Ŋmalɛ Fɛɛ Ŋmalɛ Hi Hã Nitsɔɔmɔ
1 Susumɔi ni kɔɔ sɛɛnamɔ ni yɔɔ Biblia lɛ he lɛ fa ni eyɛ sɔrɔtoi. Shi kɛlɛ, wɔyɛ nɔmimaa akɛ adesai anaagbai ni mli wa lɛ anaa tsabaa kɛ gbɛtsɔɔmɔ hu kɛha shihilɛ gbɛ lɛ, yɛ ebaafai lɛ amli. (Abɛi 3:5, 6) Nɔ ko kwraa bɛ ni kɛ emli ŋaawoo lɛ yeɔ egbɔ. Nɔ ko kwraa bɛ ni hi fe jeŋba he tɛi ni efiɔ sɛɛ lɛ. Emli shɛɛ sane lɛ yɛ hewalɛ, “ni eji tsuiiaŋ susumɔi kɛ jwɛŋmɔi lɛ akojolɔ.” (Heb. 4:12) Mɛɛ gbɛ nɔ wɔɔtsɔ wɔye wɔbua mɛi krokomɛi ni amɛna bɔ ni ehe hiaa ha akɛ amɛaakɔ wolo nɛɛ kɛjɛ amɛ wojiatoo he lɛ koni amɛkwɛ mli jogbaŋŋ? Ekolɛ obaasumɔ ni oka ŋaawoi ni nyiɛ sɛɛ lɛ ekomɛi okwɛ yɛ be mli ni okɛ New World Translation kɛ The Bible—God’s Word or Man’s wolo lɛ haa yɛ November mli lɛ.
2 Akɛni mɛi babaoo haoɔ yɛ amɛhiamɔ nii ahe nitsumɔ mli hewɔ lɛ, ekolɛ gbɛ ni tamɔ nɛkɛ baagbala amɛjwɛŋmɔ:
◼ “Mɛi babaoo ni mikɛ amɛ wie yɛ gbii nɛɛ amli lɛ haoɔ yɛ amɛ shika he gbɛnaa nii ahe nitsumɔ mli. Heloonaa nii asɛɛdii etsɔ mɛi babaoo atsɔne, ni enɛ kɛ nɔnyɛɛ baa. Nɛgbɛ ji he ni hi fe fɛɛ ni aaatsɔ kɛaaya kɛha ŋaawoo yɛ saji ni tamɔ nɛkɛ he? [Ŋmɛɛ gbɛ ni ewie.] Mina akɛ Biblia lɛ kɛ ŋaawoi kpakpai haa yɛ nibii ni baanyɛ aye abua ni wɔkwa naagbai ni he ehiaaa lɛ ahe. Ha matsɔɔ bo ehe nɔkwɛmɔ nɔ ko.” Gbelemɔ The Bible—God’s Word or Man’s? wolo lɛ baafa 163 ni okane 1 Timoteo 6:9, 10 lɛ ni aŋma emli wiemɔi yɛ kuku 3 lɛ. Wiemɔ kuku 4 lɛ he fioo, ni no sɛɛ lɛ okɛ wolo lɛ aha.
3 Naa ŋaawoo kroko ni obaasumɔ ni osusu he:
◼ “Be fɛɛ be ni wɔɔkane adafitswaa wolo loo wɔɔbo adafitswaa sane ko toi lɛ, wɔnuɔ naagba kroko ni haoɔ mɔ, ni ehaa mɔ feɔ yeyeeye he. [Tsii haomɔ ko ni eba ni eje kpo nyɛsɛɛ nɛɛ yɛ adafitswaa mli lɛ tã.] Te wɔɔfee tɛŋŋ wɔnyɛ wɔdamɔ naagbai ni tamɔ nɛkɛ naa? [Ŋmɛɛ gbɛ ni ewie.] Yɛ 1983 mli tɔ̃ɔ lɛ, [Ronald Reagan] ni no mli lɛ eji United States maŋ hiɛnyiɛlɔ lɛ kɛɛ akɛ Biblia lɛ hiɛ shɛɛ sane kpele fe fɛɛ eko ni aŋma, ni ‘naagbai fɛɛ ni adesa kɛkpe pɛŋ lɛ naa tsabaa yɛ ebaafai lɛ amli.’ Nɔ ni ekɛɛ lɛ haa wɔkaiɔ nɔ ni Biblia lɛ diɛŋtsɛ kɛɛ lɛ. [Kanemɔ 2 Timoteo 3:16, 17.] Ha matsɔɔ bo nɔ hewɔ ni wɔbaanyɛ wɔna nɔmimaa yɛ Biblia lɛ mli.” Tsɔɔmɔ saji otii komɛi yɛ Nɔ Hewɔ ni Obaanyɛ Okɛ Ohe Afɔ Biblia lɛ Nɔ dɛhiɛmɔ wolo lɛ mli. Kɛɛmɔ lɛ akɛ obaaba ekoŋŋ koni nyɛsusu bɔ ni Biblia mli gbalɛi ni baa mli yɛ ŋmɛnɛŋmɛnɛ jeŋ saji amli lɛ sa kadimɔ ha lɛ he.
4 Kɛ mɛi ni sumɔɔɔ jamɔ lɛ ayi fa yɛ oshikpɔŋkuku lɛ mli lɛ, obaanyɛ oka gbɛ ni tamɔ nɛkɛ okwɛ:
◼ “Mɛi ni yɔɔ akutso nɛɛ mli lɛ ateŋ mɛi pii buɔ woji krɔŋkrɔŋi komɛi akɛ nɔ ni teɔ shi woɔ amɛhe, ni nɔ ko kwraa bɛ mli akɛ ja adesãi. Amɛna ni afee nibii gbohii babaoo yɛ jamɔ gbɛi amli ni amɛbɛ hekɛnɔfɔɔ yɛ Biblia lɛ mli po. Eji anɔkwale akɛ, mɛi babaoo diɛŋtsɛ miisusu kɛ́ Biblia lɛ ji Nyɔŋmɔ Wiemɔ loo gbɔmɔ nɔ̃ lɛ he. Te osusuɔ he ohaa tɛŋŋ?” Ŋmɛɛ gbɛ ni eha hetoo. Yɛ bɔ ni shiatsɛ lɛ baaha hetoo eha lɛ naa lɛ, gbelemɔ The Bible—God’s Word or Man’s? wolo lɛ fa ni kɔɔ bɔ ni shiatsɛ lɛ teɔ shi ewoɔ loo nɔ ni esusuɔ lɛ he, ni okɛ lɛ asusu oti kome loo enyɔ he. Akɛ nɔkwɛmɔ nɔ lɛ, ekolɛ obaana be ni okɛ kukuji 27-9 atsu nii kɛjɛ baafa 66, yɛ yitso bibioo ni ji, “Yesu—Gbɔmɔ Diɛŋtsɛ Ni” lɛ shishi.
5 Wɔ Tsɔɔlɔ ni Fe Fɛɛ lɛ kwɛɔ koni ehe nilee ashɛ mɛi fɛɛ ni sumɔɔ ni amɛkase nii lɛ aŋɔɔ. Ní wɔɔye wɔbua mɛi krokomɛi ni amɛhiɛ asɔ sɛɛnamɔ diɛŋtsɛ ni yɔɔ Biblia lɛ he lɛ ji nibii ni hi fe fɛɛ ni wɔbaanyɛ wɔfee kɛye wɔbua amɛ lɛ ateŋ ekome; ebaanyɛ ehere amɛyiwala.—Abɛi 1:32, 33.