Maŋtsɛyeli Hiɛnɔkamɔ lɛ Jajemɔ Kɛtsɔ “Kingdom Come” Wolo lɛ Kɛhamɔ Nɔ
1 Mɛɛ hiɛnɔkamɔ esa akɛ Kristofoi ajaje atsɔɔ ŋmɛnɛ? Eka shi faŋŋ akɛ jeee maŋkrwamɔ ni gbɔmɛi to amɛma shi lɛ he hiɛnɔkamɔ! Yinɔsane yeɔ he odase akɛ adesai agbɛjianɔtoi kɛ naagbai anaa tsabaai ni amɛkɛba lɛ faaa bɔ ni eeenyɛ etsu adesai anaanɔ hiamɔ nii kɛ yiwalaheremɔ he nii. Hiɛnɔkamɔ diɛŋtsɛ lɛ ji Nyɔŋmɔ Maŋtsɛyeli lɛ. (Mat. 6:10) Wɔna hegbɛ fɛfɛo ni wɔkɛ “Kingdom Come” wolo lɛ baaha yɛ December, ni wɔkɛtsɔɔ akɛ Nyɔŋmɔ Maŋtsɛyeli lɛ baanyɛ atsu nibii kpakpai ahe nii diɛŋtsɛ aha adesai. Mɛni wɔbaanyɛ wɔkɛɛ koni wɔkɛtee miishɛɛ shi?
2 Ekolɛ mɛi ni susuuu akɛ Maŋtsɛyeli lɛ ji nɔ ni yɔɔ diɛŋtsɛ lɛ baana shiɛmɔ wiemɔ nɛɛ he miishɛɛ:
◼ “Wɔteŋ mɛi pii le Nuntsɔ lɛ sɔlemɔ lɛ fã ni kɛɔ akɛ: ‘Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.’ Miisusu wɔteŋ mɛi abɔ ni buɔ Maŋtsɛyeli lɛ akɛ eji nɔ ni yɔɔ diɛŋtsɛ lɛ he? Te osusuɔ tɛŋŋ? [Ŋmɛɛ gbɛ ni ewie.] Ha wɔkane Kpojiemɔ 21:3, 4, koni ema nɔ mi akɛ Nyɔŋmɔ Maŋtsɛyeli lɛ ji nɔyeli ko ni yɔɔ lɛ diɛŋtsɛ egbɛjianɔtoo kɛha adesai anaagbai anaa tsabaa namɔ. [Kanemɔ ŋmalɛ lɛ.] Ani osumɔŋ ni ohi nɔyeli ni shihilɛi ni tamɔ nakai yaa nɔ yɛ mli lɛ shishi? [Ŋmɛɛ gbɛ ni ewie.] Ato wolo nɛɛ he gbɛjianɔ koni eye ebua mɛi koni amɛna akɛ Maŋtsɛyeli lɛ ji nɔ ni yɔɔ diɛŋtsɛ.” Beni okɛ shiatsɛ lɛ ekane wolo lɛ hiɛkpamɔ wiemɔ ni yɔɔ baafa 2 lɛ ogbe naa lɛ, okɛ wolo lɛ aha lɛ. Too gbɛjianɔ ni oku osɛɛ ni oyafee gbɛ ni abaatsɔ nɔ akɛ wolo nɛɛ atsu nii lɛ he nɔkwɛmɔ nɔ.
3 Beni jeŋ muu fɛɛ shweshweeshwe shihilɛ ni bɛ kɛ nɔyeli ni yeee emuu lɛ he sane yɔɔ ojwɛŋmɔ mli lɛ, obaanyɛ okɛɛ akɛ:
◼ “Beni mikɛ mikutsoŋbii gbaa sane lɛ, mina akɛ, mɛi babaoo miishwe ni amɛhi nɔyeli ni baanyɛ ekɛ ŋmɛnɛŋmɛnɛ naagbai ni naa wa—awuiyeli kɛ nibii ajara ni yaa hiɛ (loo naagbai fɛɛ ni yaa nɔ yɛ jɛmɛ amrɔ nɛɛ) lɛ aba naagbee diɛŋtsɛ lɛ shishi. Ebaafee miishɛɛ waa, aloo jeee nakai? [Ŋmɛɛ gbɛ ni ewie.] Ani nɔyeli ni tamɔ nakai yɛ ŋmɛnɛ? [Ŋmɛɛ gbɛ ni ewie.] Mɛi babaoo esɔle koni nɔyeli ni baanyɛ afee enɛɛmɛi fɛɛ aba. Ŋwanejee ko bɛ he akɛ, bo hu osɔle koni eba. Ŋmalɛ ni yɔɔ Daniel 2:44 wieɔ Nyɔŋmɔ Maŋtsɛyeli lɛ he akɛ no ji nakai nɔyeli lɛ.” Kanemɔ ŋmalɛ kɛ akrabatsa ni yɔɔ wolo lɛ mli baafa 11 lɛ hu koni nyɛsusu he koni okɛtsɔɔ bɔ ni Nyɔŋmɔ Maŋtsɛyeli lɛ yɔɔ diɛŋtsɛ ha. Okɛ wolo lɛ aha ni otsɔɔ shia Biblia mli nikasemɔ he gbɛjianɔtoo lɛ mli kuku.
4 Obaanyɛ oye obua mɔ ni bɛ Nyɔŋmɔ mli hemɔkɛyeli dɔŋŋ lɛ kɛtsɔ enɛ kɛɛmɔ nɔ:
◼ “Jwɛŋmɔ ni mɛi babaoo hiɛ ji akɛ, Biblia mli gbalɛi baŋ mli yɛ amɛ wala be mli. Shi Biblia lɛ tsɔɔ akɛ Nyɔŋmɔ Maŋtsɛyeli lɛ miiye nɔ momo yɛ ŋwɛi, ni etsɛŋ ni ebaabɔi shikpɔŋ lɛ nɔyeli hu. Ofainɛ ni okadi nɔ ni aŋma yɛ biɛ lɛ yɛ Habakuk 2:3.” No sɛɛ lɛ, tsɔɔmɔ lɛ mfoniri ni yɔɔ baafai 52-3 lɛ, koni okɛtsɔɔ hii sɔrɔtoi ni yɔɔ hemɔkɛyeli ni kɛ ekãa mɛ koni amɛna Maŋtsɛyeli lɛ yɛ amɛ wala be mli lɛ anɔkwɛmɔ nii lɛ mli oha lɛ. Too gbɛjianɔ koni oya be kroko koni nyɛsusu nɔ hewɔ ni etamɔ nɔ ni shiwoo lɛ mlibaa ekpe sɛɛ lɛ he saji krokomɛi ahe.
5 Beni okɛ mfonirii komɛi ni yɔɔ wolo lɛ mli lɛ ekomɛi tsuɔ nii jogbaŋŋ lɛ, obaanyɛ okɛɛ akɛ:
◼ “Miba oŋɔɔ ŋmɛnɛ koni wɔsusu shiwoo ni yɔɔ naakpɛɛ ni Nyɔŋmɔ kɛha yɛ shikpɔŋ ni asaa nɔ ni nine baashɛ nɔ yɛ e-Maŋtsɛyeli lɛ shishi lɛ he lɛ he sane. [Kanemɔ Kpojiemɔ 21:3, 4 loo Yesaia 11:6-9] Shihilɛ ni tamɔ nɛkɛ baafee nɔ ni asumɔɔ waa, aloo jeee nakai? [Ŋmɛɛ gbɛ ni ewie.] Miisumɔ ni wɔkwɛ paradeiso shihilɛ ni awo shi akɛ ebaaba lɛ he mfoniri ni nitɛŋlɔ ko efee yɛ wolo nɛɛ mli lɛ.” Gbelemɔ kɛya mfonirii ni yɔɔ baafai 4-5 loo 180-1 lɛ anɔ ni nyɛgba he sane. Okɛ wolo lɛ aha ni oto gbɛjianɔ ni oye obua shiatsɛ lɛ ni ena emli saji lɛ ahe sɛɛ.
6 Kɛ Maŋtsɛyeli hiɛnɔkamɔ ni yɔɔ naakpɛɛ lɛ kanya otsui ni oyɛ nɔmimaa ni mli wa akɛ onine baashɛ nɔ lɛ, no lɛ onyɛŋ ofee nɔ ko akɛ ja etsirɛ bo koni okɛ ekãa ajaje otsɔɔ mɛi krokomɛi.—Heb. 10:23.