Sanekpakpa Lɛ Kɛhamɔ—Akɛ Shiɛlɔ Ni Yaa Shiɛmɔ Daa
1 Okwaafonyo yaa eŋmɔ mli daa ni eyatsuɔ nii. Shi mɛni baaba kɛji akɛ eyaaa daa lɛ? Akɛ Nyɔŋmɔ “hefatalɔi nitsulɔi” yɛ ejeŋ muu fɛɛ mɔ lɛ mli lɛ, eba akɛ wɔ fɛɛ wɔɔfee mɛi ni yaa shiɛmɔ daa, ‘koni wɔshiɛ Yehowa duromɔ afi lɛ kɛ wɔ-Nyɔŋmɔ lɛ oweletɔɔ gbi lɛ.’—Yes. 61:2; 1 Kor. 3:9.
2 Yehowa Nyɔŋmɔ ji Sanekpakpa Shiɛlɔ kpele fe fɛɛ. (1 Mose 3:15) Etee nɔ ebɔ Israel maŋ lɛ kɔkɔ daa ni ekudɔ amɛ hu kɛtsɔ egbalɔi lɛ anɔ. Taakɛ Yehowa kɛɛ lɛ: “Miwieɔ mitsɔɔ nyɛ, miteɔ shi leebi maŋkpa miwieɔ daa.” (Yer. 7:13, 25) Ani wɔ hu wɔjajeɔ Yehowa shɛɛ sane kɛha wɔgbii nɛɛ lɛ daa, taakɛ blema gbalɔi lɛ fee lɛ?
3 Akɛ Yesu Kristo yaa shiɛmɔ daa ni ena nɛkɛ esɔɔmɔ nitsumɔ lɛ mli fa nɛɛ mli miishɛɛ lɛ jeɔ kpo faŋŋ yɛ edaseyeli wiemɔ ni yɔɔ Yohane 4:34 lɛ mli. Bɔfoi lɛ hu fee nɔkwɛmɔ nɔ fɛfɛo yɛ shiɛmɔ ni amɛyaa daa lɛ mli. Beni amɛhenyɛlɔi lɛ te shi wo amɛ waa po lɛ, amɛtee nɔ amɛshiɛ daa gbi. Yɛ anɔkwale mli lɛ, beni ayi amɛ kɛ kplebi lɛ sɛɛ ni “amɛwo amɛ kita ni amɛkawie yɛ Yesu gbɛi anɔ” lɛ, sane ni yɔɔ Bɔfoi lɛ Asaji 5:42 lɛ kɛɔ akɛ “amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we lɛ kɛ shiai be fɛɛ be.” (Bɔfoi 5:40) Yɛ bɔfoi lɛ anɔkwɛmɔ nɔ nɛɛ hewɔ lɛ, ani esa akɛ Yehowa Odasefonyo ko afee mɔ ni eyaaa shiɛmɔ daa aloo mɔ ni ekpa shiɛmɔyaa yɛ amrɔ nɛɛ naatsii ni akɛba wɔnɔ lɛ hewɔ?
Bɔ Ni Yehowa Kwɛɔ Wala Ehaa
4 Ehe miihia ni wɔbu wala yɛ bɔ ni Yehowa kwɛɔ lɛ ehaa lɛ naa. Eyɛ krɔŋŋ ni no hewɔ lɛ ejara wa. (Yoh. 3:16; Eze. 33:11) Bɔ ni ekwɛɔ lɛ ehaa nɛɛ kanyaa wɔ ni wɔkɛ wɔhe woɔ shiɛmɔ mli daa.
5 Ani Yesu ekɛɛɛ akɛ “miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai-nɛɛhu kɛ nɛɛhu ni tsuitsakemɔ ehiaaa amɛ lɛ”? (Luka 15:7) Shi te aaafee tɛŋŋ ni adesai aje lɛ aaanu Nyɔŋmɔ Wiemɔ ni kɛ tsuitsakemɔ baa lɛ “kɛ shiɛlɔ ko bɛ lɛ”? (Rom. 10:14) Kɛ wɔhiɛ sɔ bɔ ni Yehowa susuɔ wala he ehaa lɛ, ni wɔbu hegbɛ ni wɔna akɛ wɔɔjaje Yehowa yiŋtoi lɛ akɛ nɔ ko ni jara wa, kɛ nɔ ni wɔjɛɔ suɔmɔ ni wɔyɔɔ kɛha Yehowa kɛ wɔnaanyo gbɔmɔ lɛ mli wɔtsuɔ lɛ, no lɛ wɔbaafee mɛi ni shiɛɔ sanekpakpa lɛ kɛ ekaa.
Nɔ Hewɔ Ni Mɛi Komɛi Eyaaa Shiɛmɔ Daa Lɛ
6 Yiŋtoi ahewɔ ni mɛi komɛi eyaaa shiɛmɔ daa lɛ fa babaoo ni eyɛ sɔrɔtoi sɔrɔtoi. Shi nɔ fɛɛ nɔ hewɔ ni mɛi lɛ eyaaa shiɛmɔ daa lɛ, mɛi ni eyaaa shiɛmɔ daa lɛ diɛŋtsɛ le jogbaŋŋ. Mɛi fɛɛ ni yɔɔ Yehowa sɔɔmɔ mli lɛ kpɛlɛɔ nɔ jogbaŋŋ akɛ gbɛtsii nii ni haaa aya shiɛmɔ daa lɛ jeee nɔ ni anyɛŋ nɔ kunim aye.—Fil. 4:13.
7 Kɛji ofa gbɛ kɛshi nyɛshikpɔŋkuku lɛ mli lɛ, yɛ bei babaoo mli lɛ, ewaaa akɛ oootao nyɛmimɛi lɛ asɛɛ gbɛ, koni okɛ amɛ afee ekome kɛna shiɛmɔ nitsumɔ lɛ mli miishɛɛ. Kɛji oleee mɔ ko yɛ jɛmɛ aloo Odasefonyo ko bɛ jɛmɛ lɛ, mɛni hewɔ okɛ shishitoo mlai ni akɛha yɛ trukaa odaseyeli he taakɛ atsɔɔ mli yɛ sane ni ji “Bo hu, Obaanyɛ Oye Omanye yɛ Trukaa Odaseyeli Mli” yɛ wolo nɛɛ mli nɔ ni je kpo yɛ June mli lɛ tsuuu nii? Abaanyɛ ana ŋaawoi krokomɛi ni anyɛɔ atsuɔ he nii yɛ Volume 33, 7 lɛ mli, yɛ sane ni ji “Shiɛmɔ Wiemɔ lɛ Yɛ Shia kɛ Shia” lɛ mli.
8 Kɛji obɛ hewalɛ lɛ, eka shi faŋŋ akɛ nanemɛi kɛ wekumɛi baaba amɛbasara bo. Mɛni hewɔ okɛ amɛ ejaaa Mesia Maŋtsɛyeli lɛ mli jɔɔmɔi lɛ? Yɛ nakai gbɛ nɔ nɔŋŋ lɛ, kɛji ofɔ etsɛko hu lɛ, wekumɛi kɛ nanemɛi baaba oŋɔɔ ni amɛkɛ bo abana miishɛɛ yɛ abifao ni ofɔ lɛ shweshweeshwe lɛ hewɔ. Yɛ bei babaoo mli lɛ, efɔɔ kaa akɛ nɛkɛ saralɔi nɛɛ jieɔ Nyɔŋmɔ yi babaoo yɛ emlihilɛ kɛ edebɔɔ mli naakpɛɛ nii lɛ ahewɔ. Enɛ haa ejaa gbɛ jogbaŋŋ akɛ ooogbala amɛjwɛŋmɔ kɛba Biblia lɛ nɔ koni okɛ amɛ agba otii tamɔ bɔ ni ehe hiaa ni asɔmɔ Nyɔŋmɔ, ni afee esuɔmɔnaa nii, kɛ gbɛtsɔɔmɔ ni Biblia kɛhaa yɛ gbekɛbii atsɔsemɔ he kɛ bɔ ni aaafee ana miishɛɛ yɛ weku lɛ mli kɛ nibii krokomɛi lɛ ahe sane. Kɛtsɔ enɛ nɔ lɛ, obaanyɛ oto gbɛjianɔ bɔni afee ni nyɛsanegbaa lɛ atsa nɔ daa. Kɛfata he hu lɛ, mɛi komɛi toɔ gbɛjianɔ bɔni afee ni amɛ Biblia mli nikaselɔi lɛ abasara amɛ kɛha amɛ daa otsi Biblia nikasemɔ.
9 Kɛha onukpai kɛ asafoŋ sɔɔlɔi fɛɛ, titri lɛ kui lɛ ahiɛnyiɛlɔi lɛ, nyɛ yelikɛbuamɔ he miihia nyɛkuu lɛ. Esa akɛ ona kuu lɛ mlibii aŋkroaŋkroi lɛ fɛɛ ahe miishɛɛ bɔni afee ni onyɛ okwɛ akɛ amɛkɛ amɛhe woɔ shiɛmɔ nitsumɔ lɛ mli daa lo, ni enɛ baaha amɛmiishɛɛ lɛ aya hiɛ yɛ sɔɔmɔ krɔŋŋ lɛ mli.
10 Kɛha mɛi krokomɛi fɛɛ lɛ, ŋaawoo lɛ sa jogbaŋŋ: “Nyɛmɔdɛŋbɔɔ lɛ naa akɛbaa shi; nyɛmumɔ lɛ he adɔa la; nyɛsɔmɔa Nuŋtsɔ[Yehowa]lɛ.”—Rom. 12:11.