Ha Ana Oshweremɔ lɛ Faŋŋ
1 Susumɔ be mli ni onu Maŋtsɛyeli shɛɛ sane lɛ klɛŋklɛŋ kwraa lɛ he okwɛ. Anɔkwalei fioo ko tsirɛ suɔmɔ ni oyɔɔ akɛ ooona nilee kɛ sane shishinumɔ lɛ. Etsɛɛɛ ni ona bɔ ni ehe hiaa akɛ ooofee tsakemɔi yɛ oshihilɛ mli akɛni Yehowa gbɛ̀i lɛ anɔ kwɔlɔ kwraa fe ogbɛi lɛ hewɔ. (Yes. 55:8, 9) Oshwere kɛtee hiɛ, ojɔɔ owala nɔ, ni oha abaptisi bo.
2 Beni ótee hiɛ fioo yɛ mumɔ mli sɛɛ po lɛ, no mli lɛ gbɔjɔmɔi komɛi yɛ lolo ni esa akɛ oye nɔ kunim. (Rom. 12:2) Ekolɛ ona gbɔmɔ he gbeyeishemɔ ni no ha oshashao shi akɛ okɛ ohe aaawo shiɛmɔ nitsumɔ lɛ mli. Aloo ekolɛ no mli lɛ ootɔ fã yɛ Nyɔŋmɔ mumɔ lɛ kpojiemɔ mli. Ní onijiaŋ aaaje wui moŋ lɛ, otswa ofai shi akɛ oooshwere kɛya hiɛ kɛtsɔ teokrase otii ni okɛaamamɔ ohiɛ lɛ nɔ.
3 Ekolɛ afii babaoo eho bianɛ kɛjɛ beni ojɔɔ ohe nɔ nɛɛ. Kɛ okai be ko ni eho lɛ, mɛɛ shweremɔ onyɛɔ onaa yɛ ohe? Ani onine eshɛ otii ni okɛmamɔ ohiɛ lɛ ekomɛi anɔ? Ani ekãa ni oyɔɔ “kɛjɛ shishijee lɛ” nɔŋŋ oyɔɔ lɛ? (Heb. 3:14) Beni Paulo wo lɛ hewalɛ akɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ” lɛ, no mli lɛ Timoteo ji Kristofonyo ni eda yɛ mumɔ mli momo ni ekɛ afii pii ena niiashikpamɔ.—1 Tim. 4:15.
4 Omli ni Ooopɛi Okwɛ lɛ He Miihia: Kɛ wɔjwɛŋ wɔtsutsu shihilɛ lɛ nɔ lɛ, ani wɔnaa daa akɛ gbɔjɔmɔi komɛi ni yɔɔ wɔhe beni wɔje shishi lɛ ekomɛi yɛ wɔhe lolo? Ani wɔnyɛɛɛ wɔshɛ otii ni wɔkɛmamɔ wɔhiɛ lɛ ekomɛi ahe? Kɛ nakai lɛ, mɛni hewɔ? Eyɛ mli akɛ wɔhiɛ yiŋtoi kpakpai moŋ, shi ekolɛ wɔshashao shi aahu. Ekolɛ wɔha shihilɛ mli yeyeeye feemɔi loo ŋmɛnɛŋmɛnɛ nibii agbɛjianɔtoo nɛɛ mli nɔnyɛɛi lɛ eje wɔnijiaŋ wui.—Luka 17:28-30.
5 Yɛ be mli ni nɔ ko fioo pɛ wɔbaanyɛ wɔfee yɛ tsutsu shihilɛ lɛ he lɛ, wɔbaanyɛ wɔfee wɔsɛɛ be lɛ he nɔ ko kɛ̃. Ani wɔbaanyɛ wɔkɛ anɔkwayeli apɛi wɔmli wɔkwɛ, ni wɔle he ni wɔtɔɔ fã yɛ lɛ, koni no sɛɛ lɛ wɔbɔ mɔdɛŋ waa ni wɔfee tsakemɔi? Ekolɛ ehe baahia ni wɔfee jogbaŋŋ yɛ Nyɔŋmɔ mumɔ lɛ yibii lɛ kpojiemɔ mli, tamɔ henɔyeli, mlihilɛ, loo tsuishitoo nɛkɛ. (Gal. 5:22, 23) Kɛ ewa kɛha wɔ akɛ wɔkɛ mɛi krokomɛi aaabɔ loo akɛ wɔkɛ onukpai lɛ aaafee ekome lɛ, no lɛ ehe miihia ni wɔna heshibaa jwɛŋmɔ.—Fil. 2:2, 3.
6 Ani wɔbaanyɛ wɔha wɔshweremɔ lɛ afee faŋŋ kɛtsɔ mɔdɛŋ ni wɔɔbɔ ni wɔnine ashɛ sɔɔmɔ hegbɛi anɔ lɛ nɔ? Kɛ nyɛmimɛi hii mia amɛhiɛ fioo lɛ amɛhe baanyɛ asa akɛ asafoŋ sɔɔlɔi loo onukpai. Wɔteŋ mɛi komɛi baanyɛ amɛkɛ amɛhe aha akɛ daa gbɛgbalɔi. Yɛ mɛi babaoo agbɛfaŋ lɛ, gbɛgbalɔi awalɔ nitsumɔ lɛ baanyɛ afee oti ni anyɛɔ ashɛɔ he. Mɛi krokomɛi baabɔ mɔdɛŋ ni amɛya amɛhiɛ yɛ nikasemɔ sui amli, ni amɛkɛ amɛhe awo asafoŋ kpeei amli kɛ ekãa babaoo, loo ni amɛwo yibii babaoo akɛ asafoŋ shiɛlɔi.
7 Shi kɛlɛ, eji wɔteŋ mɔ fɛɛ mɔ gbɛnaa nii akɛ wɔɔkpɛ wɔyiŋ yɛ hei ni esa akɛ wɔya hiɛ yɛ mli lɛ he. Wɔbaanyɛ wɔna nɔmimaa akɛ mɔdɛŋ ni wɔbɔɔ yɛ anɔkwayeli mli ni “wɔfoŋ kɛya dalɛ mli” lɛ baaha wɔmli afili wɔ babaoo ni eha wɔfee asafo lɛ mli bii ni woɔ yibii babaoo.—Heb. 6:1.