Hetsemɔ Woɔ Nyɔŋmɔ Hiɛ Nyam
1 Taomɔ nii ni hiɛdɔɔ yɔɔ mli ni akɛtsuɔ hetsemɔ he nii yɛ Mose Mla lɛ mli. Enɛɛmɛi ha esoro Israel yɛ mɛi krokomɛi ahe akɛ gbɔmɛi ni abiɔ ni amɛhe atse yɛ gbɔmɔtsoŋ kɛ mumɔŋ fɛɛ. (3 Mose 11:35, 36; 15:1-11; Yes. 52:11) Hetsemɔ shihilɛ ni tamɔ nɛkɛ lɛ wo Nyɔŋmɔ hiɛ nyam ni eha maŋbii lɛ na gbɔmɔtsoŋ hewalɛ kpakpa.
2 Ŋmɛnɛ hu, hetsemɔ ji Yehowa webii lɛ akadimɔ nii. Shi yɛ be mli ni enɛ kadiɔ Yehowa webii akɛ kuu lɛ, ani nakai eji yɛ wɔteŋ mɔ fɛɛ mɔ he aŋkroaŋkro? Bɔ ni wɔsusuɔ falefale-feemɔ kɛ wɔ gbɔmɔtsoŋ hetsemɔ hu he wɔhaa lɛ tsɔɔ bɔ ni wɔhiɛ sɔɔ nɔ ni Yehowa taoɔ kɛjɛɔ wɔdɛŋ lɛ babaoo.
3 Ni te wɔshia lɛ mli yɔɔ ha tɛŋŋ? Ani ehaa mɛi naa jwɛŋmɔ ni ejaaa yɛ Maŋtsɛyeli shɛɛ sane ni wɔjajeɔ lɛ he? Ani eeenyɛ eba akɛ mɛi ayiŋ aaafee amɛ kɔshikɔshi yɛ anɔkwayeli ni wɔjieɔ lɛ kpo lɛ he kɛ wɔwie shikpɔŋ ni aaatsake afee lɛ paradeiso lɛ he yɛ be mli ni wɔshia mli ewo muji ni jwɛi ni yɔɔ shia lɛ sɛɛ fɛɛ lɛ etsa kusuu ni ahuuu? Kɛ wɔshia fee he ko ni emli fɛɛ efee basaa loo jɛmɛ fɛɛ miije fu akɛni wɔfeee jɛmɛ falefale hewɔ lɛ, ani abaanyɛ awie akɛ wɔna ‘hetsemɔ sui ni baasa jeŋ hee ni baaba yɛ Nyɔŋmɔ Maŋtsɛyeli lɛ shishi lɛ’?—om bf. 130-1.
4 Ni wɔ-kar, moto loo baisikel ni wɔkɛyaa hei lɛ hu? Ani ehe tse bɔ ni sa, yɛ emli kɛ ehe fɛɛ, koni bɔ ni ehe efee lɛ akajie mɛi ajwɛŋmɔ kɛmiijɛ wɔshiɛmɔ nitsumɔ lɛ nɔ? Ni wɔtadei, woji abaagii, kɛ wɔhesaamɔ hu? Ani amɛhe tse, ni ejeee nɔ ko ni baagba mɔ ko naa? Jwɛŋmɔ yɛ mli akɛ wɔɔhiɛ wɔhe kɛ wɔtadei fɛɛ falefale kɛtsɔ wɔhejuu kɛ wɔtadei ahe fɔmɔ daa nɔ.—w89 6/1 bf. 16-19.
5 Ni kɛji akɛ nyɛmi ko kɛ anyagbafeemɔ fee enii ni no hewɔ lɛ egbɔmɔtsoŋ loo eshihilɛ hei ebafee nɔ ni kɛ ahorabɔɔ baa asafo lɛ nɔ hu? Ekolɛ yelikɛbuamɔ ni akɛhaa yɛ suɔmɔ mli lɛ kɛkɛ he baahia lɛ yɛ gbɔlɛ loo hela hewɔ. Kɛ nakai ni lɛ, belɛ ebaafee nɔ ni mlihilɛ yɔɔ mli akɛ aaaye abua lɛ. Mɔ ko yɛ ni ekolɛ eyɛ naagba nɛɛ, shi eleee; ŋaawoo ni akɛhaa yɛ mlihilɛ mli lɛ baatsirɛ lɛ ni ejaje shihilɛ lɛ. Aŋkroaŋkroi ni yaa nɔ amɛfeɔ nɔkwɛmɔ nɔ gbonyo yɛ enɛ gbɛfaŋ lɛ ahe esaŋ kɛhaŋ hegbɛi ni nɔ kwɔlɔ yɛ asafo lɛ mli. Shi kɛlɛ, esa akɛ asafoŋ onukpai akwɛ jogbaŋŋ ni amɛkafee amɛ diɛŋtsɛ amɛmlai ni amɛsumɔɔ amɛha mɛi krokomɛi.
6 Afɔɔ nine atsɛɔ mɛi heei ni yɔɔ he miishɛɛ lɛ koni amɛbana mumɔŋ okpɔlɔŋmɛɛ mli ŋɔɔmɔ yɛ Maŋtsɛyeli Asa lɛ nɔ. Bei pii lɛ, wɔnaa ekãa ni wɔtsɛɔ mɛi kɛbaa ejaakɛ asa lɛ nɔ yɛ fɛo ni emli tse. Shi kɛlɛ, ebiɔ nitsumɔ koni anyɛ ahiɛ lɛ nakai. Nyɛkwɛa nyɛ asa lɛ nɔ kɛbɔlea. Ani sɛii, shikpɔŋ lɛ, kɛ gbogboi lɛ ahe tse? Ani ashaa nushwiemɔ hei loo niiaŋyaa hei lɛ daa? Kɛ wɔmiina shikpɔŋ ni ewo muji loo gbogboi ni amɛhe pɛŋtei lɛ miikpɔlɔ loo ni akɛ dɛ kɛ niji ewo he muji ni jeee wɔhe sane ko lɛ, etsɛŋ ni wɔbaana akɛ eji nɔ ko ni sane ko kwraa bɛ he ni yɔɔ hiŋmɛi nɔ. Shi kɛlɛ, gbɔi ni enɛ ji klɛŋklɛŋ be kwraa ni amɛbaa Asa lɛ nɔ lɛ baanyɛ ana jwɛŋmɔ fɔŋ yɛ enɛ he. Esa akɛ wɔfee bɔ fɛɛ bɔ ni wɔɔnyɛ ni wɔha wɔ asa lɛ nɔ afee he ko ni yɔɔ hiŋmɛi nɔ ni yɔɔ fɛo daa, koni wɔtsu wɔgbɛfaŋnɔ kɛ be shɛ kɛha jɛmɛ saamɔ.
7 Wɔbaanyɛ wɔwo Nyɔŋmɔ hiɛ nyam kɛtsɔ wɔhesaamɔ kɛ wɔshiai, lɔlei ni wɔteŋ mɛi komɛi yɔɔ lɛ, kɛ Maŋtsɛyeli Asai lɛ amlitsemɔ nɔ, ni jeee kɛtsɔ wiemɔ nɔ. Wɔ nɔkwɛmɔ nɔ kpakpa lɛ etɔtɔŋ mɔ ko nane shi moŋ ebaaye odase akɛ wɔ jamɔ lɛ he tse ni eja hu.—1 Kor. 10:31, 32; Yak. 1:27.