Yaa nɔ Owie Anɔkwale
1 Bɔfoi lɛ jaje akɛ: “Wɔnyɛŋ akɛ ja wɔwie nii ni wɔna kɛ nii ni wɔnu lɛ.” Akɛ Biblia he woji babaoo diɛŋtsɛ ni wɔkɛtsuɔ nii yɛ wɔ shiɛmɔ nitsumɔ mli lɛ ejɔɔ wɔ ŋmɛnɛ, shi esa akɛ wɔya nɔ wɔwie anɔkwale hu. Eyɛ mli akɛ Buu-Mɔɔ kɛ Awake! lɛ jaa ji gbɛ ni atsɔɔ nɔ anaà mɛi ni baabo toi lɛ moŋ, shi kɛ wɔtsɔɔ mɛi ni yɔɔ he miishɛɛ lɛ anɔkwale lɛ he nibii babaoo lɛ, esa akɛ wɔku wɔsɛɛ ekoŋŋ. Naa gbɛi komɛi ni abaanyɛ atsɔ nɔ akɛ mɛi ni nine eshɛ ehee ni eba lɛ ekomɛi anɔ lɛ atsu enɛ he nii.
2 Kɛ oodi April “Awake!” krɛdɛɛ ni okɛha ni yitso ji, “Beni Ta Bɛ Dɔŋŋ” lɛ sɛɛ lɛ, obaanyɛ otsɔɔ Biblia mli nikasemɔ lɛ mli kɛtsɔ sanebimɔ nɛɛ nɔ:
◼ “Nyɛsɛɛ ko lɛ, wɔwie ta ni yaa nɔ yɛ maji amli lɛ he kɛ jamɔ ni kɛ ehe woɔ mli lɛ hu he. Ani ona ole akɛ nakai saji lɛ tsɔɔ faŋŋ akɛ wɔyɛ nɔ ni Biblia lɛ tsɛɔ no akɛ naagbee gbii lɛ amli? [Okɛ Nilee wolo lɛ atsɔɔ. Kanemɔ yitso 11 lɛ mli klɛŋklɛŋ kuku lɛ, ni oma akrabatsa ni yɔɔ baafa 102 lɛ nɔ mi.] Wolo nɛɛ tsɔɔ sane nɛɛ mli kɛfataa ekrokomɛi 18 ni yɔɔ biɛ nɛɛ, ni eyɔɔ he ni ato emli saji lɛ anaa yɛ lɛ he. [Okɛ baafa 3 atsɔɔ.] Kɛ manyɛ lɛ, masumɔ ni mikɛ minitii fioo ko atsɔɔ bɔ ni wolo nɛɛ baanyɛ aye abua bo koni onu Biblia mli saji ni he hiaa nɛɛ ashishi.” Kɛ aŋmɛ bo gbɛ lɛ, okɛ baafa 6 aje nikasemɔ shishi.
3 Kɛ owo shi akɛ obaaku osɛɛ oba koni obatsɔɔ bɔ ni abaanyɛ ana hebuu mli ŋɔɔmɔ bianɛ lɛ, obaanyɛ okɛɛ nɔ ko nɛkɛ:
◼ “Beni wɔkpe klɛŋklɛŋ lɛ, mikɛ bo gba wiemɔ ko ni jɛ Biblia mli, ni haa wɔnaa yiŋtoo ni wɔɔdamɔ nɔ wɔkpa nɔ kpakpa gbɛ yɛ gbɔmɔ wɔsɛɛ shihilɛ he lɛ he sane. Masumɔ ni magbala ojwɛŋmɔ kɛya nɔ ko nɔ ŋmɛnɛ, ni tsɔɔ mɔ ni baanyɛ aha wɔnu he bianɛ akɛ wɔyɛ hebuu lɛ.” Kanemɔ Lala 4:9. Gbelemɔ Nilee wolo lɛ baafa 168 ni okane kuku 19. No sɛɛ lɛ bi akɛ: “Ani obaasumɔ ni ona shia Biblia mli nikasemɔ ni aheee nɔ ko, ni baatsɔɔ nɔ ni bo hu obaanyɛ ofee lɛ mli faŋŋ, ni ona hebuu ni tamɔ nɛkɛ yɛ oshihilɛ mli?” Kɛ aha hetoo akɛ hɛɛ lɛ, gbelemɔ yitso 1.
4 Bɔni afee ni okɛ mɛi ni oyaha amɛ May 22 “Awake!” lɛ afata mɛi ni oyahaa amɛ woji tɛtrɛbii daa lɛ ahe lɛ, obaanyɛ oka gbɛ ni tamɔ nɛkɛ okwɛ:
◼ “Etamɔ nɔ ni oná he miishɛɛ waa akɛ oookane Awake! wolo tɛtrɛɛ ni mishi miha bo lɛ ni wieɔ kaabonaatoo ni yaa nɔ yɛ nitsumɔ hé lɛ he lɛ. Ani ona sane lɛ he miishɛɛ? [Ŋmɛɛ gbɛ ni ewie.] Bei pii lɛ mɛi ni kaneɔ Awake! lɛ daa kɛɔ akɛ amɛsumɔɔ bɔ ni ewieɔ saji ni he hiaa tamɔ nɛkɛ ahe yɛ anɔkwayeli mli ni ekɛ saji tsɔɔ mli fitsofitso lɛ. Misusuɔ akɛ obaana lɛ nakai nɔŋŋ yɛ ehee ni eba nɛɛ hu he. [Wiemɔ sane ni yɔɔ esɛɛgbɛ lɛ he kuku.] Ani obaasumɔ ni okane?” Tsɔɔmɔ bɔ ni ehe hiaa ni akɛ woji tɛtrɛbii nɛɛ aaakase Biblia lɛ. Kɛɛmɔ lɛ akɛ, okɛ Nilee wolo lɛ baatsu nii ni okɛ lɛ afee shia Biblia mli nikasemɔ.
5 Kɛ otee sɛɛsaramɔ lɛ obaanyɛ okɛɛ lɛ tɛ̃ɛ akɛ okɛ lɛ baafee nikasemɔ kɛtsɔ enɛ kɛɛmɔ nɔ:
◼ “Wɔjaa wɔ woji tɛtrɛbii lɛ yɛ je lɛŋ fɛɛ koni wɔkɛha mɛi ni yɔɔ hei sɔrɔtoi fɛɛ lɛ ale nɔ ni Biblia lɛ tsɔɔ. Kɛ gbɔmɛi aŋkroaŋkroi ahiɛ sɔ nɔ ni amɛkaseɔ lɛ, wɔkɛɔ amɛ akɛ wɔkɛ amɛ baafee shia Biblia mli nikasemɔ ni aheee nɔ ko. [Gbelemɔ kɛya akrabatsa ni ji, ‘Ani Obaasumɔ ni Abasara Bo?’ ni yɔɔ Buu-Mɔɔ lɛ sɛɛ lɛ nɔ.] Wɔkɛ wolo ni ji, Nilee Ni Kɛ Mɔ Yaa Naanɔ Wala Mli nɛɛ tsuɔ nii akɛ gbɛtsɔɔmɔ. Ha matsɔɔ bo bɔ ni afeɔ nikasemɔ lɛ ahaa lɛ mli kuku.”
6 Kɛ wɔtee nɔ wɔwie anɔkwale lɛ, wɔbaanyɛ wɔna nɔmimaa akɛ, mɛi komɛi baabo toi, ni amɛbaahere nɔ jogbaŋŋ.—Mar. 4:20.