Asafo Woloŋ Nikasemɔ Haa Tsɔsemɔ he Gbɛjianɔtoi Shwereɔ
1 Asafo Woloŋ Nikasemɔ lɛ tsuɔ nitsumɔ ni he hiaa he nii yɛ Yehowa tsɔsemɔ he gbɛjianɔtoo lɛ mli. Woloŋ nikasemɔ kui lɛ egbɛ eshwa shikpɔŋkuku lɛ mli fɛɛ, ni enɛ haa mɔ fɛɛ mɔ nyɛɔ eyaa eko ni naagba ko kwraa bɛ mli. Kɛ afeɔ nikasemɔ yɛ nyɛ diɛŋtsɛ nyɛ akutso mli lɛ, mɛi ni yɔɔ he miishɛɛ lɛ baanyɛ akpɛlɛ nine ni afɔɔ atsɛɔ amɛ koni amɛya eko lɛ nɔ amrɔ nɔŋŋ.
2 Abɔɔ mɔdɛŋ koni aha kuu fɛɛ kuu afee nɔ ni mɛi fioo yɔɔ mli. Enɛ haa nikasemɔ nɔkwɛlɔ lɛ yeɔ ebuaa mɔ fɛɛ mɔ aŋkroaŋkro. Jeee mɔ fɛɛ mɔ kaseɔ nii kɛ nɔyaa kome too lɛ nɔŋŋ. Kɛ ewa ha mɔ ko akɛ eeenu oti ko shishi beni ekase nii lɛ kɛtsɔ hiɛ po lɛ, ekolɛ nikasemɔ nɔkwɛlɔ lɛ baatsɔɔ mli ekoŋŋ kɛ agbe nikasemɔ lɛ naa. Kɛfata he lɛ, kɛ kuu lɛ edaaa lɛ, hegbɛi sɔrɔtoi babaoo yɛ akɛ aaaha sanebimɔi ahetoo ni akane ŋmalɛi. Ani okɛ ohe woɔ sanegbaa lɛ mli kɛtsɔɔ sane hetoohamɔ nɔ daa? Ani obɔɔ mɔdɛŋ akɛ oha sanebimɔi ahetoo yɛ bo diɛŋtsɛ owiemɔ mli? Ni okɛ ohe aaawo mli amrɔ nɔŋŋ lɛ he baanyɛ aba sɛɛnamɔ aha bo kɛ mɛi krokomɛi. Be mli ni osaa ohe lɛ, okɛ ojwɛŋmɔŋ nyɛmɔi atsu nii koni oyoo bɔ ni ooonyɛ okɛ nika semɔ lɛ mli otii komɛi atsu nii.—Heb. 5:14.
3 Kɛ okadi nitsɔɔmɔi gbɛi sɔrɔtoi ni woloŋ nikasemɔ nɔkwɛlɔ lɛ kɛtsuɔ nii lɛ, obaanyɛ okase bɔ ni afeɔ shia Biblia mli nikase mɔi yɛ gbɛ ni baaha efee miishɛɛ ni tsɔɔ mɔ nii jogbaŋŋ lɛ nɔ. Beni nyɛminuu ni he esa lɛ ekane kukuji lɛ egbe naa lɛ, asusuɔ sanebimɔi lɛ ahe. Nikasemɔ nɔkwɛlɔ lɛ woɔ mɛi fɛɛ hewalɛ koni awie ni anu. Kɛ be yɛ lɛ, ebɔɔ mɔdɛŋ ni eha awie ŋmalɛi ni aŋmala emli wiemɔi lɛ ahe jogbaŋŋ koni eye ebua ni wɔnu bɔ ni ekɔɔ nikasemɔ lɛ he ehaa lɛ shishi. (Okɛto Nehemia 8:8 he.) Bei komɛi lɛ ekɛ lɛ diɛŋtsɛ ewiemɔ kuku ko ni baaha sane lɛ afee faŋŋ lɛ fataa he loo ekɛ sanebimɔi ni baaye abua tsuɔ nii koni ekɛha oti ko aje kpo faŋŋ. Ekolɛ nɔkwɛmɔ nɔ loo mfoniri ko ni aaafee baaye abua koni wɔna bɔ ni sane lɛ saa wɔshihilɛi ahe ehaa.
4 Kpeei ni ayaa yɛ Asafo Woloŋ Nikasemɔi komɛi amli lɛ eba shi kwraa. Ani oyaa daa? Kɛ jeee nakai lɛ, oolaaje gbɛjianɔtoo ko ni he hiaa. Woloŋ nikasemɔ he gbɛjianɔtoo lɛ ji gbɛi sɔrɔtoi ni Yehowa tsɔɔ nɔ ejieɔ bɔ ni ejwɛŋɔ wɔhe ehaa lɛ ateŋ ekome. (1 Pet. 5:7) Eesumɔ ni wɔya hiɛ yɛ nilee kɛ ŋaalee mli koni wɔhe awa waa yɛ mumɔŋ. Yɛ gbɛ kroko nɔ lɛ, Satan baasumɔ ni wɔmumɔŋ hiɛyaa loo dalɛ lɛ afee nɔ ni yaa lɛ nyaa ni egbɔjɔ wɔ bɔni afee ni wɔfee mɛi ni wɔhe bɛ sɛɛnamɔ tsɔ kɛha Yehowa kɛ E-gbɛjianɔtoo lɛ. Kaaha enɛ miiba lɛ nakai! Ha shihilɛ ni yɔɔ miishɛɛ, ni suɔmɔ yɔɔ mli yɛ nɛkɛ kuu ni ekomefeemɔ yɔɔ mli nɛɛ asa otsui he ni ekanya bo ni oya nɔ ojie Yehowa yi.—Okɛto Lala 111:1 he.
5 Ato kpeei sɔrɔtoi kɛha shiɛmɔyaa ni hi kɛha shiɛlɔi lɛ yɛ woloŋ nikasemɔ hei pii amli lɛ ahe gbɛjianɔ. Enɛɛmɛi baanyɛ afee otsi teŋ, otsi lɛ naagbee, loo gbɛkɛnaashi odaseyeli. Woloŋ nika semɔ nɔkwɛlɔ lɛ kwɛɔ koni ana akɛ ayɛ shikpɔŋkuku ni da, ni ákɛ mɔ ko baaba jɛi koni enyiɛ shiɛmɔyaa lɛ hiɛ. Esa akɛ kpeei kɛha shiɛmɔ yaa lɛ afee nɔ ni sɛɛ etsɛɛɛ fe minitii 10-15. Nikasemɔ nɔkwɛlɔ lɛ baanyɛ asusu daa gbi ŋmalɛ lɛ he kuku kɛji ekɔɔ wɔshiɛmɔ nitsumɔ lɛ he koni ekɛ ŋaawoo pɔtɛɛ kome loo enyɔ aha yɛ shiɛmɔ nitsumɔ lɛ he loo ekɛ nɔkwɛmɔ nɔ kuku ko aha yɛ wolo ni akɛhaa yɛ nakai be lɛ mli lɛ he.
6 Beni be yaa nɔ lɛ nikasemɔ nɔkwɛlɔ lɛ bɔɔ mɔdɛŋ koni lɛ diɛŋtsɛ lɛ ekɛ mɛi fɛɛ ni yɔɔ ekuu lɛ mli lɛ atsu nii aŋkroaŋkro, ni ekɛ hewalɛwoo kɛ tsɔsemɔ ni sa aha.—Okɛto Marko 3:14 he; Luka 8:1.