“Ba ni Wɔtee Yehowa We lɛ”
1 David kɛ miishɛɛ here nɔ beni afɔ lɛ nine akɛ: “Ba ni wɔtee Yehowa we lɛ.” (Lala 122:1) Yehowa “we” lɛ, ni sɔlemɔwe lɛ damɔ shi kɛha lɛ lɛ, ji henaabuamɔ he kɛha mɛi ni sumɔɔ akɛ amɛja anɔkwa Nyɔŋmɔ lɛ. Eji he krɔŋkrɔŋ ni yɔɔ shweshweeshwe kɛ toiŋjɔlɛ hu. Ŋmɛnɛ, jeŋ muu fɛɛ Kristofoi asafo lɛ ji Nyɔŋmɔ “we,” kɛ “anɔkwale lɛ akulashiŋ kɛ enɔdaamɔ nɔ.” (1 Tim. 3:15) Ahaa wɔnine shɛɔ gbɛjianɔtoi fɛɛ ni yɔɔ kɛha wɔyiwalaheremɔ lɛ nɔ kɛtsɔɔ nɛkɛ gbɛ nɛɛ nɔ. Yɛ yiŋtoo nɛɛ hewɔ lɛ, “ jeŋmaji fɛɛ aaaho kɛaaba he,” kɛji amɛmiisumɔ ni amɛna jɔɔmɔi ni awo shi yɛ he yɛ Nyɔŋmɔ Maŋtsɛyeli lɛ nɔyeli shishi lɛ mli gbɛfaŋŋ nɔ.—Yes. 2:2.
2 Nɔ ni feɔ nɛkɛ “we” nɛɛ ji asafoi ni fa fe 69,000 yɛ shikpɔji 229 nɔ. Maŋtsɛyeli Asai ni yɔɔ je lɛŋ fɛɛ lɛ anaa shinaai lɛ anaa egbele, ni nitsulɔi ni yɔɔ ekaa ni amɛyi fa fe akpekpei ejwɛ miifɔ nine amɛmiitsɛ mɛi akɛ: “Ba! . . . Mɔ ni sumɔɔ lɛ, ha ni ebayɛ wala nu lɛ yaka.” (Kpoj. 22:17) Mɛi babaoo enu nɛkɛ shɛɛ sane nɛɛ ni amɛkɛ hiɛsɔɔ ehere nɔ. Esa mɛi krokomɛi hu he, shi amɛbako Yehowa we lɛ kɛtsɔ amɛhe ni amɛkɛaabɔ Kristofoi asafo lɛ he lɛ nɔ. Nɛkɛ gbɔmɛi nɛɛ yɛ “mumɔŋ hiamɔ nii” ko ni abaanyɛ akɛ nibii kpakpai ni nine shɛɔ nɔ yɛ asafo lɛ mli pɛ lɛ atsu he nii. (Mat. 5:3, NW) Wɔyɛ jaramɔ bei amli, ni nibii agbɛjianɔtoo nɛɛ naagbee lɛ miibɛŋkɛ oyayaayai. Ni wɔɔhi shi akɛ mɛi ni jeee amɛhe sane ko ji nɔ ko, kɛ shishashaomɔ su ni wɔɔna lɛ baanyɛ ekɛ oshara aba. Ehe miihia ni gbɔmɛi aya amɛhiɛ waa ni ‘amɛbɛŋkɛ Nyɔŋmɔ’ kɛtsɔ bɛŋkɛmɔ ni amɛaabɛŋkɛ egbɛjianɔtoo lɛ kpaakpa lɛ nɔ. (Yak. 4:8) Mɛɛ gbɛ nɔ wɔɔtsɔ wɔye wɔbua amɛ?
3 Gbalamɔ Jwɛŋmɔ Kɛba Gbɛjianɔtoo Iɛ Nɔ: Kɛjɛ be mli ni wɔkɛ mɛi ni yɔɔ wiemɔ lɛ he miishɛɛ lɛ bɔi kpee lɛ mli fɛɛ lɛ, esa akɛ wɔgbala amɛjwɛŋmɔ kɛba gbɛjianɔtoo lɛ nɔ. Eyɛ mli akɛ wɔ diɛŋtsɛ wɔnyɛɔ wɔleɔ ŋmalɛi komɛi ni wɔtsɔɔ shishijee tsɔɔmɔi komɛi amli jogbaŋŋ moŋ, shi ojeee wɔ ji nakai nilee lɛ jɛɛhe. Nɔ fɛɛ nɔ ni wɔkase lɛ ba kɛjɛ gbɛjianɔtoo lɛ ŋɔɔ, ni akɛtsɔɔ tsulɔ kuu ni haa wɔ “ŋmaa yɛ be ni sa nɔ” lɛ nɔ. (Mat. 24:45-47) Kɛ jɛ shishijee lɛ, ehe miihia ni mɛi heei lɛ ayoo akɛ nibii babaoo fata jamɔ krɔŋŋ he fe wɔ kɛkɛ aloo asafo ni wɔkɛbɔɔ lɛ; ayɛ jeŋ muu fɛɛ teokrase gbɛjianɔtoo ko ni ato he gbɛjianɔ, ni miitsu nii yɛ Yehowa kudɔmɔ kɛ egbɛtsɔɔmɔ shishi
4 Gbɛtsɔɔmɔ ni wɔnine shɛɔ nɔ lɛ jɛɔ Yehowa, mɔ ni ewo shi akɛ ebaakudɔ wɔ ni etsɔɔ wɔ nii lɛ ŋɔɔ. (Lala 32:8; Yes. 54:13) Atsɔɔ wɔwoji lɛ anɔ titri ni akɛ nɛkɛ gbɛtsɔɔmɔ nɛɛ haa wɔ. Kɛji wɔbaanyɛ wɔye wɔbua mɛi ni yɔɔ wiemɔ lɛ he miishɛɛ lɛ ni amɛna bulɛ ni mli wa amɛha wɔwoji lɛ, ni amɛkpɛlɛ nɔ akɛ eji gbɛtsɔɔmɔ ni hereɔ mɔ yiwala jɛɛhe lɛ, no lɛ eka shi faŋŋ akɛ amɛbaakane ni amɛkɛ emli sane lɛ baatsu nii, moŋ fe ni amɛaaŋmɛɛ he oya. Esa akɛ wɔkɛ nɛkɛ woji nɛɛ aha ni wɔkɛtsu nii yɛ gbɛ ni baaha ana bulɛ kɛha amɛ lɛ nɔ. Enɛ haa mɛi heei lɛ naa hiɛsɔɔ amɛhaa gbɛjianɔtoo lɛ ni amɛkɛ amɛhe fɔɔ nibii ni ehaa wɔ lɛ anɔ.
5 Ha mɛi ni yɔɔ wiemɔ lɛ he miishɛɛ lɛ ale akɛ ayɛ kpee he titri ko yɛ akutso lɛ mli, he ni akɛ gbɛtsɔɔmɔ haa yɛ be fɛɛ be. Ha amɛ Maŋtsɛyeli Asa lɛ adrɛs kɛ bei ni akɛfeɔ kpeei hu. Gbalamɔ bɔ ni wɔkpeei lɛ yɔɔ sɔrɔto yɛ jamɔ henaabuamɔi ni tsutsu lɛ amɛyaa lɛ ahe lɛ mli otsɔɔ lɛ. Ahereɔ mɔ fɛɛ mɔ atuu; aheee shika, ni abiii shika kɛjɛɛɛ aŋkroaŋkroi adɛŋ hu. Eyɛ mli akɛ sɔɔlɔi ni ahala amɛ kwɛɔ gbɛjianɔtoi lɛ anɔ moŋ, shi mɔ fɛɛ mɔ yɛ hegbɛ ni ekɛ ehe woɔ mli kɛtsɔ saji ahetoohamɔ kɛ ehe ni ekɛaawo nifeemɔi lɛ amli lɛ nɔ. Ahereɔ wekui atuu; gbekɛbii hu fata he yɛ wɔ Biblia mli sanegbaai amli. Wɔ sɔɔlɔi lɛ wooo atadei kakadaji aloo atadei ni haa esoroɔ amɛ. Asaa Maŋtsɛyeli Asa lɛ mli jogbaŋŋ fɛfɛo, ni asũko kɛnrɛ yɛ mli, ni amagai hu bɛ mli. Mɛi titri ni yaa kpee yɛ mli ji mɛi ni yɔɔ nakai akutso lɛ mli.
6 Gbalamɔ Jwɛŋmɔ Fiofio yɛ Biblia Kasemɔ Iɛ Mli: Klɛŋklɛŋ oti ni yɔɔ Biblia mli nikasemɔ lɛ sɛɛ ji ni akɛtsɔɔ anɔkwale ni yɔɔ Nyɔŋmɔ Wiemɔ lɛ mli lɛ. Esa akɛ etswa hiɛsɔɔ hu kɛha Yehowa gbɛjianɔtoo lɛ yɛ nikaselɔ lɛ mli, ni eha ele bɔ ni ehe hiaa waa akɛ efata nakai gbɛjianɔtoo lɛ he. Nitsumɔ kpele ni Yesu kɛ ekaselɔi lɛ tsu yɛ klɛŋklɛŋ ani oha lɛ mli lɛ gbala gbɔmɛi anɔkwafoi lɛ ni efee amɛ ekome kɛha nitsumɔ yɛ nɔyeli kuu kome shishi. Ato asafoi ashishi yɛ shikpɔji ni ahere sane lɛ nɔ jogbaŋŋ yɛ lɛ anɔ, koni ekɛ tsɔsemɔ kɛ gbɛtsɔɔmɔ aha be fɛɛ be. Awo mɛi ni kɛ amɛhe bɔɔ asafoi nɛɛ ahe lɛ hewalɛ yɛ mumɔŋ, ni aye abua amɛ ni amɛŋmɛ amɛtsui shi yɛ yiwaa bei amli. (Heb. 10: 24, 25; 1 Pet. 5:8-10) Eji Yehowa yiŋtoo akɛ “eŋɔ nibii fɛɛ eto yitso kome shishi yɛ Kristo mli” yɛ wɔgbii nɛɛ amli (Efes. 1:9, 10) Nɔ ni ejɛ mli eba ji akɛ, wɔna jeŋ muu fɛɛ “nyɛmimɛi” asafo.—1 Pet. 2:17.
7 Esa akɛ akɛ gbɛtsɔɔmɔ ni baaye abua nikaselɔi lɛ ni amɛna hiɛsɔɔ amɛha gbɛjianɔtoo lɛ, ni amɛkɛ nibii kpakpai ni ekɛhaa lɛ atsu nii kɛha amɛyiwalaheremɔ lɛ afata daa otsi nikasemɔ lɛ he. Ŋɔɔ minitii fioo daa otsi ni okɛgba aloo ogbala nɔ ko ni kɔɔ asafo lɛ he, kɛ bɔ ni etsuɔ nii ehaa lɛ mli otsɔɔ lɛ. Obaanyɛ ona otii ni yeɔ buaa kɛha sanegbaa yɛ May 1, 1985, Buu-Mɔɔ lɛ mli. Jehovah’s Witnesses in the Twentieth Century kɛ Yehowa Odasefoi—Miifee Nyɔŋmɔ Suɔmɔnaa Nii ye Ekome feemɔ Mli yɛ Jeŋ Fɛɛ woji bibii lɛ wieɔ gbɛjianɔtoo lɛ fãi titrii lɛ ahe kɛ bɔ ni ehe aaanyɛ aba sɛɛnamɔ kɛha wɔ Gbɛjianɔ ni oooto kɛha Biblia kaselɔi lɛ ni amɛkwɛ Jehovah’s Witnesses—The Organization Behind the Name video lɛ baaha amɛna nɔ ni enyɛɔ etsuɔ lɛ amɛha amɛ diɛŋtsɛ amɛhe. Amaniɛbɔi kɛ niiashikpamɔi ni aaahala kɛjɛ Yearbook lɛ mli baanyɛ atsɔɔ amɛ bɔ ni nitsumɔ lɛ yeɔ omanye yɛ maji kɛ kusumii krokomɛi amli. Abaanyɛ akɛ woji krokomɛi hu atsu nii. Yɛ be kɛ bei amli lɛ, gbálamɔ nibii tamɔ nɔ hewɔ ni wɔyaa shia kɛ shia, kɛ yiŋtoo ni yɔɔ wɔkpeei asɛɛ, bɔ ni wɔfeɔ wɔnaa shika kɛhaa wɔnitsumɔ lɛ, kɛ bɔ ni wɔnitsumɔ lɛ ekpele jeŋ fɛɛ lɛ mli otsɔɔ lɛ.
8 Odasefoi krokomɛi ni aaale amɛ lɛ hu baanyɛ ana hewalɛ ni kanyaa mɔ yɛ mɛi heei lɛ anɔ, ni eeeha shishinumɔ ni amɛyɔɔ yɛ asafo lɛ he lɛ mli alɛɛ. No hewɔ lɛ, fɔɔ shiɛlɔi krokomɛi anine ni amɛfata ohe yɛ nikasemɔ lɛ mli yɛ be kɛ bei amli. Mɔ ko ni yɔɔ asafo lɛ mli ni eshihilɛ kɛ esuɔmɔnaa nii tamɔ nikaselɔ lɛ nɔ lɛ baanyɛ ana hewalɛ kroko kwraa yɛ nikaselɔ lɛ susumɔi anɔ. Ekolɛ onukpa ko baanyɛ afata ohe koni ekɛle lɛ. Gbɛjianɔ ni oooto koni kpokpaa nɔkwɛlɔ lɛ loo eŋa ayasara nikaselɔ lɛ baanyɛ afee jɔɔmɔ diɛŋtsɛ kɛha lɛ. Kɛji Odasefoi komɛi kɛ he ni eyɔɔ lɛ jɛkɛɛɛ lɛ, ha ni aaaha amɛle Biblia kaselɔ lɛ baanyɛ afee hewalɛwoo babaoo kɛha nikaselɔ lɛ koni enyɛ eba asafoŋ kpeei.
9 Wo Mɛi Heei Iɛ Hewalɛ ni Amɛba kpeei: Ehe miihia ni mɛi heei lɛ ayoo bɔ ni ehe hiaa akɛ amɛaaba kpeei. Bɔɔ mɔdɛŋ ni okanya amɛmiishɛɛ lɛ. Gbalamɔ amɛjwɛŋmɔ kɛya nikasemɔi ni abaasusu he yɛ Buu-Mɔɔ Nikasemɔ lɛ mli lɛ anɔ. Tsii maŋshiɛmɔi ni abaaha lɛ ekomɛi ayitsei ata otsɔɔ lɛ. Gbaa lɛ otii ni abaasusu yɛ he yɛ Teokrase Sɔɔmɔ Skul kɛ Asafo Woloŋ Nikasemɔ lɛ mli lɛ ekomɛi. Wiemɔ bɔ ni bo diɛŋtsɛ onuɔ nɔ ni okaseɔ yɛ kpeei nɛɛ ashishi lɛ he ohaa, kɛ nɔ hewɔ hu ni onuɔ he akɛ esa akɛ oya lɛ. Kɛji obaanyɛ lɛ, too tsɔne he gbɛjianɔ oha lɛ. Kɛji nyɛyɛ eko lɛ, tɛlifon ni oootswa lɛ dani kpee be lɛ ashɛ lɛ baanyɛ afee hewalɛwoo kɛha lɛ koni enyɛ eba.
10 Kɛ Biblia kaselɔ ko ba kpee lɛ, esa akɛ enu he akɛ aahere lɛ hiɛmɛɛ. Okɛ lɛ atsɔɔ mɛi krokomɛi, ni onukpai lɛ fata he. Kɛji ebabo maŋshiɛmɔ toi lɛ, okɛ lɛ atsɔɔ wielɔ lɛ. Okɛ lɛ ashɛra shi ni ekwɛ Maŋtsɛyeli Asa lɛ nɔ. Tsɔɔmɔ lɛ yiŋtoo ni yɔɔ woji wuji kɛ woji tɛtrɛbii ahɔɔmɔ he lɛ, tooyeli adekai woji atoohe, kɛ afi ŋmalɛ lɛ sɛɛ. Ha ele akɛ jeee jamɔ hé kɛkɛ asa lɛ ji, shi moŋ eji he ni ajɛɔ atoɔ shiɛmɔ nitsumɔ lɛ he gbɛjianɔ yɛ nakai akutso lɛ mli.
11 Gbalamɔ bɔ ni wɔfeɔ wɔkpeei wɔhaa lɛ mli otsɔɔ lɛ. Tsɔɔmɔ nikaselɔ lɛ woji ni wɔkaseɔ. Ha ele akɛ Biblia lɛ ji wolo titri ni wɔkaseɔ. Mɔ fɛɛ mɔ baanyɛ ekɛ ehe awo mli, kɛ gbekɛbii bibii po. Gbalamɔ mli otsɔɔ lɛ akɛ Yehowa Odasefoi fee lalai kɛ wiemɔi ni yɔɔ wɔ lala wolo lɛ mli lɛ fɛɛ kɛha nitsumɔ yɛ wɔjamɔ lɛ mli. Gbalamɔ ejwɛŋmɔ kɛya bɔ ni mɛi ni baa kpeei lɛ jɛ shihilɛi sɔrɔtoi amli lɛ nɔ. Wiemɔ naanyobɔɔ su kɛ gbɔfeemɔ mumɔ ni yɔɔ lɛ he jogbaŋŋ. Nɛkɛ anɔkwa mɔ hesusumɔ ni mlihilɛ yɔɔ mli nɛɛ baanyɛ afee otii ni mli wa waa ni baakanya nikaselɔ lɛ ni eba ekoŋŋ.
12 Nɔ Hewɔ ni Mɛi Komɛi Tsĩɔ Amɛhe Naa: Bei pii lɛ, yɛ nibii nɛɛ fɛɛ ni ooofee lɛ sɛɛ lɛ, mɛi komɛi shashaoɔ shi akɛ amɛaabɛŋkɛ gbɛjianɔtoo lɛ. Onijiaŋ akaje wui oya. Bɔɔ mɔdɛŋ ni okɛ ohe awo amɛshihilɛ mli. Kɛbashi amrɔ nɛɛ, eka shi faŋŋ akɛ ekolɛ amɛnuko he lɛlɛŋ akɛ ehe miihia ni amɛya jamɔ nifeemɔi ashishi ja gbii krɛdɛɛi komɛi pɛ. Ekolɛ amɛweku lɛ mlibii aloo nanemɛi ni bɛŋkɛ amɛ kpaakpa miinyɛ amɛnɔ Ekolɛ amɛnuɔ he akɛ amɛkuuŋbii ni wieɔ wiemɔi gbohii lɛ miiwo amɛhe gbeyei. Ni, yɛ anɔkwale mli lɛ, ekolɛ nibii ni kɔɔ naanyobɔɔ kɛ hiɛtserɛjiemɔ sɛɛdii he lɛ ekomɛi miigbala amɛjwɛŋmɔ. Ekolɛ amɛbuɔ enɛɛmɛi akɛ gbɛtsii nii ni amɛnyɛŋ amɛye nɔ; ehe miihia ni oye obua amɛ ni amɛkwɛ nibii yɛ gbɛ kpakpa nɔ ni “[amɛ]yoo nii ni hi titri lɛ.”—Filip. 1:10.
13 Ha lɛ Ŋmalɛ naa yiŋtoi ahewɔ ni sa akɛ emia ehiɛ. Maa nɔ mi oha lɛ akɛ hewalɛwoo kɛ mumɔŋ wajemɔ ni wɔnaa kɛjɛɔ wɔhe ni wɔkɛkpeɔ kutuu mli lɛ he miihia wɔteŋ mɔ fɛɛ mɔ. (Rom. 1:11, 12) Yesu fee lɛ faŋŋ akɛ weku mli shitee-kɛ-woo jeee yiŋtoo kpakpa ni aaadamɔ nɔ akpa (Mat. 10:3439) Paulo woɔ wɔ ŋaa ni wɔhiɛ akagbo akɛ wɔɔha ale wɔ yɛ faŋŋ mli akɛ Yesu kaselɔi. (2 Tim. 1:8, 12-14) Esa akɛ wɔkudɔ nibii ni wɔdiɔ sɛɛ kɛ nibii ni gbalaa wɔjwɛŋmɔ lɛ; kɛ jeee nakai lɛ, amɛbaatsɔ wɔ tsɔne (Luka 21:34-36) Esa akɛ mɛi ni baasa kɛha Yehowa jɔɔmɔ namɔ lɛ afee mɛi ni kɛ amɛsusuma fɛɛ eha lɛ, jeee mɛi ni kɛ tsui fa-kɛ-fa feɔ nakai. (Kol. 3:23, 24) Biblia mli Shishitoo mlai nɛɛ ahe hiɛsɔɔ ni wɔɔdu wɔwo amɛmli lɛ baagbele gbɛ eha amɛ ni amɛya amɛhiɛ yɛ mumɔŋ
14 Hegbɛ Iɛ Yɛ lolo: Awo Yehowa we ni ji enɔkwa jamɔ lɛ nɔ gojoo kɛteke ekrokomɛi fɛɛ. Akɛ ninefɔɔ miiha yɛ shikpɔji 229 nɔ yɛ je lɛŋ fɛɛ akɛ: “Nyɛbaa . . . wɔyakwɔa Yehowa gɔŋ lɛ, . . . koni etsɔɔ wɔ egbɛi lɛ, ni wɔnyiɛ etempɔŋi lɛ anɔ.” (Yes. 2:3) Gbɛ kpakpa nɔ ni mɛi heei lɛ aaahere tsɛmɔ nɛɛ nɔ yɛ lɛ baanyɛ ahere amɛyiwala. Ni gbɛi ni hi fe fɛɛ ni wɔɔtsɔ nɔ wɔye wɔbua amɛ lɛ ateŋ ekome ji ni wɔgbala amɛjwɛŋmɔ kɛba Yehowa gbɛjianɔtoo lɛ nɔ.