Ye Obua Mɛi ni Yɔɔ He Miishɛɛ lɛ Yɛ Suɔmɔ Mli

¹ Beni Yehowa ŋwɛibɔfo tsɔɔ kaselɔ Filipo gbɛ kɛtee Etiopianyo ko ni kɛ anɔkwayeli na Nyɔŋmɔ anɔkwale Wiemɔ lɛ he miishɛɛ lɛ ŋɔɔ lɛ, ekɛ ehe ha koni eye ebua lɛ yɛ suɔmɔ mli koni enu nɔ ni ekaneɔ lɛ shishi. (Bɔf. 8:​26-39) Ani wɔbɔɔ mɔdɛŋ jogbaŋŋ koni wɔye wɔbua mɛi ni naa he miishɛɛ lɛ? Esa akɛ wɔye wɔbua amɛ, ejaakɛ kaselɔi afeemɔ lɛ fata ŋwɛi famɔ ni akɛha wɔ lɛ he. (Mat. 28:​19, 20) Mɛni wɔbaanyɛ wɔfee koni wɔye wɔbua amɛ?

² Too be oma shi daa otsi kɛha sɛɛsaramɔi. Too gbɛjianɔ koni oyasara mɛi ni jie miishɛɛ kpo lɛ, koni obɔ mɔdɛŋ ni osaa oje Ŋmalɛ mli sanegbaa ni nyɛje shishi beni oyasara lɛ klɛŋklɛŋ lɛ shishi. Ha oti lɛ ahi ojwɛŋmɔ mli akɛ oooje Biblia mli nikasemɔ shishi. Yaa eŋɔɔ daa koni okɛ Buu-Mɔɔ kɛ Awake! heei ni baa lɛ eko ayaha lɛ, yɛ be mli ni owoɔ nikaselɔ lɛ hewalɛ koni eshɛ.

³ Kɛ nyɛgba sɛɛnamɔ ni yɔɔ Biblia lɛ he beni oyasara lɛ klɛŋklɛŋ lɛ, obaanyɛ osaa oje sanegbaa lɛ shishi, beni okɛ ŋaawoo ni jɛ “Reasoning” wolo lɛ baafa 66 tsuɔ he nii lɛ ni okɛɛ nɔ ko tamɔ nɛkɛ:

◼ “Mɛi komɛi susuɔ akɛ Biblia mli ŋaawoo lɛ he bɛ sɛɛnamɔ yɛ wɔ ŋmɛnɛŋmɛnɛ je nɛɛ mli. Te onuɔ he ohaa tɛŋŋ? [Ha ni eha hetoo.] Ani okpɛlɛɛɛ nɔ akɛ abaanyɛ akɛ wolo ni kɛ ŋaawoo kpakpa haa ni baanyɛ eha wɔna weku shihilɛ ni yɔɔ miishɛɛ lɛ atsu nii jogbaŋŋ? [Ha ni ewie.] Saji ni aka hiɛ awie kɛ nifeemɔi ni kɔɔ weku shihilɛ he lɛ etsake, ni nɔ ni ejɛ mli eba ni wɔnaa ŋmɛnɛ lɛ ehiii. Shi kɛ hoo kwraa lɛ wekui ni kɛ nɔ ni Biblia kɛɔ lɛ tsuɔ nii lɛ hiɔ shi jogbaŋŋ ni amɛyɛ miishɛɛ.” Kanemɔ Kolosebii 3:​18-21. Okɛ dɛhiɛmɔ wolo ni ji, Nɔ Hewɔ ni Obaanyɛ Okɛ Ohe Afɔ Biblia lɛ Nɔ lɛ aha, ni otsɔɔ mli akɛ wɔtoɔ Biblia nikasemɔ he gbɛjianɔ ni wɔheee nɔ ko.

⁴ Obaanyɛ oje sanegbaa ni kɔɔ adesai ateŋ sharamɔ ni yaa nɔ efiteɔ lɛ he lɛ shishi yɛ nɛkɛ gbɛ nɔ:

◼ “Bɔ ni mɛi shweɔ ni amɛna amɛkɛ mɛi krokomɛi ateŋ wekukpaa kpakpa lɛ ji sane ko ni asusuɔ he waa diɛŋtsɛ yɛ wɔ bei nɛɛ amli. Mɛi pii wieɔ bɔ ni je lɛ efee he ko ni naanyobɔɔ su ni ajieɔ lɛ kpo atsɔɔ mɛi lɛ nɔ gbɔɔ be fɛɛ be lɛ he. Mɛni osusuɔ akɛ no kɛ naagba lɛ ba? [Ha ni eha hetoo.] Nɔ ni mɛi komɛi fɔɔ feemɔ ji ni amɛaaha mɛi krokomɛi afatɔɔi lɛ afee tamɔ nɔ ni mli wa tsɔ yɛ be mli ni amɛkuɔ amɛhiɛ amɛshwieɔ amɛnɔ nɔ lɛ. Enɛ baanyɛ atee béi shi yɛ nitsumɔ he kɛ shia mli hu. Bo nɔ ni Biblia lɛ kɛɔ ni tsɔɔ nɔ ni baanyɛ eha ana naanyobɔɔ kpakpa lɛ toi. [Kanemɔ Efesobii 4:32.] Nyɔŋmɔ ewo shi akɛ ebaabua gbɔmɛi sɔrɔtoi fɛɛ anaa efee amɛ weku kome yɛ e-Maŋtsɛyeli lɛ shishi.” Gbelemɔ Septem­ber 15, 1994 Buu-Mɔɔ lɛ loo Obaanyɛ Ohi Shi wolo lɛ baafai 234-237 lɛ.

⁵ Kɛ oosumɔ ni okɛ sane mlitsɔɔmɔ aha lolo ni tsɔɔ nɔ ni ji Biblia lɛ jwɛŋmɔ yɛ Triniti tsɔɔmɔ lɛ he lɛ, ooonyɛ owie nɔ ko tamɔ nɛkɛ:

◼ “Mɛi komɛi heɔ yeɔ akɛ Mɛi krɔŋkrɔŋi etɛ yɔɔ, amɛteŋ mɔ ko nɔ kwɔɔɔ fe mɔ kroko loo akɛ mɔ ko baaa shi fe mɔ kroko lɛ, ni awieɔ akɛ Nyɔŋmɔ ji amɛ fɛɛ. Ani Yesu ewie pɛŋ akɛ Nyɔŋmɔ ji lɛ? [Ha ni eha hetoo.] Biblia lɛ tsɔɔ akɛ wekukpaa ni ka Nyɔŋmɔ Ofe lɛ kɛ Yesu Kristo teŋ lɛ tamɔ nɔ ni ka tsɛ kɛ ebi teŋ lɛ, ni amɛji mɛi sɔrɔtoi enyɔ.” [Kanemɔ Yohane 12:28.] Maa nɔ mi akɛ Nyɔŋmɔ kɛ e-Bi lɛ he anɔkwa nilee ni aaana lɛ haa mɔ naanɔ wala. (Yoh. 17:⁠3) Kɛɛmɔ lɛ akɛ obaasaa oba ekoŋŋ koni nyɛbasusu saneyitso lɛ he lolo beni okɛ wolo tɛtrɛɛ lɛ loo sane ni jɛ Reasoning wolo lɛ mli baafai 405-26 tsuɔ he nii lɛ.

⁶ Etiopia piafonyo lɛ kpɛlɛ nyɛmɔ ni ebɛ ni ekɛaanu shishi kɛji mɔ ko bɛ ni baaye abua lɛ lɛ nɔ. (Bɔf. 8:31) Filipo kɛ yelikɛbuamɔ ni he hiaa lɛ ha lɛ yɛ suɔmɔ mli. Wɔbaanyɛ wɔjie anɔkwa suɔmɔ ni wɔyɔɔ lɛ kpo wɔtsɔɔ mɛi krokomɛi yɛ nakai gbɛ nɔ nɔŋŋ.