“Nyɛshia Kpe”
1 Beni Yesu wie wiemɔi ni aŋma yɛ Mateo 26:38-41 lɛ, no mli lɛ eebɛŋkɛ eshihilɛ akɛ adesa lɛ mli jaramɔ be ni fe fɛɛ lɛ he. No baafee be ni he hiaa fe fɛɛ yɛ adesai ayinɔsane be fɛɛ mli. Adesai fɛɛ ayiwalaheremɔ he eba sane. Ehe miihia ni Yesu kaselɔi lɛ ‘ashĩ kpe.’
2 Ŋmɛnɛ, wɔbɛŋkɛ be ni Yesu baaba ebatsu nitsumɔi enyɔ, ni ji kpɔlɔ kɛ hiɛkpatalɔ lɛ he kpaakpa. Akɛ Kristofoi ni shĩɔ kpe ni amɛyooɔ bɔ ni wɔbe nɛɛ he hiaa ha lɛ, wɔkotaaa wɔniji kɛkɛ ni wɔɔtara shi ni wɔmɛ kpɔmɔ. Wɔle akɛ esa akɛ wɔfee klalo be fɛɛ be. Ehe miihia ni wɔya nɔ ‘wɔgbo deŋme ni wɔmia wɔhiɛ waa’ yɛ sɔɔmɔ ni wɔkɛhaa Yehowa lɛ mli. (1 Tim. 4:10) Shi wɔteŋ mɔ fɛɛ mɔ aŋkroaŋkro hu? Ani wɔmiishi kpe?
3 Wɔmli ni Wɔɔpɛi Wɔkwɛ: Yesu bɔ kɔkɔ hu akɛ: “Nyɛhiɛ ahia nyɛhe nɔ.” (Luka 21:34, 35) Esa akɛ wɔhiɛ ahi wɔhe nɔ jogbaŋŋ, ni wɔkwɛ ni wɔhe “akahi shwamɔ, ni [wɔfee] mɛi krɔŋŋi . . . yɛ yinɔ kɔɔdɔŋ ni bɛ eŋɛlɛ nɔ nɛɛ teŋ.” (Fil. 2:15) Ani wɔhiɔ shi daa gbi akɛ Kristofoi, ni wɔkaseɔ Yesu, ni wɔnyiɛɔ yɛ shishitoo mlai ni atsɔɔ yɛ Nyɔŋmɔ Wiemɔ lɛ mli lɛ naa? Esa akɛ wɔtsi wɔhe kɛjɛ subaŋi gbohii ni kadiɔ jeŋ ni “kã mɔ fɔŋ lɛ [hewalɛ] mli” nɛɛ he. (1 Yoh. 5:19; Rom. 13:11-14) Kɛ wɔdamɔ Ŋmalɛi lɛ anɔ wɔpɛi wɔ diɛŋtsɛ wɔmli wɔkwɛ lɛ, ani wɔmiishi kpe lɛlɛŋ taakɛ Yesu fã ni wɔfee lɛ?
4 Esa akɛ onukpai lɛ ahiɛ ahi amɛhe nɔ ni amɛkɛ ekaa atsu amɛnitsumɔi yɛ asafo lɛ mli lɛ ahe nii, ni amɛyoo akɛ amɛbaabu bɔ ni amɛkwɛɔ asafoku lɛ amɛhaa lɛ he akɔntaa. (Heb. 13:17) Weku yitsei yɛ gbɛnaa nii krɛdɛɛ ko akɛ amɛkudɔ amɛ shiabii lɛ kɛnyiɛ Yehowa gbɛi anɔ. (1 Mose 18:19; Yosh. 24:15; okɛto 1 Timoteo 3:4, 5 he.) Agbɛnɛ hu, kwɛ bɔ ni ehe hiaa waa akɛ wɔteŋ mɔ fɛɛ mɔ atsu Ŋmalɛ naa famɔ akɛ wɔsumɔ wɔhe lɛ he nii! Eji anɔkwa Kristojamɔ kadimɔ nii.—Yoh. 13:35.
5 Ohiɛ Ahi Ohe nɔ ni Obɔ Mɛi Krokomɛi Kɔkɔ: Kpe ni wɔɔshi lɛ biɔ babaoo fe wɔhiɛ ni aaahi wɔhe nɔ kɛkɛ. Wɔyɛ nitsumɔ ni aha wɔ akɛ wɔfee mɛi krokomɛi kaselɔi. (Mat. 28:19, 20) Esa akɛ naanyo suɔmɔ atsirɛ wɔ ni wɔbɔ mɛi krokomɛi kɔkɔ koni amɛyi ana wala kɛfo hiɛkpatamɔ ni ka je nɛɛ hiɛ lɛ. Enɛ ji nitsumɔ ni ka Kristofoi fɛɛ nɔ. Eji wɔjamɔ lɛ fã ko ni he hiaa waa. (Rom. 10:9, 10; 1 Kor. 9:16) Bei pii lɛ, wɔkɛ shikpilikpii-feemɔ loo yiwalaheremɔ nitsumɔ nɛɛ he shitee-kɛ-woo diɛŋtsɛ kpeɔ. Eji sɔ̃ ni ka wɔnɔ akɛ wɔya nɔ, kɛji mɛi babaoo kpoo wɔ kɔkɔbɔɔ lɛ po. (Ezek. 33:8, 9) Anɔkwa suɔmɔ ni wɔyɔɔ kɛha Nyɔŋmɔ kɛ wɔnaanyo lɛ baatsirɛ wɔ ni wɔya nɔ daa.
6 Jeee be ni akɛfeɔ shikpilikpii nɛ. Nakai nɔŋŋ hu esaaa ni wɔŋmɛɔ daa gbi shihilɛi mli haomɔi agbɛ ni amɛgbalaa wɔjwɛŋmɔ, aloo wɔkɛ wɔhe woɔ gbɛjianɔtoo nɛɛ miishɛɛnamɔi amli aahu akɛ amɛbatsɔ tsɔne kɛha wɔ. (Luka 21:34, 35) Kɛji oyaiyeli he ehia waa be ko lɛ, nakai be lɛ ji amrɔ nɛɛ. Be ni Yesu Kristo kɛbaatsu kojomɔ he nii yɛ gbɛjianɔtoo fɔŋ nɛɛ nɔ lɛ miibɛŋkɛ oyayaayai. Mɛi ni wɔko, ni amɛhiɛ yɔɔ amɛhe nɔ, ni amɛshiɔ kpe lɛ pɛ baana yibaamɔ. Kɛ wɔbo Yesu famɔi lɛ atoi ni “[wɔnyɛ] nii ni baaba nɛɛ fɛɛ mli [wɔje]” lɛ, kwɛ bɔ ni wɔɔda shi waa wɔha!—Luka 21:36.