Sanekpakpa Lɛ Kɛhamɔ
Yɛ Hejɔɔmɔ Gbii Anɔ
1 Eyɛ mli akɛ gbijurɔyelii pii ni kɔɔ Blonya kɛ Afi Hee kɛ agbɛnɛ Yesu Amanehulu he lɛ ashishijee jɛ wɔŋjamɔ mli moŋ, shi mɛi ni tsɛɔ amɛhe Kristofoi lɛ ateŋ mɛi ni fa fe akpekpei akpei abɔ yeɔ gbijuji nɛɛ daa afi. Mɛi pii heɔ yeɔ yɛ anɔkwale mli akɛ Nyɔŋmɔ kpɛlɛɔ nɛkɛ gbijurɔyelii nɛɛ anɔ. Te wɔɔfee tɛŋŋ ni wɔkɛ sanekpakpa lɛ ashɛ gbɔmɛi nɛɛ atsuii ahe yɛ nɛkɛ hejɔɔmɔ gbii nɛɛ amli lɛ?
Feemɔ Mɔ Ni Susuɔ Mɛi Ahe Ni Yɔɔ Bulɛ Hu
2 Onukpai lɛ toɔ gbɛjianɔ krɛdɛɛ kɛhaa hejɔɔmɔ gbi nɔ odaseyeli, yɛ bɔ ni asafo lɛ shihilɛ ji lɛ naa, akɛni wɔteŋ mɛi pii eyaaa nitsumɔ yɛ nakai beaŋ lɛ hewɔ. Esa akɛ atsake be ni akɛbaaje shia-kɛ-shia nitsumɔ shishi lɛ yɛ shiatsɛmɛi lɛ ateŋ mɛi komɛi ni ekolɛ amɛbaasumɔ ni amɛwɔ babaoo yɛ nɛkɛ gbii nɛɛ anɔ lɛ ahesusumɔ hewɔ.
3 Yɛ be mli ni wɔtsuɔ wɔshiɛmɔ nitsumɔ lɛ, ekolɛ wɔkɛ mɛi babaoo baakpe ni amɛna gbɔi aloo amɛmiihoo nii. Akɛni wɔle jogbaŋŋ akɛ nɛkɛ be nɛɛ ji be krɛdɛɛ ko kɛha amɛ hewɔ lɛ. wɔbaanyɛ wɔkɛ bulɛ aha ni wɔwiemɔ lɛ afee kuku ni ewie oti pɔtɛɛ ko hu he. Kristofoi abulɛ ni wɔɔjie kpo wɔtsɔɔ lɛ baagbele gbɛ aha wɔ ni wɔye odase wɔsɛɛ.
4 Wɔkɛ wɔhe wooo je lɛŋ jamɔ gbijurɔyelii lɛ amli, ni wɔkɛ hejɔɔmɔ gbii aŋamɔi lɛ ŋaaa wɔhe ni wɔhereee nɔ hu. No hewɔ lɛ, ŋaalee he miihia yɛ bɔ ni wɔɔfee wɔnii yɛ nɛkɛ ŋamɔi nɛɛ ahe lɛ mli. Ehe ehiaaa ni ohaa ŋamɔ ni tamɔ nɛkɛ tsɔɔ mlifu sane, shi yɛ shihilɛi pii amli lɛ wɔbaanyɛ wɔda shiatsɛ lɛ shi yɛ ekpakpa ni eshweɔ ehaa wɔ lɛ hewɔ. Kɛji mɛi bi wɔ nɔ ni wɔheɔ wɔyeɔ lɛ, wɔbaanyɛ wɔma nɔ mi wɔha amɛ akɛ wɔwoɔ Kristo Yesu hiɛ nyam, akɛni abiɔ enɛ hu yɛ mɛi ni woɔ Nyɔŋmɔ hiɛ nyam lɛ adɛŋ lɛ hewɔ. (Yoh. 5: 23) Shi, hejɔɔmɔ gbii babaoo amli nifeemɔi wooo Kristo loo Nyɔŋmɔ hiɛ nyam. Kɛji aŋkroaŋkroi miitao saji babaoo lolo yɛ nakai be lɛ mli nɔŋŋ aloo yɛ sɛɛ mli be kroko lɛ, wɔbaanyɛ wɔkɛ amɛ asusu sane ni yɔɔ Reasoning wolo lɛ baafai 176-8 kɛ 180 lɛ he.
HIƐKPAMƆ WIEMƆI
5 Akɛni Blonya kɛ Yesu Amanehulu ji jamɔ mli hejɔɔmɔ gbii hewɔ lɛ, wɔkɛ mɛi babaoo baakpe ni amɛmiisumɔ ni amɛwie Nyɔŋmɔ he yɛ nɛkɛ be nɛɛ mli fe afi lɛ mli bei krokomɛi fɛɛ ni eshwɛ. Wɔbaanyɛ wɔkɛ anɔkwa sane nɛɛ atsu nii yɛ wɔhiɛkpamɔ wiemɔ lɛ mli. Akɛ nɔkwɛmɔ nɔ lɛ, wɔbaanyɛ wɔkɛɛ akɛ: “Mɛi akpekpei abɔ ni yɔɔ je lɛŋ hei fɛɛ lɛ yeɔ Yesu Amanehulu, kɛ Afii Hee Gbi. Ani osusuɔ akɛ nɛkɛ gbijuji nɛɛ gbalaa gbɔmɛi kɛbɛŋkɛɔ Nyɔŋmɔ he kpaakpa? Kɛji shiatsɛ lɛ susuɔ akɛ gbijurɔyelii lɛ hi jio, ehii jio kɛ wɔkpɛlɛ ewiemɔ lɛ nɔ sɛɛ lɛ, wɔbaanyɛ wɔkɛɛ akɛ: “Mɛi pii ji mɛi ni sumɔɔ ni kulɛ amɛna amɛkɛ Nyɔŋmɔ teŋ wekukpaa kpakpa, shi ekolɛ amɛsusuɔ akɛ amɛkɛ Nyɔŋmɔ teŋ jɛkɛ waa. Shi miishɛɛ sane ji akɛ Nyɔŋmɔ diɛŋtsɛ fɔɔ wɔ nine ni wɔtao esɛɛ gbɛ.” Kɛkɛ lɛ obaanyɛ okɛ Saneyitso Kɛha Sanegbaa lɛ atsa nɔ.
6 Kɛ wɔɔtsɔ gbɛ kroko nɔ lɛ, wɔbaanyɛ wɔkɛɛ akɛ: “Kɛ eshɛ jamɔ mli hejɔɔmɔ gbii tamɔ Blonya kɛ Yesu Amanehulu bei amli titri lɛ, wɔnuɔ ni gbɔmɛi fɔɔ wiemɔ akɛ amɛhiɛ ka nɔ akɛ toiŋjɔlɛ baaba shikpɔŋ nɔ koni ana gbɔmɛi ahe tsuijurɔ. Ani osusuɔ akɛ Nyɔŋmɔ kɛ toiŋjɔlɛ baaba shikpɔŋ nɔ yɛ wɔbei nɛɛ amli?” No sɛɛ lɛ wɔbaanyɛ wɔya nɔ ni wɔtsɔɔ lɛ akɛ Yesu Kristo ji “Hejɔlɛ Lumɔ” ni agba ehe sane afɔ shi lɛ. (Yes. 9:6, 7) Akɛ Nɔyelɔ ni ahala lɛ yɛ Nyɔŋmɔ nɔyeli lɛ nɔ lɛ, etsɛŋ ni Kristo baatsu nii koni ekɛ naanɔ toiŋjɔlɛ aba shikpɔŋ lɛ nɔ.—Dan. 2:44; Kpoj. 21:3-5
7 Wɔbaanyɛ wɔkɛ maŋkwramɔŋ hejɔɔmɔ gbii hu atsu nii ni wɔkɛtee mɛi amiishɛɛ shi yɛ sanekpakpa lɛ he. Mɛi pii ji mɛi ni yɔɔ shia ni amɛmiisumɔ ni amɛgba sane. Yɛ be mli ni onyiɛ shiɛmɔ nɔ lɛ, kɛji ona mɛi enyɔ loo mɛi ni yi fa fe nakai ni amɛbua amɛhe naa yɛ hɔlɔ mli lɛ. obaanyɛ okɛ shihilɛ lɛ atsu nii ni okɛ amɛ agba sane. Obaanyɛ okɛ hiɛkpamɔ wiemɔ nɛɛ atsu nii: “Wɔmiiho ni wɔyasara wɔnaanyo ko ni wɔna akɛ nyɛmiihere kɔɔyɔɔ yɛ biɛ nɛɛ. Kɛ wɔkɛ wɔnanemɛi yɛ hekome lɛ wɔnaa he miishɛɛ tamɔ bɔ ni wɔnaa akɛ eji anɔkwale yɛ nyɛ hu nyɛgbɛfaŋ lɛ. Nanemɛi haa miishɛɛ ni wɔnaa yɛ shihilɛ mli lɛ yaa hiɛ. Aloo nyɛkɛ mi kpaaa gbee? Mɛi enyɔ komɛi yɛ ni esa akɛ wɔtao amɛ ni wɔkɛ amɛ abɔ naanyo. Namɛi ni? Kɛkɛ lɛ obaanyɛ ogbala sɛɛnamɔi ni wɔbaana kɛjɛ naanyo ni wɔkɛ Yehowa kɛ Yesu aaabɔ lɛ mli aba amrɔ nɛɛ kɛ wɔsɛɛ lɛ mli otsɔɔ amɛ. Ehe ehiaaa ni omɛ kɛyashi hejɔɔmɔ gbii amli dani okɛ gbɛ ni tamɔ nɛkɛ atsu nii.
8 Eyɛ mli akɛ mɛi babaoo ji mɛi ni Maŋtsɛyeli sane lɛ kɔɔɔ amɛhe eko ni amɛnaa amɛ amale jamɔ mli hejɔɔmɔ gbii lɛ ahe miishɛɛ moŋ, shi eka shi faŋŋ akɛ Yehowa baajɔɔ mɔdɛŋbɔɔ ni wɔkɛaatao mɛi ni taoɔ anɔkwale lɛ sɛɛ gbɛ lɛ nɔ, ejaakɛ lɛ diɛŋtsɛ lɛ, ‘mɛi ni jaa lɛ nɛkɛ etaoɔ,’ ni ebaatsɔɔ amɛ gbɛ kɛha egbɛjianɔtoo lɛ mli.—Yoh. 4:23, 24.