Sanebimɔ He

◼ Ani engagement ji kusum naa gbãla nɔŋŋ?

Yɛ Ghana wuoyigbɛ hei komɛi lɛ, mɛi fɔɔ wiemɔ akɛ amɛmiiya “engagement” nifeemɔ shishi. Bei pii lɛ amɛkɛ wiemɔ nɛɛ miitsɔɔ nifeemɔ ni nuu lɛ wekumɛi yawoɔ kusum naa gbãla nii kɛhaa yoo lɛ wekumɛi, ní yoo lɛ batsɔɔ nuu lɛ ŋa lɛ mli. Ani eja akɛ aaatsɛ enɛ akɛ engagement?

Atsɔɔ Blɔfo wiemɔ “engagement” loo yoo hebaatsɛɛ mli akɛ “shiwoo ni kã mɛi enyɔ ateŋ loo kpaŋmɔ ni tsɔɔ akɛ abaabote gbalashihilɛ mli wɔsɛɛ ko.” No hewɔ lɛ, yɛ shishitsɔɔmɔ nɛɛ naa lɛ, nuu kɛ yoo ni woɔ amɛhe shi akɛ amɛbaabote gbalashihilɛ mli lɛ ebote kpaŋmɔ mli. Shi, esa akɛ akadi akɛ atsuko nibii ni akpaa gbɛ yɛ kusum naa ni haa gbalashihilɛ kpaŋmɔ lɛ yeɔ emuu lɛ he nii agbeko naa yɛ nɛkɛ be nɛɛ mli. No hewɔ lɛ ni mɛi enyɔ ni ewo amɛhe shi lɛ aaana bɔlɛnamɔ mli gbɛfaŋnɔ lɛ baaha amɛfee mɛi ni yeɔ ajwamaŋbɔɔ he fɔ́.—Heb. 13:4; 1 Tes. 4:3-5.

Belɛ mɛni ji kusum naa gbãla? Nɔ ni aŋma awo March, 1978 Wɔ Maŋtsɛyeli Sɔɔmɔ lɛ mli lɛ kɛɛ yɛ kuku 8 lɛ mli akɛ: “Kɛji yoo lɛ weku ŋɔ kusum-naa yinii lɛ FƐƐ yɛ odasefoi ahiɛ kɛ agbɛnɛ yɛ nuu kɛ yoo ni baahi shi lɛ anɔkpɛlɛmɔ naa lɛ, belɛ gbala lɛ eye emuu. Enɛ jeee yoo-hebaatsɛɛ [engagement] kɛkɛ, taakɛ mɛi komɛi buɔ enɛ yɛ gbɛ ni ejaaa nɔ lɛ. Gbalashihilɛ [kusum naa gbala] diɛŋtsɛ mli abote lɛ. . . . Abuɔ [mɛi enyɔ lɛ] akɛ nuu kɛ eŋa, ni amɛnyɛŋ amɛfo gbɛjianɔtoo lɛ mli kɛkɛ, ja amɛtsɔ gbalamlitsemɔ he kusum lɛ mli dã, (yɛ be mli ni eji yoo-hebaatsɛɛ kɛkɛ ni kulɛ, amɛbaanyɛ amɛfo enɛ mli ni ehe ehiaŋ ni amɛfee gbalamlitsemɔ he kusum dã lɛ).”

Eka shi faŋŋ akɛ, abuɔ kusum naa gbãla akɛ gbalashihilɛ ni eye emuu, kɛ́ ahaaa ehe wiemɔ yɛ Maŋtsɛyeli Asa nɔ po loo kɛ “daaŋjiemɔ niyenii” fataaa he; enɛ jeee engagement.