Sanegbaai yɛ Naanyobɔɔ Mli Baanyɛ Ashɛ Tsui He

¹ Abaanyɛ atsɔɔ sanegbaa shishi akɛ “jwɛŋmɔ tsɔɔmɔ kɛtsɔ wiemɔ nɔ.” Sanegbaa yɛ naanyobɔɔ mli yɛ saneyitso ni kɔɔ mɛi krokomɛi ahe lɛ baanyɛ atee amɛ miishɛɛ shi, ni ebaanyɛ eye ebua wɔ ni wɔkɛ Maŋtsɛyeli shɛɛ sane lɛ ashɛ amɛtsui mli. Niiashikpamɔ etsɔɔ akɛ, sanegbaa yɛ naanyobɔɔ mli ni miishɛɛ fata he lɛ ni aaaha eya nɔ yɛ mɛi ateŋ lɛ mɔɔ shi babaoo diɛŋtsɛ fe shiɛmɔ wiemɔ ni akɛaaha.

² Bɔ ni Aaafee Aje Sanegbaa yɛ Naanyobɔɔ Mli lɛ Shishi: Nyɛmɔ ni wɔyɔɔ akɛ wɔkɛ mɛi krokomɛi aaagba sane lɛ etsɔɔɔ akɛ, esa akɛ wɔkɛ saji ni abaasusu he kɛ ŋmalɛi ni ato naa ni baaha mɛi ajwɛŋmɔ aba nɔ lɛ aha. Nɔ ni yɔɔ mli kɛkɛ ji ni aaaha mɔ kroko lɛ hegbɛ ni ekɛ wɔ awie. Akɛ nɔkwɛmɔ nɔ lɛ, kɛ wɔkɛ mɔ ni shia bɛŋkɛ wɔ lɛ gba sane yɛ naanyobɔɔ mli lɛ, sanegbaa lɛ efeŋ kpɛŋŋ, shi moŋ efeɔ miishɛɛ. Jeee saji ni wɔbaawie yɛ no sɛɛ lɛ he wɔsusuɔ, shi yɛ adebɔɔ su naa lɛ wɔmiifee wɔnii yɛ bɔ ni esusuɔ sane he ehaa lɛ naa. Miishɛɛ kpakpa ni wɔɔjie lɛ kpo wɔtsɔɔ yɛ nɔ ni ewieɔ he lɛ baanyɛ awo lɛ hewalɛ ni eya nɔ ekɛ wɔ agba sane. Nakai nɔŋŋ esa akɛ eba lɛ yɛ be mli ni wɔyeɔ mɛi krokomɛi odase.

³ Abaanyɛ akɛ saji ni agbaa he sane tamɔ awuiyeli, naagbai ni gbekɛbii kɛbaa, maŋ saji, je lɛŋ shihilɛi, loo kɔɔyɔŋ tsakemɔ atsu nii ni atsɔ naanyobɔɔ nɔ akɛje sanegbaai ashishi. Saji ni kɔɔ mɛi ashihilɛi ahe tɛ̃ɛ lɛ teeɔ amɛ miishɛɛ shi yɛ gbɛ ni mɔɔ shi nɔ. Kɛ aje sanegbaa shishi nɔŋŋ pɛ lɛ, wɔbaanyɛ wɔtsake lɛ blɛoo kɛya Maŋtsɛyeli shɛɛ sane lɛ nɔ.

⁴ Sanegbaa ni yɔɔ miishɛɛ ni akɛ he aaawo mli lɛ etsɔɔɔ akɛ hesaamɔ ni afeɔ kɛtsɔɔ hiɛ lɛ he ehiaaa. Ehe miihia. Shi kɛlɛ, ehe ehiaaa ni oto wiemɔ ni yɔɔ kpɛŋŋ he gbɛjianɔ loo okase shiɛmɔ wiemɔ ni baaha sanegbaa ni yɔɔ kpɛŋŋ aya nɔ, loo nɔ ni anyɛŋ atsake mli ni ekɔ shihilɛi ni yɔɔ lɛ ahe lɛ owo oyitsoŋ. (Okɛto 1 Korintobii 9:20-23 he.) Gbɛ ni hi jogbaŋŋ ni aaatsɔ nɔ asaa he yɛ mli ji ni ahala Ŋmalɛ mli saneyitso kome loo enyɔ kɛ yiŋtoo akɛ, aaagba nomɛi ahe sane. Saji ni anaa yɛ Reasoning wolo lɛ mli lɛ amlitĩi baaye abua kɛha enɛ feemɔ.

⁵ Sui ni He Hiaa Kɛha Sanegbaa yɛ Naanyobɔɔ Mli: Kɛ wɔkɛ mɛi krokomɛi miigba sane lɛ, esa akɛ wɔkɛ miishɛɛ kɛ anɔkwayeli atsu nii. Hiɛ ŋmɔlɔŋmɔlɔ kɛ miishɛɛ ni ajieɔ lɛ kpo atsɔɔ lɛ yeɔ ebuaa ni ehaa anaa sui ni tamɔ nɛkɛ. Wɔhiɛ shɛɛ sane ni hi fe fɛɛ yɛ je lɛŋ; no ji nɔ ni anɔkwafoi naa he miishɛɛ waa. Kɛ amɛnu he akɛ, nɔ ni kanyaa amɛhe miishɛɛ ni wɔyɔɔ lɛ ji anɔkwa suɔmɔ akɛ wɔkɛ amɛ aaagba sanekpakpa ko lɛ, ebaatsirɛ amɛ ni amɛbo toi.—2 Kor. 2:17.

⁶ Esa akɛ sane ni aaagba lɛ afee niiashikpamɔ ko ni ŋɔɔ. No hewɔ lɛ, esa akɛ wɔjie mlihilɛ kɛ ŋaa ni akɛfeɔ nii lɛ kpo wɔtsɔɔ yɛ Maŋtsɛyeli shɛɛ sane lɛ kɛhamɔ mli. (Gal. 5:22; Kol. 4:6) Bɔɔ mɔdɛŋ ni oha mɔ lɛ ana jwɛŋmɔ kpakpa dani oshi oya. Kɛ wɔyeee omanye yɛ tsui lɛ ni wɔnine aaashɛ nɔ lɛ mli po, beni wɔtee eŋɔɔ klɛŋklɛŋ lɛ, ekolɛ kɛtsɔ nɛkɛ gbɛ nɔ lɛ, ebaabo Odasefonyo ni kɛ lɛ baagba sane be kroko lɛ toi jogbaŋŋ.

⁷ Jeee shiɛmɔ wiemɔ ni yɔɔ hwanyaŋŋ ni aaakase jogbaŋŋ lɛ ji nɔ ni haa ajeɔ sanegbaa yɛ naanyobɔɔ mli lɛ shishi. Nɔ ni kɛbaa kɛkɛ ji ni aaatee miishɛɛ yɛ sanegbaa ni kɔɔ mɔ lɛ he lɛ shi. Kɛ wɔsaa wɔhe kɛtsɔ hiɛ nɔŋŋ pɛ lɛ, no dani wɔbaafee klalo akɛ wɔkɛ mɛi aaagba saji yɛ naanyobɔɔ mli. Nyɛhaa wɔbɔa mɔdɛŋ ni wɔnine ashɛ mɛi ni wɔkɛkpeɔ lɛ atsui nɔ, kɛtsɔ shɛɛ sane ni hi fe fɛɛ eko ni aaanyɛ ana, ni ji naanɔ Maŋtsɛyeli jɔɔmɔi ni wɔkɛ amɛ aaagba he sane lɛ nɔ.—2 Pet. 3:13.