Le Onyɛmimɛi lɛ Jogbaŋŋ
1 Wɔkɛ wɔnanemɛi jálɔi ateŋ wekukpaa lɛ biɔ babaoo fe ni wɔkɛ amɛ aaaya kpeei yɛ Maŋtsɛyeli Asa lɛ nɔ kɛkɛ. Nyɔŋmɔ suɔmɔnaa nifeelɔi ji wɔ, ni no haa wɔyajeɔ wɔkɛ Yesu teŋ mumɔŋ wekukpaa ko mli. (Mar. 3:34, 35) No hu haa wɔkɛ mɛi krokomɛi, ni ji wɔ mumɔŋ nyɛmimɛi hii kɛ yei ni yɔɔ Kristofoi asafo lɛ mli, ni awoɔ wɔ kita akɛ wɔsumɔ amɛ lɛ, hiɔ mumɔŋ weku-feemɔ shihilɛ ko mli. (Yoh. 13:35) Enɛ hewɔ lɛ, esa akɛ mɛi ni kɛ “Nyɔŋmɔ webii” lɛ bɔɔ lɛ abɔ mɔdɛŋ waa ni amɛle amɛhe jogbaŋŋ.—Efes. 2:19.
2 Le Onyɛmimɛi lɛ Kɛ Amɛgbɛi: Ani ole nyɛmimɛi hii kɛ yei ni yɔɔ nyɛ Asafo Woloŋ Nikasemɔ kuu lɛ mli lɛ fɛɛ agbɛi? Bei pii lɛ kuu lɛ edaaa, ni enɛ haa efeɔ mlɛo akɛ aaale mɛi ni baa kpee yɛ kuu lɛ mli lɛ ateŋ mɛi pii agbɛi, kɛ jeee amɛ fɛɛ po lɛ. Kɛji oleee amɛgbɛi po lɛ, ani obaanyɛ okɛɛ akɛ ole amɛ jogbaŋŋ?
3 Ni le ni ooole mɛi krokomɛi hu ni baa kpeei yɛ Maŋtsɛyeli Asa lɛ nɔ, ní gbekɛbii fata he lɛ hu? Ekolɛ nɔ ni wɔfɔɔ feemɔ ji wɔnanemɛi akuu bibioo ko ni wɔkɛ amɛ bɔɔ. Eyɛ mli akɛ ejeee tɔmɔ akɛ aaana mɛi komɛi kɛ naanyobɔɔ daa mli ŋɔɔmɔ moŋ, shi wɔsumɔŋ ni wɔtsĩ wɔ suɔmɔ ŋamɔi kɛ sanegbaa ni tswaa mɔ emaa shi lɛ naa wɔha mɛi fioo ko pɛ kɛkɛ. Esa akɛ wɔha ‘wɔmli alɛɛ,’ ni wɔbɔ mɔdɛŋ waa akɛ wɔɔle wɔnyɛmimɛi hii kɛ yei lɛ fɛɛ jogbaŋŋ. (2 Kor. 6:11-13) Eka shi faŋŋ akɛ, nɔ ni baafata enɛ he ji le ni wɔɔle amɛ kɛ amɛgbɛi.
4 Esa akɛ nyɛmimɛi hii ni kwɛɔ asafoŋ kpeei anɔ lɛ abɔ mɔdɛŋ ni amɛle mɛi fɛɛ ni baa lɛ agbɛi. Wiemɔ kpoku lɛ nɔ ni ajɛɔ atsɛɔ mɔ fɛɛ mɔ kɛ egbɛi lɛ haa amɛnuɔ he akɛ hiɛ sɔɔ wiemɔi ni amɛwieɔ lɛ, ni yɛ nakai beaŋ nɔŋŋ lɛ, eyeɔ ebuaa mɛi krokomɛi hu ni amɛle amɛgbɛi. Shi yɛ anɔkwale mli lɛ, mɛi heei aloo gbɔi komɛi baafata toibolɔi lɛ ahe be fɛɛ be, ni enɛ haa ewaa kɛhaa mɔ fɛɛ mɔ akɛ eeele mɛi lɛ fɛɛ agbɛi. Shi kɛlɛ, mɔdɛŋbɔɔ diɛŋtsɛ ni wɔkɛaaya nɔ daa lɛ woɔ mɛi krokomɛi hewalɛ, ni ejieɔ mɛi krokomɛi ahe anɔkwa miishɛɛ ni wɔyɔɔ lɛ hu kpo.—Rom. 1:11, 12.
5 Ŋɔɔ Hegbɛ lɛ ni Okɛle Mɛi Krokomɛi Jogbaŋŋ: Bei pii lɛ, nɔkwɛlɔi gbɛfalɔi nyɛɔ amɛleɔ nyɛmimɛi hii kɛ yei babaoo jogbaŋŋ. Mɛɛ gbɛi anɔ amɛfeɔ enɛ yɛ? Yɛ gbɛi titrii etɛ nɔ: (1) Amɛkɛ amɛ tsuɔ nii daa yɛ sɔɔmɔ nitsumɔ lɛ mli; (2) kɛ amɛshihilɛi baaŋmɛ gbɛ lɛ, amɛkpɛlɛɔ ninefɔɔ nɔ, ni amɛyasaraa amɛ yɛ amɛshiai; kɛ (3) amɛŋɔɔ hegbɛ lɛ ni amɛŋaa onukpai kɛ gbekɛbii fɛɛ yɛ kpeei ashishi.
6 Ani oona gbɛi ni oootsɔ nɔ olɛɛ onaanyobɔɔi amli koni otsɔ nɔ okɛle onyɛmimɛi lɛ jogbaŋŋ lɛ? Eyɛ faŋŋ akɛ wɔbaanyɛ wɔfɔ̃ mɛi krokomɛi nine ni amɛfata wɔhe yɛ shiɛmɔ nitsumɔ lɛ mli. Shia kɛ shia shiɛmɔ, sɛɛsaramɔi afeemɔ, Biblia mli nikasemɔi afeemɔ, aloo woji tɛtrɛbii ni wɔkɛaaye odase yɛ gbɛjegbɛi ahe lɛ fɛɛ ji gbɛi ni hi jogbaŋŋ ni wɔɔnyɛ wɔtsɔ nɔ wɔle mɛi krokomɛi jogbaŋŋ. Ehi hu akɛ ooofɔ̃ mɛi krokomɛi nine ni amɛbasara bo yɛ shia, ekolɛ koni okɛ amɛ aye nii loo nyɛjie nyɛhiɛtserɛ fioo yɛ be ko mli. Hegbɛ ni wɔɔŋɔ ni wɔbɛŋkɛ mɛi heei aloo mɛi ni hiɛ gboɔ fioo lɛ feɔ babaoo, jeee ni etswa amɛ ema shi yɛ mumɔŋ kɛkɛ, shi moŋ ekɛ sɛɛnamɔi babaoo hu baa.—Bɔf. 20:35; 1 Tes. 5:11.
7 Paulo le enyɛmimɛi lɛ jogbaŋŋ. Amɛteŋ mɛi pii agbɛi atã ni etsĩ yɛ ewoji lɛ amli lɛ ji amɛhe miishɛɛ ni eyɔɔ ni pɛsɛmkunya bɛ mli, kɛ anɔkwa suɔmɔ hu ni eyɔɔ kɛha amɛ lɛ he odaseyeli. (1 Tes. 2:17; 2 Tim. 4:19, 20) Mɔdɛŋ ni wɔɔbɔ akɛ wɔɔle wɔnyɛmimɛi lɛ jogbaŋŋ lɛ baatsɔ jɔɔmɔi kɛha wɔ fɛɛ.