“Gbɔmɛi Fɛɛ” ni Aaaye Amɛ Odase
1 Kɛ wɔkɛ mɛi ni esoro amɛ kusumii loo jamɔŋ shihilɛi kpe lɛ, wɔkaiɔ akɛ Yehowa suɔmɔnaa nii ji koni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Kɛfata dɛhiɛmɔ woji kɛ woji bibii krɛdɛɛi komɛi ni ato he gbɛjianɔ lɛ ahe lɛ, wɔyɛ woji enyɔ komɛi ni nɔ bɛ ni abaanyɛ akɛtsu nii be fɛɛ be koni akɛye abua aŋkroaŋkroi ni amɛjamɔŋ tsɔsemɔ lɛ etsɔko amɛ Nyɔŋmɔ kɛ Kristo he anɔkwale lɛ.
2 Wolo ni ji Nyɔŋmɔ Sɛɛ Gbɛ ni Adesai Taoɔ lɛ haa wɔnáa he ni je lɛŋ jamɔi wuji lɛ jɛ kɛba lɛ he nilee, ni yɛ no hewɔ lɛ ebaanyɛ eye ebua mɛi ni yɔɔ he fɛɛ he lɛ koni amɛkɛ amɛhemɔkɛyelii lɛ ato nɔ ni Biblia lɛ tsɔɔ yɛ anɔkwa Nyɔŋmɔ kome pɛ lɛ he lɛ he. Yɛ gbɛ kroko nɔ lɛ, kɛtsɔ Yesu Kristo shihilɛ lɛ ni wolo ni ji Gbɔmɔ ni Fe Mɔ Fɛɛ Mɔ ni Ehi Shi Pɛŋ lɛ maa nɔ mi lɛ nɔ lɛ, ebaanyɛ eye ebua mɔ ko koni ebale Nyɔŋmɔ Bi lɛ jogbaŋŋ koni eha ebɛŋkɛ lɛ, taakɛ eji yɛ mɛi babaoo ni yɔɔ klɛŋklɛŋ afii oha lɛ mli lɛ agbɛfaŋ lɛ. (Yoh. 12:32) Be fɛɛ be ni sa mli lɛ, ekolɛ obaasumɔ ni oka gbɛtsɔɔmɔi ni nyiɛ sɛɛ nɛɛ okwɛ koni okɛjie woji nɛɛ akpo otsɔɔ.
3 Kɛ osusuɔ akɛ ebaafee nɔ ni hi akɛ okɛ “Gbɔmɔ ni Fe Fɛɛ” wolo lɛ aaaha mɔ ko lɛ, obaanyɛ okɛɛ akɛ:
◼ “Mɛni baa ojwɛŋmɔ mli kɛ́ osusu Yesu Kristo he? [Ŋmɛɛ gbɛ ni ewie.] Yinɔsaneŋmalɔi babaoo kpɛlɛɔ Yesu nɔ akɛ gbɔmɔ ni fe mɔ fɛɛ mɔ ni ehi shi pɛŋ. [Tsĩi nɔkwɛmɔnɔ ko tã kɛjɛ Gbɔmɔ ni Fe Fɛɛ wolo lɛ hiɛkpamɔ wiemɔ lɛ mli.] Biblia lɛ tsɔɔ akɛ Yesu shihilɛ lɛ ji nɔkwɛmɔnɔ ni esa akɛ wɔkase.” Kanemɔ 1 Petro 2:21 kɛ klɛŋklɛŋ kuku ni yɔɔ Gbɔmɔ ni Fe Fɛɛ wolo lɛ mli hiɛkpamɔ wiemɔ lɛ naagbee baafa lɛ. Beni otee shiatsɛ lɛ miishɛɛ shi yɛ Yesu he nikasemɔ mli lɛ, okɛ wolo lɛ aha. Dani obaashi kɛya lɛ, kanemɔ Yohane 17:3 ni obi akɛ, “Te wɔbaafee tɛŋŋ wɔná nilee ni kɛ mɔ yaa naanɔ wala mli nɛɛ?” Too gbɛjianɔ jogbaŋŋ koni oku osɛɛ oyaha lɛ hetoo.
4 Kɛ oku osɛɛ otee koni oyatsɔɔ bɔ ni aaafee ni aná nilee ni haa mɔ wala lɛ, obaanyɛ okɛɛ akɛ:
◼ “Miwo shi akɛ maba koni mabatsɔɔ bo bɔ ni wɔbaafee ni wɔná nilee ni kɛ mɔ yaa naanɔ wala mli lɛ.” Okɛ Nilee wolo lɛ aha, ni okɛ klɛŋklɛŋ saneyitso lɛ atsu nii ni okɛfee nikasemɔ he nɔkwɛmɔnɔ.
5 Kɛ oosumɔ ni okɛ wolo ni ji “Nyɔŋmɔ Sɛɛ Gbɛ ni Adesai Taoɔ” lɛ aha lɛ, obaanyɛ okɛɛ akɛ:
◼ “Akɛni jamɔi sɔrɔtoi ni fa babaoo yɔɔ ŋmɛnɛ hewɔ lɛ, ani osusu bɔ ni wɔɔfee ni wɔle emli nɔ ni Nyɔŋmɔ kpɛlɛɔ nɔ lɛ he pɛŋ?” Kɛ ewie egbe naa lɛ, gbelemɔ Nyɔŋmɔ Sɛɛ Gbɛ ni Adesai Taoɔ wolo lɛ baafa 377. Maa sane oti ni ji 7 lɛ nɔ mi, ni obi shiatsɛ lɛ kɛ́ ekpɛlɛɔ nɔ akɛ esa akɛ anɔkwa jamɔ afee adesai fɛɛ ni esoro amɛ hewolonɔ sui lɛ ekome. Gbelemɔ ŋmalɛi ni aŋmalako amɛmli wiemɔi lɛ ateŋ ekome, ni kɛ́ be yɛ lɛ, nyɛsusua saji otii krokomɛi ni ato naa lɛ ekomɛi ahe. No sɛɛ lɛ okɛ wolo lɛ aha. Kɛ ooshi kɛya lɛ, obaanyɛ obi akɛ, “Mɛɛ gbɛ nɔ esa akɛ anɔkwa jamɔ aná mɔ jeŋba nɔ hewalɛ yɛ?” Too gbɛjianɔ koni oyafee sɛɛsaramɔ koni oha sanebimɔ lɛ hetoo.
6 Kɛ oku osɛɛ otee koni oyatsɔɔ bɔ ni anɔkwa jamɔ náa mɔ shihilɛ nɔ hewalɛ lɛ, obaanyɛ obi akɛ:
◼ “Te osusuɔ bɔ ni esa akɛ jamɔ aná mɛi ajeŋba nɔ hewalɛ eha tɛŋŋ? [Ŋmɛɛ gbɛ ni ewie.] Kristo kɛ shishitoo mla ko ha wɔ ni esa akɛ atsɔ nɔ akɛle bɔ ni jamɔ hi jogbaŋŋ eha.” Kanemɔ Mateo 7:17-20 tɛ̃ɛ kɛjɛ Nyɔŋmɔ Sɛɛ Gbɛ ni Adesai Taoɔ wolo lɛ mli baafa 12. No sɛɛ lɛ fɔ̃ɔ nine otsɛ shiatsɛ lɛ koni ekane kuku 20 yɛ baafai 13-14. Kɛ be yɛ lɛ, nyɛsusua kukuji 25-29 ni yɔɔ baafai 16-18 lɛ he. Enɛ baanyɛ ekɛ mɔ aya nikasemɔ mli yɛ Taoɔ wolo bibioo lɛ loo Nilee wolo lɛ mli.
7 Saji ni Akɛjeɔ Sanegbaa Shishi: Saji babaoo yɛ Nyɔŋmɔ Sɛɛ Gbɛ ni Adesai Taoɔ wolo lɛ mli ni yeɔ ebuaa kɛha nitsɔɔmɔ, ní abaanyɛ akɛtsu nii akɛ saji ni akɛjeɔ sanegbaa shishi yɛ klɛŋklɛŋ saramɔ loo sɛɛsaramɔ lɛ mli. Obaanyɛ oje sanegbaa shishi kɛtsɔ sanebimɔ ni sa kɛkɛ bimɔ nɔ. Ákɛ nɔkwɛmɔnɔ lɛ, kadimɔ sanebimɔi kɛ saneyitsei nɛɛ kɛ baafai ni awieɔ amɛhe yɛ mli lɛ:
“Sanebimɔi ni Esa Akɛ Ana Hetoo Aha Amɛ”—baafai 17-18.
“Ani Yesu Ji Adesã Mli Gbɔmɔ Ko?”—baafa 237.
“Namɔ Ŋma Biblia Lɛ?”—baafa 241.
“Qur’ān lɛ kɛ Biblia Lɛ”—baafa 285.
“Odaseyeli ni Tsɔɔ Anɔkwale ni Biblia lɛ Ji”—baafai 340-341.
“Nɔ Ni Yehowa Odasefoi Heɔ Yeɔ”—baafai 356-357.
“Bɔ ni Ooofee Oyoo Anɔkwa Jamɔ Lɛ”—baafa 377.
8 Obaanyɛ ogbele baafa(i) ni ahala yɛ Nyɔŋmɔ Sɛɛ Gbɛ ni Adesai Taoɔ wolo lɛ mli lɛ ni otsɔɔ sane oti ni asusuɔ he lɛ mli. No sɛɛ lɛ too sɛɛsaramɔ he gbɛjianɔ kɛtsɔ sane ni ooobi kɛnyiɛ sɛɛ lɛ nɔ, ní abaanyɛ aha hetoo kɛjɛ Taoɔ wolo bibioo lɛ loo Nilee wolo lɛ mli. Kwɛmɔ ni ofɔ̃ nine otsɛ shiatsɛ lɛ kɛba Maŋshiɛmɔ lɛ shishi.
9 Gbɔmɛi fɛɛ ni hiɛ tsui kpakpa lɛ miitao Nyɔŋmɔ kɛ Kristo he anɔkwale lɛ. Wɔbaanyɛ wɔye wɔbua amɛ yɛ wɔ odaseyeli nitsumɔ lɛ mli. No hewɔ lɛ, belɛ nyɛhaa wɔyaa nɔ ‘wɔgboa deŋme ni wɔmia wɔhiɛ, ejaakɛ wɔŋɔ wɔhiɛ wɔfɔ̃ Nyɔŋmɔ hiɛkalɔ lɛ nɔ, mɔ ni ji gbɔmɛi fɛɛ a-Yiwalaherelɔ lɛ.’—1 Tim. 4:10.