Ani Ehe Miihia ni Miya nɔ Mitsake?

Wɔ Maŋtsɛyeli Sɔɔmɔ lɛ eko fɛɛ eko kɛ Ŋmalɛ mli shiɛmɔ wiemɔi sɔrɔtoi ni wɔbaanyɛ ni wɔkɛtsu nii beni wɔyeɔ odase lɛ haa wɔ. Maŋtsɛyeli shiɛlɔi pii ni yɔɔ ekãa lɛ miisumɔ waa ni amɛna susumɔ heei ni amɛkɛ gbɛi sɔrɔtoi heei atsu nii. Wɔ Maŋtsɛyeli Sɔɔmɔ lɛ tsuɔ enɛɛmɛi ahe nii kɛtsɔɔ ŋaawoi sɔrɔtoi pii ni ekɛhaa yɛ daa nyɔŋ nɔ lɛ nɔ.

Shi ekolɛ onuuu he akɛ ehe miihia ni oya nɔ otsake nɔ ni okɛtsuɔ nii lɛ. Ekolɛ ŋmɛlɛtswaa fioo ko pɛ onaa daa nyɔŋ nɔ ni okɛ ohe woɔ shia kɛ shia nitsumɔ lɛ mli. Ekolɛ yɛ be kpalaŋŋ sɛɛ lɛ ona shiɛmɔ wiemɔi komɛi ni ŋɔɔ onaa ni okɛtsuɔ nii, ni ekɛ nitsumɔ woɔ yibii hu. Ekolɛ okɛ ohe fɔɔ ŋmalɛi komɛi ni okɛfɔɔ nitsumɔ nɔ, ni Lala 37:​9-11, 2 Petro 3:​13, Kpojiemɔ 21:⁠4, kɛ ekrokomɛi fata he. Kɛji nakai lɛ, ehe ehiaaa ni onu he akɛ gbɛnaa nii ka onɔ akɛ otsake mli shii abɔ kɛya nɔ kroko nɔ. Oti ni ma wɔhiɛ ji ni wɔwie Maŋtsɛyeli hiɛnɔkamɔ lɛ he wɔtsɔɔ mɛi krokomɛi, koni wɔye wɔbua amɛ ni amɛkase nɔ ni esa akɛ amɛfee ni Yehowa jɔɔmɔ afee nɔ ni sa amɛ. Kɛ ona shiɛmɔ wiemɔi komɛi ni sa jogbaŋŋ yɛ ebe naa yɛ Reasoning wolo lɛ mli ni oosumɔ ni okɛtsu nii, ni amɛkɛ nitsumɔ yeɔ omanye lɛ, kaashashao shi akɛ okɛ nomɛi aaatsu nii.