“Ni Titri lɛ” Nyɛyaa Kpeei
1 Kpee kutuu efee nɔ ni he hiaa Yehowa webii be fɛɛ be. Sɔlemɔtsu lɛ kɛ kpeehei lɛ yɛ kɛha Israelbii lɛ akɛ hei ni amɛkpeɔ yɛ kɛha anɔkwale jamɔ, ŋwɛi nitsɔɔmɔ, kɛ naanyobɔɔ yɛ miishɛɛ mli. Yɛ yiŋtoi ni tamɔ enɛɛmɛi ahewɔ lɛ, mra be mli Kristofoi lɛ kwaaa henaabuamɔ kutuu. “Ni titri lɛ,” yɛ be mli ni nɔnyɛɛi kɛ kaai faa yɛ nɛkɛ naagbee hejaramɔ gbii nɛɛ amli lɛ, wɔ hu mumɔŋ hewalɛwoo ni wɔ asafoŋ kpeei kɛhaa lɛ—he miihia wɔ. (Heb. 10:25) Kadimɔ yiŋtoi etɛ hewɔ ni wɔyaa kpeei lɛ.
2 Yɛ Naanyobɔɔ lɛ Hewɔ: Ŋmalɛi lɛ woɔ wɔ hewalɛ koni “wɔshɛjeshɛjee wɔmii, ni mɔ aha enaanyo nane amɔ shi.” (1 Tes. 5:11, NW) Naanyobɔɔ yɛ Nyɔŋmɔ gbeyeishemɔ mli kɛ susumɔi kpakpai woɔ wɔjwɛŋmɔi amli obɔ, ni etsirɛɔ wɔ koni wɔtsu nitsumɔi kpakpai. Shi kɛ wɔtse wɔhe lɛ, ewaaa akɛ wɔɔná kwashiai, pɛsɛmkunya, loo jeŋbai gbohii ahe susumɔi.—Abɛi 18:1.
3 Yɛ Nitsɔɔmɔ lɛ Hewɔ: Kristofoi akpeei haa Biblia nitsɔɔmɔ he gbɛjianɔ ni ato koni eha suɔmɔ ni wɔyɔɔ kɛha Nyɔŋmɔ lɛ hiɛ akã yɛ wɔtsuii amli daa. Amɛkɛ gbɛtsɔɔmɔ ni anyɛɔ atsuɔ he nii ni tsɔɔ bɔ ni aaafee ni akɛ ‘Nyɔŋmɔ ŋaawoi muu lɛ fɛɛ’ atsu nii lɛ haa. (Bɔf. 20:27) Kpeei tsɔseɔ wɔ yɛ ŋaa gbɛ ni atsɔɔ nɔ ashiɛɔ sanekpakpa ni akɛtsɔɔ nii lɛ mli, yɛ hesaai ni he hiaa mli, titri lɛ, bianɛ, koni wɔná miishɛɛ ni anyɛɛɛ awie he, ni anáa kɛjɛɔ gbɔmɛi ni baakpɛlɛ Biblia anɔkwalei anɔ ni anaa amɛ ni ayeɔ abuaa amɛ lɛ mli.
4 Yɛ Hebuu lɛ Hewɔ: Asafo lɛ ji mumɔŋ abobaahe diɛŋtsɛ yɛ jeŋ fɔŋ nɛɛ mli—abobaahe, he ni toiŋjɔlɛ kɛ suɔmɔ yɔɔ. Kɛ wɔtee asafoŋ kpeei ashishi lɛ, Nyɔŋmɔ mumɔ krɔŋkrɔŋ lɛ naa wɔnɔ hewalɛ waa, ni wɔwoɔ yibii ni ji, “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, [henɔyeli, NW].” (Gal. 5:22, 23) Kpeei tswaa wɔ emaa shi, koni wɔdamɔ shi shiŋŋ ni wɔhe awa yɛ hemɔkɛyeli lɛ mli. Esaa wɔ koni wɔsaa wɔhe kɛha kaai ni kã wɔhiɛ lɛ.
5 Wɔtsɔɔ kpee ni wɔyaa daa lɛ nɔ wɔnáa nɔ ni lalatsɛ lɛ tsɔɔ mli ni aŋma afɔ shi yɛ Lala 133:1, 3 lɛ mli niiashikpamɔ: “Kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi lɛ!” Yɛ he fɛɛ he ni Nyɔŋmɔ webii sɔmɔɔ yɛ, ni amɛkpeɔ kutuu yɛ ŋmɛnɛ lɛ, ‘Yehowa ewo jɔɔmɔ kɛ wala shi eha yɛ jɛmɛ kɛyashi naanɔ.’