Nyɛkɛ Tsuishiŋmɛɛ Ayaa Nɔ Awoa Yibii Babaoo
1 Beni bɔfo Paulo ŋmaa wolo eyaha asafo ni yɔɔ Kolose, yɛ nɔ ni shɛɛɛ afii 30 yɛ Yesu gbele kɛ eshitee kɛjɛ gbohii ateŋ lɛ sɛɛ lɛ, no mli lɛ ebaanyɛ ekɛɛ akɛ sanekpakpa lɛ mli anɔkwale lɛ miiwo yibii ni eeshwere yɛ je lɛŋ fɛɛ. (Kol. 1:5, 6) Ŋmɛnɛ, Yehowa Odasefoi lɛ kɛ Maŋtsɛyeli lɛ he sanekpakpa lɛ eshɛ “shikpɔŋ lɛ naagbee hei lɛ” diɛŋtsɛ yɛ gbɛ ni mli lɛɛ nɔ. (Bɔfoi 1:8; Yoh. 14:12) Yɛ 1989 sɔɔmɔ afi lɛ mli lɛ, ana oha mlijaa 5.6 nɔyaa yɛ Maŋtsɛyeli shiɛlɔi ni yɔɔ jeŋ fɛɛ lɛ mli, ni wɔyifalɛ yashɛ nɔ ni fe fɛɛ ni ji shiɛlɔi 3,787,188 yɛ maji 212 mli!
2 Yɛ maji ni atsi Nyɔŋmɔ Maŋtsɛyeli lɛ shiɛmɔ lɛ naa ni no hewɔ lɛ akɔntaabuu lɛ shɛɛɛ po lɛ amli lɛ, abɔ nɔyaa fe nakai ni ji oha mlijaa 7.6 he amaniɛ! Yɛ naagbai babaoo ni yɔɔ nakai maji lɛ amli lɛ fɛɛ sɛɛ lɛ, shiɛlɔi lɛ yaa nɔ “amɛkɛ tsuishiŋmɛɛ woɔ yibii.” (Luka 8:15) Yɛ hei lɛ ekomɛi lɛ, nɔnyɛɛ lɛ naa eba shi fioo, shi jaramɔ shihilɛi lɛ ka he ni etsakeee yɛ maji krokomɛi amli.
3 Wɔkɛ naagbai sɔrɔtoi hu kpeɔ yɛ maji ni wɔyɔɔ heyeli babaoo ni wɔkɛaatsu Maŋtsɛyeli-shiɛmɔ lɛ yɛ mli lɛ hu amli. Wɔkɛ mɛi ni jeee amɛhe sane ko ni amɛbooo wiemɔ lɛ toi lɛ kpeɔ, titri lɛ yɛ hei ni ayɔɔ heloonaa nii babaoo yɛ lɛ. Esa akɛ Yehowa tsuji ahiɛ ahi amɛhe nɔ bɔni afee ni amɛkakɔ sui ni tamɔ nɛkɛ. Wɔsumɔɔɔ ni heloonaa nibii, miishɛjemɔ nibii, kɛ hiɛtserɛjiemɔi, kɛ nibii krokomɛi ni gbalaa mɔ jwɛŋmɔ lɛ atsi wɔ teokrase nitsumɔi lɛ anaa. Kɛ jeee nakai lɛ, eeeha wɔfee mɛi ni nɔ ko jeee amɛhe sane ko aloo mɛi ni hiɛ esɔɔɔ hiamɔ ni ehe hiaa akɛ wɔɔya nɔ wɔkɛ tsuishiŋmɛɛ awo yibii lɛ.—Luka 21:34-36.
Tsuishiŋmɛɛ Kɛ Hiɛmiamɔ He Miihia
4 Tsuishiŋmɛɛ ji taomɔ nii ko ni he hiaa, ni ekɔɔɔ he ko kɛji akɛ wɔkɛ shitee-kɛ-woo miikpe yɛ sanekpakpa lɛ he aloo wɔyɛ heyeli bɔ ni sa ni wɔkɛaatsu wɔ Kristofoi agbɛnaa nii lɛ ahe nii. Yɛ maji komɛi anɔ lɛ, wɔnyɛmimɛi lɛ kɛ afii nyɔŋmai abɔ etsu nii yɛ jaramɔ shihilɛi amli. Amɛtsuishiŋmɛɛ yɛ nɛkɛ jaramɔ shihilɛi nɛɛ amli lɛ kɛ nɔkpɛlɛmɔ shihilɛ eba, ni amrɔ nɛɛ amɛmiikpa jɔɔmɔi babaoo diɛŋtsɛ. (Rom. 5:3-5; Gal. 6:9) Wɔbaasumɔ ni wɔya nɔ wɔŋmɛ wɔtsui shi yɛ shihilɛ fɛɛ shihilɛ ni wɔkɛbaakpe lɛ mli. Esa akɛ akɛ Maŋtsɛyeli lɛ he odaseyeli lɛ aha, ni esa akɛ wɔteŋ mɔ fɛɛ mɔ aya nɔ ajie emuuyeli mli ni wɔhiɛɔ lɛ kpo. Kɛ wɔŋmɛ wɔtsui shi lɛ, no lɛ wɔɔbaa wɔsusuma loo wɔwala yi.—Marko 13:10; Luka 21:19.
5 Wɔbaanyɛ wɔfee bɔ ni wɔŋɔɔɔ mumɔŋ nibii akɛ nibii ni yɔɔ flɛflɛ lɛ he nɔkwɛmɔ nɔ kɛtsɔ wɔhiɛ ni wɔɔmia waa yɛ Yehowa sɔɔmɔ mli, ni etɔɔɔ wɔ yɛ shiɛmɔ nitsumɔ lɛ mli lɛ nɔ. Yɛ maji komɛi anɔ, yɛ hei ni anaaa tsɔnei ni akɛfaa gbɛ, ni heloonaa nibii ni he hiaa lɛ eko bɛ jɛmɛ, ni shika gbɛfaŋ naagbai babaoo yɔɔ jɛmɛ lɛ amli po lɛ, akpaaa shiɛmɔ nitsumɔ lɛ yɛ jɛmɛ. Yɛ maji nɛɛ mli fioo mli lɛ, kɛ aja mli lɛ asafoŋ shiɛlɔi kɛ ŋmɛlɛtswai aaafee 14 kɛmiimɔ 17 tsuɔ nii yɛ shiɛmɔ mli yɛ daa nyɔŋ nɔ. Amɛgbɛgbalɔi ayibɔ lɛ hu miiya hiɛ kɛmiitsara nɔ. Ehaa wɔteŋ mɛi ni yɔɔ heloonaa nibii amli hejɔlɛ fioo lɛ waa ni wɔsusuɔ enɛ he. Ani wɔbaanyɛ wɔha wɔhe ni wɔkɛwoɔ Maŋtsɛyeli-shiɛmɔ kɛ kaselɔi-afeemɔ nitsumɔ ni he hiaa waa nɛɛ mli daa lɛ aya hiɛ?
Ani Wɔbaanyɛ Wɔfee Babaoo?
6 Kɛji wɔɔye be babaoo yɛ shiɛmɔ nitsumɔ lɛ mli lɛ, no lɛ ekolɛ ebaabi ni wɔfee tsakemɔi bibii komɛi yɛ wɔgbɛjianɔtoo mli. Kɛji ŋmɛlɛtswaa kome pɛ wɔyeɔ yɛ shiɛmɔ nitsumɔ lɛ mli yɛ Hɔgbaa lɛ, ani ekolɛ wɔɔha nakai be lɛ afa fioo kɛtsɔ ŋmɛlɛtswaa kroko hu ni wɔɔye ni wɔkɛya sɛɛsaramɔi aloo ni wɔkɛfee Biblia mli nikasemɔi lɛ nɔ? Aloo kɛji wɔfeɔ Biblia mli nikasemɔ ko lɛ, ani wɔɔye ŋmɛlɛtswaa kome loo nɔ ni wɔkɛya shia-kɛ-shia shiɛmɔ aloo ni wɔkɛya sɛɛsaramɔi dani wɔyafee wɔ-Biblia mli nikasemɔ lɛ? Yɛ be mli ni wɔkɛ ŋmɛlɛtswaa enyɔ etsu nii yɛ woji tɛtrɛbii ahamɔ mli yɛ Hɔɔ lɛ sɛɛ lɛ, ekolɛ wɔbaanyɛ wɔkɛ woji tɛtrɛbii lɛ aha mɛi ni heɔ eko daa lɛ aloo wɔɔbɔ mɔdɛŋ ni wɔya sɛɛsaramɔi fioo ko. Mɛi ni yɔɔ maji wuji amli lɛ baana akɛ ehi kɛha amɛ akɛ amɛaaye be fioo ko yɛ gbɛjegbɛi anɔ odaseyeli mli. Kɛ wɔtsɔ nɛkɛ gbɛi nɛɛ loo gbɛi krokomɛi anɔ lɛ, no lɛ wɔɔnyɛ wɔha bɔ ni wɔkɛ wɔhe woɔ shiɛmɔ nitsumɔ lɛ mli lɛ aya hiɛ. Yibiiwoo kpakpai ni baajɛ mli aba lɛ hu baaya hiɛ nakai nɔŋŋ.
7 Ŋwanejee ko bɛ he akɛ nɔ ni baajɛ bei babaoo ni wɔɔye yɛ shiɛmɔ nitsumɔ lɛ mli ni wɔkɛya sɛɛsaramɔi lɛ amli aba ji Biblia mli nikasemɔi babaoo ni wɔɔfee. Yɛ be ni sa mli lɛ, enɛ baatsɔɔ mɛi pii ni baaba anɔkwale lɛ mli koni amɛbaye amɛbua wɔ ni wɔkɛgbe Maŋtsɛyeli-shiɛmɔ nitsumɔ lɛ naa kwraa.—Mat. 28:19, 20.
Sɔlemɔ He Miihia
8 Kɛji wɔɔya nɔ wɔkɛ tsuishiŋmɛɛ awo yibii lɛ, belɛ esa akɛ wɔtao Yehowa jɔɔmɔi asɛɛ gbɛ ni wɔŋmɛɛ wɔhe wɔha gbɛtsɔɔmɔ ni emumɔ lɛ kɛhaa lɛ. Esa akɛ wɔsɔle wɔha Yehowa yɛ wɔsɔɔmɔ nitsumɔ lɛ hewɔ. Kɛji wɔmiisɔle wɔmiiha Yehowa yɛ wɔ shiɛmɔ nitsumɔ lɛ hewɔ lɛ, akai wɔ akɛ ehefatalɔi nitsulɔi ji wɔ. (1 Kor. 3:9) Kɛ wɔna Yehowa yelikɛbuamɔ lɛ, wɔbaanyɛ wɔŋmɛ wɔtsui shi yɛ wɔsɔɔmɔ lɛ mli kɛji ebalɛ akɛ wɔnaaa yibiiwoo ko kɛjɛɛɛ mli amrɔ nɔŋŋ po lɛ. Yɛ hei komɛi lɛ, nɔyaa baa yɛ afii babaoo ni Maŋtsɛyeli jajelɔi lɛ kɛŋmɛɔ amɛtsui shi yɛ anɔkwayeli mli lɛ sɛɛ. Yɛ be mli ni wɔkwɛɔ wɔsɛɛ be gbɛ lɛ, ehe miihia ni wɔtao Nyɔŋmɔ gbɛtsɔɔmɔ kɛ eyelikɛbuamɔ sɛɛ gbɛ daa bɔni afee ni wɔnijiaŋ akaje wui, shi mɔŋ wɔnyɛ wɔgbe wɔsɔɔmɔ lɛ naa kwraa. (2 Tim. 4:5) Yibiiwoo babaoo miijɛ Maŋtsɛyeli-shiɛmɔ kɛ kaselɔi-afeemɔ nitsumɔ lɛ mli kɛmiiba lolo.
9 Yesu ma bɔ ni ehe hiaa ni wɔsɔle be fɛɛ be lɛ nɔ mi. (Luka 18:1) Paulo woɔ ŋaa akɛ: “Nyɛsɔlea ni nyɛkafɔa.” (1 Tes. 5:17) Wɔyɛ yiŋtoi ni he hiaa waa ni wɔɔdamɔ nɔ wɔya nɔ yɛ sɔlemɔ mli babaoo amrɔ nɛɛ. Gbɛnaa nii babaoo fata tookuu ni yi faa daa afi lɛ akwɛmɔ he. Wɔmiitao ni wɔye wɔbua mɛi krokomɛi ni amɛkɛ tsuishiŋmɛɛ awo yibii. Esa akɛ wɔjwɛŋmɔ ahi shiɛlɔi aŋkroaŋkroi lɛ fɛɛ ahiamɔ nii sɔrɔtoi lɛ anɔ kɛ agbɛnɛ gbɛjianɔtoo muu lɛ fɛɛ hu. Akɛni wɔnaa akɛ ehe miihia ni wɔye too ni wɔkɛfi nitsumɔ lɛ sɛɛ koni eha Biblia mli woji ni akalaa lɛ aya nɔ hewɔ lɛ, wɔbaasumɔ ni wɔsɔle koni Yehowa aya nɔ akanya gbɔmɛi ni sheɔ Nyɔŋmɔ gbeyei lɛ bɔni afee ni amɛnine akpɔ yɛ enɛ gbɛfaŋ.—2 Kor. 9:8-11.
10 Yɛ be mli ni jeŋ muu fɛɛ ŋmɔ lɛ afai komɛi amli gbeleɔ kɛhaa teokrase nɔyaa babaoo fe bei fɛɛ ni eho da lɛ, ehaa Ŋmalɛ naa ŋaawoo ni yɔɔ Kolosebii 4:2 lɛ bafeɔ nɔ ni shishinumɔ yɔɔ mli babaoo: “Nyɛkaa sɔlemɔ he, ni nyɛshia kpe yɛ mli kɛ shidaa.” Esa akɛ wɔsɔle yɛ wɔnyɛmimɛi ni yɔɔ he fɛɛ he lɛ ahewɔ koni amɛya nɔ amɛwo yibii, ni amɛye amɛbua mɛi krokomɛi ni tamɔ gwantɛŋi ni amɛkɛkpeɔ yɛ shikpɔŋkukuji ni tsutsu ko lɛ odaseyeli wa waa yɛ mli lɛ hu.
Jiemɔ Shidaa Kpo
11 Kwɛ bɔ ni wɔdaa shi babaoo yɛ mumɔŋ nibii babaoo ni wɔnaa mli ŋɔɔmɔ lɛ hewɔ! Wɔmiisumɔ ni wɔda Yehowa shi yɛ enɛ hewɔ, ni wɔyaa nɔ wɔsɔleɔ hu koni ejɔɔmɔ ahi tsulɔ anɔkwafo lɛ kɛ e-Nɔyeli Kuu lɛ anitsumɔ lɛ hu nɔ. Wɔhiɛ sɔɔ heshibaa mli ni amɛjɛɔ amɛtsuɔ nii yɛ wɔgbɛfaŋ kɛ mɛi krokomɛi ni tamɔ gwantɛŋi ni yɔɔ jeŋ fɛɛ lɛ hu agbɛfaŋ ni etɔɔɔ amɛ lɛ jogbaŋŋ diɛŋtsɛ.
12 Akɛ woji babaoo diɛŋtsɛ eha, yɛ be mli ni aduɔ Maŋtsɛyeli dumɔwui lɛ. (Mat. 13:3-8, 18-23) Shi kɛlɛ, mɛi pii miitao Bibliai kɛ Biblia kasemɔ he woji lolo yɛ shiɛmɔ lɛ mli. Jeŋ fɛɛ akɔntaabuu lɛ tsɔɔ akɛ adu nii babaoo diɛŋtsɛ ni ashwie nɔ nu hu kɛtsɔ sɛɛsaramɔi kɛ shia Biblia mli nikasemɔi ni afeɔ lɛ anɔ. Yɛ be mli ni wɔyaa nɔ wɔtsuɔ wɔgbɛfaŋnɔ yɛ wɔsɔɔmɔ nitsumɔ lɛ mli fai ni he hiaa nɛɛ amli lɛ, wɔmiida Yehowa shi hu yɛ ejɔɔmɔi babaoo ni haa nibii kwɛɔ lɛ hewɔ. Lɛlɛŋ, wɔsɔleɔ kɛhaa nakai jɔɔmɔ lɛ.—1 Kor. 3:6, 7.
Hiamɔ Nibii Krokomɛi
13 Akɛni wɔyɛ je lɛ mli ni kɛlɛ wɔjeee je lɛ fa hewɔ lɛ, Kristofoi baaya nɔ amɛkɛ kaai kɛ amanehului akpe, ni enɛɛmɛi amli baawo wu po yɛ nɛkɛ naagbee gbii nɛɛ amli. Amrɔ nɛɛ mɛi komɛi miiŋmɛ amɛtsui shi yɛ yiwai loo jaramɔ shihilɛi krokomɛi amli. Mɛi krokomɛi hu esa akɛ amɛya nɔ amɛtsu Kristofoi anitsumɔi lɛ yɛ maji ni aawuu tai yɛ mli lɛ amli. Wɔnyɛmimɛi lɛ kɛ osharai ekpe, tamɔ shikpɔŋhosomɔi, ahum, kɛ lasuogbele nɛkɛ. Kɛ nibii ni tamɔ nɛkɛ ba lɛ, esa akɛ wɔsɔle wɔha wɔnyɛmimɛi ni yɔɔ nɛkɛ hei nɛɛ lɛ. (Okɛto Bɔfɔi lɛ Asaji 12:5; 2 Korintobii 1:11 he.) Bei komɛi hu lɛ ehe bahiaa ni wɔyana maŋ onukpai lɛ aloo wɔŋma amɛ woji yɛ wɔnitsumɔ lɛ ni amɛguɔ, loo yiwaa ni amɛkɛbaa wɔnyɛmimɛi lɛ anɔ lɛ, loo saji krokomɛi ni saa Maŋtsɛyeli nibii ahe lɛ ahewɔ. Yɛ shihilɛi ni tamɔ nɛkɛ mli lɛ, wɔfeɔ bɔ ni wɔɔnyɛ wɔ diɛŋtsɛ, ni wɔsɔleɔ yɛ nɛkɛ gbɔmɛi aŋkroaŋkroi nɛɛ ahewɔ bɔni afee ni amɛna wɔnanemɛi sɔɔlɔi lɛ ahe jwɛŋmɔ kpakpa.—1 Tim. 2:1, 2.
14 Akɛ nɔnyɛɛ babaoo baa wekui ni yɔɔ Satan yiwalɛ jeŋ nɛɛ mli lɛ hu anɔ. (2 Kor. 4:4) Gbalashihilɛ mli hefatalɔi hu nyɛɔ amɛkɛ naagbai ni mli wawai kpeɔ. Esa akɛ awo amɛ hewalɛ ni amɛsɔle kɛha Nyɔŋmɔ gbɛtsɔɔmɔ, ni wɔ hu wɔbaanyɛ wɔsɔle yɛ amɛ gbɛfaŋ. (1 Kor. 7:5; 1 Pet. 3:7) Esa akɛ weku yitsei lɛ aha ahi amɛjwɛŋmɔ mli akɛ Yehowa baabo sɔlemɔi ni amɛsɔleɔ yɛ anɔkwayeli mli kɛha gbɛtsɔɔmɔ bɔni afee ni amɛnyɛ amɛye amɛwei anɔ jogbaŋŋ lɛ toi. (Koj. 13:8; Fil. 4:6, 7) Obalaŋtai kɛ onukpai fɛɛ kɛ shihilɛi ni mli wawai kpeɔ. Ekolɛ enɛ baanyɛ aba yɛ skul, yɛ heloonaa nitsumɔ he, yɛ be mli ni ofaa gbɛ, aloo yɛ shihilɛi krokomɛi amli. Sɔlemɔ yeɔ ebuaa wɔ bɔni afee ni wɔte shi wɔshi yiwalɛ je nɛŋ mumɔ lɛ koni wɔya nɔ wɔwo yibii yɛ be mli ni wɔyaa nɔ wɔfeɔ nɔ ni ja gbɛ yɛ Nyɔŋmɔ hiɛ lɛ.—Mat. 6:13; Efe. 6:13-18; 1 Yoh. 3:22.
15 Yehowa ji sɔlemɔi a-Toibolɔ kpeteŋkpele lɛ. (Lala 65:3) Ehe miihia ni wɔshɛrɛ wɔ yeyeeyefeemɔi lɛ wɔshwie enɔ be fɛɛ be. (Lala 55:22) Wɔyɛ hegbɛi ni wɔkɛaatsɔɔ akɛ Maŋtsɛyeli lɛ he nibii fɛɛ kɛ wɔnyɛmimɛi ni yɔɔ hei fɛɛ lɛ ahe saji kɔɔ wɔhe kɛtsɔ sɔlemɔ ni wɔɔsɔle yɛ amɛhe lɛ nɔ. Kɛji wɔmiisusu mɛi ni nyiɛɔ hiɛ yɛ asafo lɛ mli lɛ kɛ mɛi ni kudɔɔ jeŋ muu fɛɛ shweremɔ gbɛjianɔtoo lɛ anitsumɔ he, kɛ be mli ni wɔtsuɔ mɛi ni he yeɔ yɛ mumɔŋ lɛ ahe nii, aloo yɛ be mli ni wɔtsuɔ naagbai krokomɛi ni ji naagbai wuji loo bibii ahe nii lɛ, esa akɛ wɔteŋ mɔ fɛɛ mɔ kɛ saji nɛɛ ashwie Yehowa hiɛ yɛ sɔlemɔ mli. (1 Tes. 5:25; Yak. 5:14-16) Hɛɛ, esa akɛ wɔshɛrɛ wɔ yeyeeye-feemɔi lɛ wɔshwie Yehowa nɔ kɛ hiɛnɔkamɔ fɛɛ akɛ nɔ fɛɛ nɔ ni wɔɔbi ni kɛ esuɔmɔnaa nii kpaa gbee lɛ, ebaabo wɔ toi. (1 Pet. 5:7; 1 Yoh. 5:14) Eba akɛ wɔɔfee ekaa yɛ Maŋtsɛyeli sɔɔmɔ lɛ mli ni wɔya nɔ wɔkwɛ Yehowa gbɛ ni eye ebua wɔ ni wɔya nɔ wɔkɛ tsuishiŋmɛɛ awo yibii.