Ani Obii Esaa Amɛhe ni Amɛbaaku Amɛsɛɛ Amɛya Skul?
1 Eshwɛ otsii fioo ko pɛ ni Kristofoi obalaŋtai ni ji skulbii baaku amɛsɛɛ amɛya skul. Ekolɛ enɛ kɛ miishɛɛ ko loo ehe miishɛɛ ni anaa tsɔ hu baaba. Nɛkɛ mligbɛ henumɔi nɛɛ jɛ hegbɛi kɛ kaai ni akpaa gbɛ akɛ akɛbaakpe. Obalaŋtai lɛ komɛi kɛ klasbii kɛ tsɔɔlɔi heei baakpe. Kristofoi obalaŋtai nɛɛ hu yɔseɔ akɛ nɔ ni fataa skul afi hee fɛɛ hee he baa ji amɛhemɔkɛyeli, emuuyeli kɛ suɔmɔ ni amɛyɔɔ kɛha Yehowa lɛ hɛ kaai. Ani nyɛ obalaŋtai ni yɔɔ osafo lɛ mli lɛ esaa amɛhe ni amɛbaku amɛsɛɛ amɛya skul? Te nyɛ ni ji fɔlɔi le aaafee tɛŋŋ ni nyɛwaje nyɛbii lɛ kɛha nɛkɛ kaai ni jwere amɛhiɛ nɛɛ?
NYƐKƐ SKUL WOLO BIBIOO LƐ ATSUA NII
2 Akɛ Skul wolo bibioo lɛ ha yɛ 1983 mli titri lɛ kɛha fɔlɔi ni ji Kristofoi kɛ amɛbii ni yaa skul lɛ. Afee wolo lɛ koni akɛha tsɔɔlɔi kɛ skul nɔkwɛlɔi ale Yehowa Odasefoi ahemɔkɛyelii kɛ nifeemɔi yɛ skul nifeemɔi komɛi ahe lɛ mli faŋŋ. Ekɛ gbɛtsɔɔmɔ hu haa yɛ Yehowa Odasefoi ashidaamɔ yɛ ekomefeemɔ mli yɛ jeŋba he.
3 Nɛkɛ wolo bibioo nɛɛ efee hebuu nɔ diɛŋtsɛ kɛha obalaŋtai babaoo. Akɛ nɔkwɛmɔ nɔ lɛ, Odasefonyo ko ni ji fɔlɔ ni yɔɔ maŋ ko mli lɛ nu akɛ gbɔmɛi ni ele amɛ akɛ amɛbɛ jeŋba baaha nuu kɛ yoo teŋ bɔlɛnamɔ loo tsɔsemɔ he wiemɔi amɛha nikaselɔi lɛ. Akɛni fɔlɔ lɛ hiɛ wolo lɛ hewɔ lɛ, enyɛ edamɔ Ŋmalɛi lɛ anɔ etsɔɔ nɔ hewɔ ni esumɔɔɔ enɛ lɛ mli ni enyɛ eha afee tsakemɔi ni sa yɛ ebiyoo lɛ klass lɛ.
4 Dani skul aaaje shishi lɛ, fɔlɔi baanyɛ amɛwaje amɛbii lɛ ajwɛŋmɔi kɛ tsuii kɛtsɔ be ni amɛaana ni amɛkɛkai amɛ wolo bibioo lɛ mli saji lɛ nɔ. Akɛni fɔlɔi susuɔ afii sɔrɔtoi ni gbekɛbii lɛ eye, klass kɛ skul lɛ he hewɔ lɛ, amɛbaanyɛ amɛhala nibii ni hi ni yɔɔ wolo bibioo lɛ mli ni baye ebua amɛ yɛ nii lɛ mli. (Abɛi 14:15; 22:3) Okɛ obi lɛ ati shihilɛi ni ekɛbaakpe lɛ mli, ni ofee gbɛ ni eeetsɔ nɔ ni wolo nɛɛ mli saji lɛ ahe baaba sɛɛnamɔ aha lɛ ‘yɛ enaji famɔi ajajemɔ mli lɛ he nɔkwɛmɔ nɔ. (Heb. 12:13) Maa anɔkwayeli kɛ bule yɛ skul lɛ nɔ mi oha gbekɛbii lɛ. (Kwɛmɔ 1990 Yearbook lɛ baafai 57, 58.)
5 Fɔlɔi baanyɛ afee babaoo ni amɛkɛye amɛbua amɛbii lɛ ni “amɛna hetoo amɛha mɔ fɛɛ mɔ” ni biɔ amɛ saji yɛ amɛ diɛŋtsɛ amɛsusumɔi kɛ hiɛnɔkamɔi ahe lɛ. (1 Pet. 3:15) Hei komɛi yɛ ni fɔlɔi lɛ diɛŋtsɛ baasumɔ ni amɛkɛ tsɔɔlɔ lɛ awie. Fɔlɔi ni ji Kristofoi komɛi toɔ gbɛjianɔ ni amɛyasara skul lɛ yɛ be kɛ bei amli, ejaakɛ enɛ yeɔ ebuaa ni eha wekukpaa kpakpa bakaa amɛ kɛ tsɔɔlɔi lɛ ateŋ. Miishɛɛ ni anaa yɛ saji amli nɛkɛ lɛ hu wajeɔ ekomefeemɔ ni ka fɔlɔ lɛ kɛ ebii lɛ teŋ lɛ. Fɔlɔi komɛi hu ŋɔɔ hegbɛ ni Fɔlɔi kɛ Tsɔɔlɔi Akuu lɛ hu kɛhaa lɛ ni amɛkɛ tsɔɔlɔi lɛ gbaa sane koni amɛle bɔ ni amɛbii lɛ yaa nɔ amɛhaa yɛ woloŋlee kɛ jeŋba mli yɛ skul. Enɛ hu kɛ hegbɛ haa koni aha tsɔɔlɔ lɛ sanebimɔi ohe too, kɛ eko yɛ nakai.
FEEMƆ ODASEFONYO GBI FƐƐ GBI
6 Odasefonyo gbekɛ ko ni yɔɔ Colorado. U.S. Amerika lɛ biɔ etsɔɔlɔ lɛ ni eye ebua lɛ yɛ wiemɔi ni amɛshishinumɔ wawai ni enaa yɛ Examining the Scriptures wolo bibioo lɛ ni okaneɔ daa gbi lɛ mli. Gbi ko lɛ eyoo akɛ ewolo lɛ elaaje. Yɛ sɛɛ mli lɛ ena akɛ etsɔɔlɔ lɛ “ema” wolo lɛ, yɛ gbi ko ni ehe baye ni ha eshi skul mra lɛ hewɔ. Esumɔɔɔ ni ŋmɛlɛ lɛ kanemɔ gbi ko aho ehe. Enɛ ha ekɛ Examining the Scriptures lɛ eko ke lɛ.
7 Eji anɔkwale akɛ skul afi hee lɛ kɛ mligbigbilimɔ kɛ yeyeeye-feemɔ baaba. Shi kɛlɛ, jwɛŋmɔ kpakpa kɛ hesaamɔ kpakpa baaye abua fɔlɔi kɛ obalaŋtai fɛɛ ni ‘amɛwaje amɛjwɛŋmɔi kɛba nifeemɔ’ kɛha Yehowa yijiemɔ yɛ skul ni afi ni baa lɛ mli.—1 Pet. 1:13.