Bɔ ni Ooofee Ohe Be ni Hi Jogbaŋŋ Lɛ

¹ Babaoo ni wɔyɔɔ ni wɔɔfee yɛ Yehowa sɔɔmɔ mli lɛ haa wɔyaa nɔ wɔtsuɔ nii waa be fɛɛ be! (1 Kor. 15:58) Wɔyɔseɔ bɔ ni ehe hiaa ni wɔ kome wɔkase nii kɛ agbɛnɛ akɛ weku, koni wɔkane Biblia lɛ daa gbi, ni wɔsaa wɔhe kɛha asafoŋ kpeei, koni wɔya hu, ni wɔkɛ wɔhe awo shiɛmɔ nitsumɔ lɛ mli daa. Nɔkwɛlɔi yɛ nɔkwɛmɔ he gbɛnaa nii, ni amɛtsuɔ asafo lɛ nitsumɔi krokomɛi ahe nii. Mɛi komɛi yɛ weku mli gbɛnaa nii ni tsii loo nitsumɔi sɔrɔtoi ni amɛbaatsu amɛha mɛi krokomɛi. Bɔni afee ni atsu nɔ fɛɛ nɔ he nii jogbaŋŋ lɛ, ehe miihia ni mɔ fɛɛ mɔ aŋmɛ pɛpɛɛpɛ, ni mɔ lɛ diɛŋtsɛ kɛ gbɛjianɔtoo kpakpa atsu nii.

² Okɛ Nibii ni He Hiaa Aye Klɛŋklɛŋ Gbɛhe: Omanye ni wɔɔye yɛ ‘be ni hi jogbaŋŋ ni wɔɔhe wɔha wɔhe’ lɛ mli lɛ damɔ sanesɛɛkɔmɔ kɛ jwɛŋmɔ kpakpa ni wɔyɔɔ lɛ nɔ. (Efe. 5:15, 16) Esa akɛ wɔle nɔ ni “nii ni hi titri lɛ” ji, koni wɔha nomɛi aye klɛŋklɛŋ gbɛhe yɛ nibii ni he hiaa titri ni wɔto naa lɛ mli. (Fil. 1:10) Gbalashihilɛ mli hefatalɔi komɛi tsɔɔ bɔ ni amɛ teokrase shiabii lɛ ji lɛ mli yɛ nɛkɛ gbɛ nɔ, akɛ: “Wɔhaa anɔkwale lɛ yiɔ wɔ shihilɛi amli obɔ . . . Anɔkwale lɛ jeee wɔ shihilɛ lɛ fã ko, shi moŋ no ji wɔ shihilɛ. Nibii krokomɛi fɛɛ damɔ no nɔ.” Yehowa jamɔ kɛ sɔɔmɔ ni mɔ ko kɛaaye klɛŋklɛŋ gbɛhe yɛ eshihilɛ mli lɛ he miihia.

³ Yɔsemɔ Nibii ni Fiteɔ Mɔ Be: Ŋmɛlɛtswai 168 yɔɔ otsi mli, ni ehe miihia ni wɔkɛ be ni wɔyɔɔ lɛ atsu nii yɛ nilee mli. Bɔni afee ni wɔna be saŋŋ kɛha teokrase nitsumɔi lɛ, ehe miihia ni wɔyoo nibii ni fiteɔ mɔ be lɛ, koni wɔkaha nomɛi miifá. Akɛ nɔkwɛmɔ nɔ lɛ, niiamlitaomɔ ko ni afee lɛ jie lɛ kpo akɛ, mɔ ni eda bɔ ni sa yɛ United States lɛ fiteɔ nɔ ni fa fe ŋmɛlɛtswai 30 daa otsi kɛkwɛɔ TV! Yɛ mɛi krokomɛi agbɛfaŋ lɛ, amɛfiteɔ be babaoo kɛkaneɔ je lɛŋ woji. Ekolɛ, mɛi komɛi baana akɛ amɛtuɔ be ni fa tsɔ̃ amɛhaa shihilɛ mli nifeemɔi, shwɛmɔi, hiɛtserɛjiemɔ, loo kɔmpiuta nifeemɔ ko. Ekolɛ ehe baahia ni wɔkwɛ wɔ daa gbi nifeemɔi amli jogbaŋŋ koni wɔkwɛ bɔ ni wɔɔfee ni wɔkɛ wɔbe atsu nii jogbaŋŋ. Ŋaalee biɔ ni wɔto husui wɔwo bɔ ni wɔkɛ wɔbe tsuɔ nibii ni he ehiaaa lɛ ahe nii wɔhaa lɛ ahe.

⁴ Too Daa Gbi Nifeemɔ he Gbɛjianɔ Kpakpa: Bɔ fɛɛ bɔ ni wɔ shihilɛ ji akɛ aŋkroaŋkro lɛ, wɔteŋ mɔ fɛɛ mɔ baanyɛ ahe be koni wɔkɛtiu mumɔŋ nibii asɛɛ. Mɛi komɛi ena akɛ, ní aaaje shishi mra fioo gbi fɛɛ gbi lɛ yeɔ ebuaa amɛ koni amɛtsu babaoo. Kɛ wɔfiteɔ be babaoo beni wɔyaa nitsumɔ loo ni wɔmiimɛ mɛi krokomɛi lɛ, wɔbaanyɛ wɔkɛ nakai be lɛ eko atsu nii kɛha Biblia kanemɔ, hesaamɔ kɛha kpeei, loo ni wɔkɛaabo saji ni Asafo lɛ audiocassette sɔrɔtoi lɛ kɛhaa lɛ toi. Wekui naa he sɛɛ babaoo, kɛtsɔɔ be pɔtɛɛ ni amɛtoɔ amɛmaa shi daa kɛhaa kutuu nikasemɔ lɛ nɔ. Kɛ weku lɛ mli bii fɛɛ baa weku nikasemɔ yɛ be naa lɛ, ehaa mɔ fɛɛ mɔ naa be ni afiteee he sɛɛ.

⁵ Beni gbi fɛɛ gbi hoɔ kɛyaa lɛ, esa akɛ wɔhiɛ ahi wɔhe nɔ waa diɛŋtsɛ akɛ “be lɛ faaa dɔŋŋ.” (1 Kor. 7:29) Wɔ shihilɛi damɔ bɔ ni wɔkɛ be ni he yɔɔ sɛɛnamɔ waa ni eshwɛ lɛ tsuɔ nii wɔhaa lɛ nɔ. Abaajɔɔ wɔ, kɛ wɔhe be ni hi jogbaŋŋ lɛ koni wɔnyɛ wɔkɛ Maŋtsɛyeli lɛ he nibii lɛ aye klɛŋklɛŋ gbɛhe!—Mat. 6:33.