Sanebimɔ He

◼ Mɛni wɔbaanyɛ wɔfee koni wɔye wɔbua ni wɔkpeei lɛ amɔ shi jogbaŋŋ?

Ekolɛ mɛi komɛi baanu he akɛ onukpai kɛ asafoŋ sɔɔlɔi lɛ pɛ ji mɛi ni sɔ̃ kã amɛnɔ kɛha asafoŋ kpeei lɛ omanyeyeli, ejaakɛ amɛ amɛkwɛɔ nɔ, ni amɛtsuɔ emli nifeemɔi babaoo ahe nii. Lɛɛlɛŋ, wɔ fɛɛ wɔbaanyɛ wɔfee nɔ ko aŋkroaŋkro ni kpeei lɛ afee nɔ ni yɔɔ miishɛɛ, ni sɛɛnamɔ yɔɔ he. Wɔbaanyɛ wɔye wɔbua koni kpeei lɛ afee nɔ ni mɔɔ shi jogbaŋŋ yɛ gbɛi nyɔŋma ni nyiɛ sɛɛ nɛɛ anɔ:

Saamɔ ohe kɛtsɔ hiɛ. Kɛ wɔsaa wɔhe jogbaŋŋ lɛ, ehaa kpeei lɛ gbalaa wɔjwɛŋmɔ. Kɛ wɔ fɛɛ wɔfee enɛ lɛ, kpeei lɛ feɔ nɔ ni yɔɔ miishɛɛ waa kɛ nɔ ni tswaa mɔ emaa shi. Yaa daa. Kɛ gbɔmɛi ni baa lɛ ayi fa pii lɛ, ewoɔ mɛi fɛɛ ni yɔɔ jɛmɛ lɛ hewalɛ waa, ni ewoɔ hiɛsɔɔ ni ayɔɔ kɛhaa bɔ ni kpee ni aaaya lɛ he hiaa lɛ mli hewalɛ. Shɛ jɛmɛ mra. Kɛ wɔba mra dani gbɛjianɔtoo lɛ je shishi lɛ, wɔbaanyɛ wɔfata he yɛ shishijee lala kɛ sɔlemɔ lɛ mli, ni enɛ haa wɔnaa kpee lɛ he sɛɛ kɛmɔɔ shi. Wulamɔ ohe jogbaŋŋ kɛba. Kɛ wɔkɛ wɔ Biblia kɛ wolo loo woji ni akɛbaatsu nii yɛ kpee lɛ shishi lɛ ba lɛ, wɔbaanyɛ wɔnyiɛ sɛɛ, ni wɔnu nɔ ni awieɔ lɛ shishi jogbaŋŋ. Tsi ohe kɛjɛ nibii ni gbalaa mɔ jwɛŋmɔ lɛ ahe. Wɔbaanyɛ wɔbo sane toi jogbaŋŋ kɛ wɔtara hiɛ. Ablɛbi wiemɔ, niiasɛɛyaahe lɛ kɛ nushwiemɔhe lɛ yaa shii abɔ baanyɛ aha wɔ kɛ mɛi krokomɛi ajwɛŋmɔ aje saji lɛ anɔ. Feemɔ mɔ ni kɛ ehe woɔ mli. Kɛ wɔteŋ mɛi pii hole wɔniji anɔ ni wɔwie lɛ, wɔkɛwoɔ mɛi babaoo hewalɛ, ni wɔtswaa amɛ wɔmaa shi kɛtsɔɔ wɔ hemɔkɛyelii lɛ ahe wiemɔi anɔ. Ha saji ahetoo kuku. Enɛ haa gbɔmɛi pii hegbɛ ni amɛkɛ amɛhe woɔ mli. Esa akɛ wɔha wɔsaji ahetoo lɛ akɔ sane ni akaseɔ lɛ he. Tsu nifeemɔi ni akɛwoɔ odɛŋ lɛ ahe nii. Ákɛ Teokrase Sɔɔmɔ Skul lɛ mli nikaselɔi aloo mɛi ni naa Sɔɔmɔ Kpee lɛ mli gbɛfaŋnɔ lɛ, saamɔ ohe jogbaŋŋ, kasemɔ kɛtsɔ hiɛ, ni obɔ mɔdɛŋ koni obatsu he nii. Jiemɔ mɛi ni náa ­nifeemɔ lɛ ayi. Kɛɛmɔ mɛi krokomɛi bɔ ni hiɛ sɔɔ amɛmɔdɛŋbɔi lɛ ahaa. Enɛ tswaa amɛ emaa shi, ni etsirɛɔ amɛ koni wɔsɛɛ lɛ amɛfee fe nakai po. Wo mɛi krokomɛi hewalɛ. Ŋamɔi ni jɛ suɔmɔ mli kɛ sanegbaai ni tswaa mɔ emaa shi ni agbaa dani ajeɔ kpeei lɛ ashishi loo yɛ ekpamɔ sɛɛ lɛ kɛ nɔ ko fataa miishɛɛ kɛ sɛɛnamɔi ni wɔnáa kɛjɛɔ kpeeiyaa mli lɛ ahe.