Sanebimɔ He
◼ Mɛɛ woji esa akɛ akɛwo Teokrase Sɔɔmɔ Skul wojiatoohe lɛ?
Akɛ mumɔŋ woji babaoo eha kɛha Nyɔŋmɔ webii lɛ asɛɛnamɔ. Akɛni shiɛlɔi pii bɛ enɛɛmɛi fɛɛ eko hewɔ lɛ, Teokrase Sɔɔmɔ Skul wojiatoohe ni yɔɔ Maŋtsɛyeli Asa lɛ nɔ lɛ yeɔ ebuaa kɛha saji amli taomɔ yɛ woji ni ekolɛ abɛ eko lɛ amli. Enɛ tsɔɔ akɛ, esa akɛ akɛ woji ni ji Biblia shishitsɔɔmɔi sɔrɔtoi, Asafo lɛ woji heei, Wɔ Maŋtsɛyeli Sɔɔmɔ sɔrɔtoi lɛ, The Watchtower kɛ Awake! wolo kpoi lɛ, kɛ Watch Tower Publications Index sɔrɔtoi lɛ awo mli. Agbɛnɛ hu lɛ, esa akɛ akɛ wiemɔ komekomei ashishitsɔɔmɔ wolo ni yɔɔ ebe naa ni hi afata he. Kɛ abaanyɛ aná ensaiklopedia woji sɔrɔtoi, shikpɔji ahe mfoniri he woji, loo wiemɔ mla he gbɛjianɔtoo, kɛ yinɔsane he woji ni akɛtaoɔ saji amli lɛ, ehe baanyɛ aba sɛɛnamɔ. Shi kɛlɛ, esa akɛ asafo lɛ woji, ni “tsulɔ anɔkwafo kɛ nilelɔ” lɛ kɛha lɛ afee nɔ̃ titri ni ma wɔhiɛ.—Mat. 24:45.
Abɔ amaniɛ yɛ saji komɛi amli akɛ, akɛ woji ni esaaa ewo Teokrase Sɔɔmɔ Skul wojiatoohe lɛ. Ebafeŋ nɔ ni ja akɛ akɛ adesã wolo, woji ni wieɔ shiɔ Biblia lɛ, loo woji ni tsɔɔ jeŋ nilee loo woji ni tsɔɔ mumɔi atsɛmɔ fataa he. Esa akɛ akɛ woji ni baaye abua mɛi ni kɛtsuɔ nii lɛ koni amɛya hiɛ daa yɛ mumɔŋ lɛ pɛ afata woji ni yɔɔ Teokrase Sɔɔmɔ Skul wojiatoohe lɛ he.—1 Tim. 4:15.
Eyɛ mli akɛ abaanyɛ akɛ nitsumɔ awo nyɛmi nuu ko dɛŋ ni eye ebua ni akwɛ wojiatoohe lɛ nɔ moŋ, shi eji sɔ ni kã skul nɔkwɛlɔ lɛ nɔ. Esa akɛ ekwɛ ni be fɛɛ be lɛ, woji heei ni yɔɔ ebe naa ahi wojiatoohe lɛ, ni akɛ Asafo lɛ woji heei hu afata he amrɔ nɔŋŋ kɛ aná eko. Esa akɛ aŋma asafo ni wolo lɛ ji enɔ̃ lɛ gbɛi lɛ faŋŋ yɛ ehehaanɔ lɛ mligbɛ. Esa akɛ akwɛ woji lɛ daa afi akɛ ehe miihia ni asaa eko yɛ mli loo ni akɛ eko ato najiaŋ lo.
Mɔ fɛɛ mɔ baanyɛ ekɛ ehe awo wojiatoohe lɛ nɔkwɛmɔ lɛ mli. Esa akɛ akwɛ jogbaŋŋ koni woji lɛ akafite kɛ akɛmiikase nii. Esaaa akɛ aŋmɛɔ gbekɛbii agbɛ ni amɛkɛshwɛɔ, loo ni mɔ ko aaaŋma nɔ ko yɛ mli. Abaanyɛ aŋma okadi fioo fɛfɛo ko akpɛtɛ shi koni akɛkai nyɛmimɛi akɛ esaaa akɛ akɔlɔɔ woji lɛ kɛjɛɔ Maŋtsɛyeli Asa lɛ nɔ kɛyaa.
Akɛni be fɛɛ be lɛ, atoɔ asafoi heei ashishi hewɔ lɛ, etamɔ nɔ ni wojiatoohei pii yɛ ni daraaa. Shiɛlɔi komɛi ni yɔɔ wɔ woji memeji lɛ baasumɔ ni amɛsusu asafo lɛ ni amɛkɛaaha lɛ he. Ekolɛ, onukpai lɛ baasumɔ ni amɛshɛ Asafo lɛ Watchtower lɛ wolo kpoi ni akuɔ sɛɛ afeɔ ekoŋŋ lɛ. Yɛ nɛkɛ gbɛi anɔ lɛ, Teokrase Sɔɔmɔ Skul wojiatoohe lɛ baafee nɔ ni sɛɛnamɔ yɔɔ he waa, ni baaye abua mɛi fɛɛ ni amɛgbele Nyɔŋmɔ Wiemɔ lɛ mli jwetrii ni aŋɔtee, ni haa mɔ nilee, jwɛŋmɔ, kɛ sane shishinumɔ lɛ anaa.—Abɛi 2:4-6.