Wo Biblia Kaselɔi Lɛ Hewalɛ Ni Amɛya Amɛhiɛ
1 Je lɛ susuɔ hiɛyaa he, titri lɛ yɛ dadei ahe nitsumɔ loo heloonaa nibii agbɛfaŋ. Shi Yehowa webii bɛ nakai. Shi moŋ, wɔmiaa wɔhiɛ waa bɔni afee ni wɔfee mɛi ni yaa amɛhiɛ yɛ mumɔŋ. Wɔmii shɛɔ wɔhe waa akɛ wɔnine shɛɔ hewalɛwoo ni haa wɔleɔ mɛi ni yɔɔ ekaa kɛ Kristo kaselɔi ni woɔ yibii hu lɛ nɔ.—Yoh. 15:8; 2 Pet. 1:5-8.
2 Yɛ Sanekpakpai lɛ amli lɛ, akɛ wiemɔ “kaselɔ” lɛ tsuɔ nii titri, jeee yɛ mɛi ni heɔ Yesu tsɔɔmɔi lɛ amɛyeɔ lɛ pɛ agbɛfaŋ, shi moŋ yɛ mɛi ni nyiɛɔ sɛɛ kpaakpa lɛ hu ahe. (Mat. 28:19, 20) Ani Biblia kaselɔi lɛ kpɛlɛɔ anɔkwale nɛɛ nɔ? Mɛɛ gbɛ nɔ wɔɔtsɔ wɔye wɔbua amɛ ni amɛya amɛhiɛ ni amɛbatsɔmɔ kaselɔi?
Gbalamɔ Ejwɛmɔ Kɛba Gbɛjianɔto Lɛ Nɔ
3 Bɔ ni nikaselɔ lɛ yaa ehiɛ ehaa lɛ kɔɔ bɔ ni ehiɛ sɔɔ Yehowa gbɛjianɔtoo lɛ ehaa lɛ he yɛ gbɛ pɔtɛɛ nɔ. No hewɔ lɛ, gbɛnaa nii ni ka wɔnɔ akɛ tsɔɔlɔi lɛ fa ji ni wɔkudɔ nikaselɔ lɛ jwɛŋmɔ kɛba Nyɔŋmɔ gbɛjianɔtoo lɛ nɔ. Akɛ afii babaoo ewo wɔ hewalɛ ni wɔkɛ minitii enumɔ loo nyɔŋma atsu nii ni wɔkɛtsɔɔ nɔ ko ni kɔɔ gbɛjianɔtoo lɛ he lɛ mli wɔha lɛ. Wolo bibioo ni ji Yehowa Odasefoi—Miifee Nyɔŋmɔ Suɔmɔnaa Nii yɛ Jeŋ Fɛɛ lɛ kɛ gbɛ ni wɔɔtsɔ nɔ wɔtsu enɛ he nii lɛ haa. Ani o-Biblia kaselɔ lɛ yɛ eko? Kɛ ebɛ eko lɛ, kwɛmɔ ni enine ashɛ eko nɔ amrɔ nɔŋŋ. Wo lɛ hewalɛ ni ekane, koni oha enu shishi akɛ nyɛbaasusu efa bibioo ko pɛ he yɛ nikasemɔ fɛɛ nikasemɔ shishi.
4 Ato adafitswaa ni yɔɔ Yehowa Odasefoi—Miifee Nyɔŋmɔ Suɔmɔnaa Nii wolo lɛ baafai 14 kɛ 15 lɛ he gbɛjianɔ bɔni afee ni eye ebua ni ana hiɛsɔɔ aha asafoŋ kpeei sɔrɔtoi lɛ fɛɛ. Mɛni hewɔ nyɛsusuuu kuku kome loo enyɔ ko pɛ he daa otsi? Tsɔɔmɔ lɛ bɔ ni kpeei lɛ eko fɛɛ eko kɛ tsɔsemɔ kɛ gbɛtsɔɔmɔ haa bɔni afee ni etsu hiamɔ pɔtɛɛ ko he nii lɛ hu. Ye obuɔ nikaselɔ lɛ ni ena akɛ mumɔŋ dalɛ baa kɛjɛɔ “wɔhe naabuamɔ” mli. (Heb. 10:24, 25) Okɛ mlihilɛ awo lɛ hewalɛ bɔni afee ni eba kpeei. Ani mɛi heei lɛ baanyɛ amɛfata wɔhe yɛ kpeei ashishi yɛ wɔ amrɔ nɛɛ shihilɛ nɛɛ mli? Hɛɛ, amɛbaanyɛ. Yehowa gbɛjianɔtoo lɛ baaya nɔ ashwere. Abaaya nɔ atsɔɔ mɛi pii anii ni mɛi heei lɛ hu baabɔi shiɛmɔ yaa, taakɛ Mateo 28:19, 20 tsɔɔ mli faŋŋ lɛ. Kɛji amɛbaatsɔmɔ anɔkwa kaselɔi lɛ, belɛ ehe miihia ni alɛ amɛ yɛ Kristofoi akpeei ashishi. Shi dani ooofɔ mɔ ko nine kɛba kpee lɛ, esa akɛ ona nɔmimaa jogbaŋŋ akɛ eyɛ he miishɛɛ yɛ anɔkwale mli. No sɛɛ lɛ esa akɛ otsi ta otsɔɔ nyɛkuu lɛ nɔkwɛlɔ lɛ. Ekolɛ lɛ diɛŋtsɛ loo nyɛminuu kroko baanyɛ ato gbɛjianɔ bɔni afee ni ofata ohe yɛ shia Biblia mli nikasemɔ lɛ shishi koni eye ebua bo ni okɛkwɛ he ni etee ehiɛ yɛ mumɔŋ kɛyashɛ. Mɛi ni yɔɔ he miishɛɛ diɛŋtsɛ lɛ baana ekomefeemɔ kɛ suɔmɔ ni wɔnaa mli ŋɔɔmɔ akɛ Yehowa webii asafo lɛ, yɛ kpee lɛ shishi.—Lala 133:1; Yoh. 13:35.
Wo Mumɔŋ Dalɛ He Hewalɛ
5 Ehe miihia ni mɛi heei lɛ atsɔmɔ Nyɔŋmɔ Wiemɔ lɛ anɔkwa kaselɔi, mɛi ni yaa amɛhiɛ yɛ nilee, shishinumɔ, kɛ eshishitoo mlai lɛ kɛ nitsumɔ mli. Yɛ yiŋtoo nɛɛ hewɔ lɛ kɛji abaptisi nikaselɔi lɛ dani amɛgbe Obaanyɛ Ohi Shi Kɛya Naanɔ kɛ United in Worship loo Anɔkwa Toiŋjɔlɛ woji lɛ akasemɔ naa po lɛ, wɔbaaya nɔ wɔkɛ amɛ akase lolo. Kɛji nikaselɔ lɛ efeko klalo po akɛ ebaakase wolo ni ji enyɔ lɛ yɛ nyɔji pii asɛɛ po lɛ, enine baanyɛ ashɛ woji nɛɛ eko nɔ. Enɛ baatee emumɔŋ akɔnɔ shi, ni ebaakanya lɛ koni ekane nibii babaoo ni baaha ehiɛyaa lɛ aba oyayaayai lɛ hu efata he. Kɛfata he hu lɛ, esa akɛ wɔma bɔ ni ehe hiaa waa akɛ eeeshɛ Buu-Mɔɔ lɛ kɛ Awake! lɛ eko ni agbɛnɛ ena asafo lɛ woji krokomɛi lɛ hu eko bɔni afee ni ena “niyenii yɛ be ni sa mli” pɛpɛɛpɛ lɛ hu nɔ mi. (Luka 12:42) Mɛi ni feɔ nakai lɛ anaji baamɔ shi, ni ebaatswa amɛ ema shi, ni amɛbaafee shiŋŋ yɛ hemɔkɛyeli lɛ mli.—Kol. 2:7.
6 Kɛji Biblia kaselɔi baadara kɛshɛ salɛ mli ni wɔsɛɛ lɛ amɛbatsɔmɔ wɔnanemɛi Yehowa Odasefoi lɛ, belɛ wɔyelikɛbuamɔ he miihia amɛ. (Heb. 5:14) Esa akɛ wɔkɛ yijiemɔ ni sa lɛ aha amɛ bɔni afee ni ewo amɛ hewalɛ kɛha hiɛyaa. (Fil. 3:16) Ani ekɛ eweku lɛ mlibii kɛ enanemɛi lɛ hu miija nii ni ekaseɔ lɛ? Kɛji ehe esa lɛ, ani ekɛ ehe ewo Teokrase Sɔɔmɔ Skul lɛ mli? Ani eeshwe ni ebatsɔ sanekpakpa lɛ shiɛlɔ?
7 Kɛji wɔfee wɔgbɛfaŋnɔ akɛ tsɔɔlɔi lɛ, no lɛ wɔbaanyɛ wɔkpa Yehowa jɔɔmɔi babaoo gbɛ. (2 Kor. 9:6) Esaaa ni wɔhiɛ kpaa hewalɛ ni sɔlemɔ yɔɔ yɛ Biblia mli nikaselɔi ni wɔsɔleɔ wɔhaa amɛ lɛ anɔ lɛ nɔ. Bi Yehowa ni ekudɔ amɛ bɔni afee ni amɛtsu nɔ ni amɛkaseɔ lɛ he nii. (1 Kor. 3:6, 7) Eba akɛ amɛkɛ yiŋkpɛɛ aaafee amɛnii koni amɛtsɔmɔ mɛi ni kɛ amɛhe bɔɔ asafo lɛ he daa koni amɛtsɔ nakai feemɔ nɔ amɛkɛ anunyam kɛ yijiemɔ babaoo aha Yehowa gbɛi lɛ.