɛ jeŋba mli gbɛtsɔɔmɔ, skul sɛɛ nitsumɔi ni tswaa mɔ emaa shi, tsɔsemɔ kpakpa, kɛ fɔlɔi anɔkwɛmɔ nɔ kpakpa.
5 Wolo ni ji Questions Young People Ask—Answers That Work, ni ajie lɛ kpo yɛ “Nyɔŋmɔ Jamɔ Hetuu-kɛhamɔ” Kpokpaa Wulu nɔ kpee lɛ shishi lɛ ji wolo ko ni aje gbɛ afee koni akɛye abua obalaŋtai. Eyeɔ ebuaa fɔlɔi hu koni amɛkɛ amɛbii lɛ asusu saji ni kɔɔ tɛi ni ja ni afolɔ ashwie shi lɛ ahe. Kɛ anyɛ atɛo Nyɔŋmɔ mlai lɛ awo gbekɛ lɛ jwɛŋmɔ kɛ etsui mli jogbaŋŋ lɛ, nɛkɛ mlai nɛɛ baanyɛ atsu nii akɛ hewalɛ ni kudɔɔ lɛ. Kɛ weku lɛ susu wolo nɛɛ mli saji ahe lɛ eeewaje obalaŋtai ni amɛjo amanehulu naa foi.
6 Beni ajie Young People Ask wolo lɛ kpo lɛ, wielɔ ni wieɔ yɛ kpee lɛ shishi lɛ gbala jwɛŋmɔ kɛtee kpee lɛ shishi obalaŋtai ni amɛbua amɛhe naa lɛ anɔ ni ema sɛɛnamɔ ni yɔɔ wolo lɛ he lɛ nɔ mi. Awo fɔlɔi ahewalɛ koni amɛkɛtsu nii akɛ nɔ ni amɛbaadamɔ nɔ amɛsusu weku mli saji ahe. Kɛ akase yitso fɛɛ yitso agbe naa lɛ, ayɛ nɔ ko ni jeɔ kpo ni atsɛɔ lɛ “Questions for Discussion.” Abiii nɛkɛ saji nɛɛ koni akɛsusu kuku fɛɛ kuku ni yɔɔ wolo lɛ mli lɛ he. Sanebimɔ fɛɛ sanebimɔ tsuɔ yitso kome loo nɔ ni fe nakai ahe nii. Wekuyitsei komɛi baasumɔ ni amɛsusu sanebimɔi lɛ ahe yɛ be mli ni amɛkane yitso muu amɛgbe naa. Mɛi krokomɛi hu baasumɔ ni amɛbi saji lɛ kɛfolɔ mli yɛ be mli ni akaneɔ yitsei bibii lɛ kɛyaa lɛ.
Wolo Lɛ Eba Ghana
7 Wɔkɛ miishɛɛ miitswa adafi akɛ wolo nɛɛ eba Ghana nitsumɔ he nine lɛ. Asafoi lɛ baanyɛ ashɛ eko. Yɛ yiŋtoi komɛi ahewɔ lɛ, wɔnyɛŋ wɔkɛ nɔ ni fa amaje yɛ be kome mli. No hewɔ lɛ nyɛshɛa lɛ bibii bibii. Yɛ hei komɛi lɛ, wɔbaato gbɛjianɔ koni nyɛbakɔlɔ loo nyɛbahole nɔ ni nyɛshɛ lɛ yɛ he ni nyɛkɛ nyɛ shikai ni nyɛkɛmajea lɛ yaa lɛ. Wɔyɛ hiɛnɔkamɔ akɛ wɔbaanyɛ ni wɔkɛ nɔ ni nyɛshɛɔ lɛ fɛɛ amaje nyɛ yɛ nyɔji fioo mli koni nyɛkɛ fioo hu aha mɛi ni yɔɔ wiemɔ lɛ he miishɛɛ ni nyɛnyɛɔ nyɛkɛ nyɛhe fɔɔ amɛnɔ. Gbɛgbalɔi ajara ji ₵265 ni akɛhaa shiɛlɔi kɛ maŋbii ₵550.
8 Biblia lɛ tsɔɔ akɛ esa akɛ obalaŋtai lɛ kɛ amɛhewalɛ atsu otii ni jwɛŋmɔ yɔɔ mli ni sa lɛ ahe nii. Eka shi faŋŋ akɛ nɛkɛ wolo hee nɛɛ baagbala mɛi pii ajwɛŋmɔ kɛya nilee ni bɛ naagbee lɛ jɛɛhe—ni ji Biblia lɛ nɔ. Mɛɛ dɛŋdade ni sɛɛnamɔ yɔɔ he ni akɛkudɔɔ gbekɛbii ni amɛshihilɛ afee nɔ ni hi bianɛ ni amɛna wɔsɛɛ be ni yɔɔ shweshweeshwe po enɛ ji nɛkɛ!—Jaj. 12:1.