Kpee Krɛdɛɛ Gbi He Gbɛjianɔtoo Hee

Gbi kome kpee krɛdɛɛ he gbɛjianɔtoo lɛ je shishi yɛ afi 1987 mli. Nɛkɛ gbi kome henaabuamɔi nɛɛ efee nɔ ni tswaa Yehowa tsuji kɛ mɛi ni yɔɔ wiemɔ lɛ he miishɛɛ ni yaa lɛ emaa shi. Kɛjɛ August 1999 kɛyaa lɛ, akɛ gbi krɛdɛɛ kpee hee he gbɛjianɔtoo baaha. Obaana akɛ, wiemɔi nɛɛhu kɛ sanebimɔi kɛ niiashikpamɔi babaoo lɛ ji nɔ ni anáa he sɛɛ yɛ mumɔŋ.

Saneyitso kɛha gbɛjianɔtoo hee lɛ ji: “Jiemɔ Hiɛsɔɔ Kpo yɛ Yehowa Okpɔlɔ lɛ He.” (Yes. 65:14; 1 Kor. 10:21) Ebaawo wɔfaishitswaa akɛ esa akɛ jamɔ ni wɔkɛ haa Yehowa lɛ aye klɛŋklɛŋ gbɛhe yɛ wɔ shihilɛi amli lɛ mli hewalɛ. (Lala 27:4) Kpokpaa nɔkwɛlɔ lɛ gbɛfaŋnɔ lɛ baakɔ “Ni Wɔɔpɛi Nibii ni Wɔtsui Shweɔ lɛ Mli Wɔkwɛ” lɛ he yɛ kpeeiyaa he. Kpokpaa wulu nɔkwɛlɔ lɛ aloo wielɔ ni ahala ni baaha wiemɔ lɛ baatsɔɔ wɔ bɔ ni “Nyɛhiɛa Nyɛmumɔŋ Shidaamɔ lɛ Mli Kɛtsɔ Yehowa Okpɔlɔ lɛ Nɔ Nii ní Nyɛaaye Nii yɛ Nɔ lɛ Nɔ” ji. Abaawo Oblahii kɛ oblayei ni yɔɔ Yehowa gbɛjianɔtoo lɛ mli lɛ hewalɛ diɛŋtsɛ koni amɛhiɛ amɛ shifimɔ yɛ sɔɔmɔ ni amɛkɛ haa Nyɔŋmɔ lɛ mli. Wielɔ ni ahala lɛ wiemɔ titri ni yitso ji “Awaje Wɔ yɛ Mumɔŋ Koni Wɔkɛ Ekãa Ashiɛ” lɛ baatsɔɔ bɔ ni gbɛjianɔ ni ato kɛtsɔ asafo lɛ nɔ lɛ wulaa wɔ koni wɔkɛ ekãa aye Maŋtsɛyeli lɛ he odase. Namɔ sumɔŋ ni ená nɛkɛ gbɛjianɔtoo nɛɛ he sɛɛ?

Mɛi hee ni ejɔɔ amɛhe nɔ ni miisumɔ ni abaptisi amɛ lɛ aha onukpai asɛinɔtalɔ lɛ ale amrɔ nɔŋŋ. Wɔyɛ nɔmimaa akɛ, ní wɔjeɔ gbi kome kpee krɛdɛɛ he gbɛjianɔtoo lɛ afi ni ji 12 lɛ shishi nɛɛ, mɔ fɛɛ mɔ ni baaya lɛ baaná mumɔŋ hiɛyaa kɛha nitsumɔ ni kã wɔhiɛ lɛ.