Okɛ Weku Miishɛɛ Wolo lɛ Aha Gbɔmɛi ni Eye Afii Srɔtoi Fɛɛ
1 Gbekɛ nuu ko ni eye afii 11 ni jɛ California yɛ United States lɛ jie hiɛsɔɔ ni eyɔɔ kɛha wolo ni ji, Nɔ Diɛŋtsɛ ni Kɛ Weku Miishɛɛ Baa lɛ kpo etsɔɔ. Eŋma akɛ: “Miida shi yɛ no hewɔ, ni miiwo wekui krokomɛi hewalɛ koni amɛkane nɛkɛ wolo nɛɛ, ejaakɛ enɔ bɛ. Eeye eebua miweku lɛ . . . koni amɛna toiŋjɔlɛ kɛ miishɛɛ yɛ wɔ shia.” Esa akɛ gbekɛ nɛɛ niiashikpamɔ lɛ awo wɔ hewalɛ koni wɔkɛ Weku Miishɛɛ wolo lɛ aha gbɔmɛi ni eye afii srɔtoi fɛɛ. Naa ŋaawoi fioo komɛi ni ekolɛ obaasumɔ ni oka okwɛ yɛ osɔɔmɔ nitsumɔ lɛ mli yɛ February mli.
2 Kɛ́ okɛ oblanyo ko kpe lɛ, obaanyɛ okɛɛ akɛ:
◼ “Otipɛŋfoi pii miisusu gbalashihilɛ he. Shi nɛgbɛ obaanyɛ oná saji ni anyɛɔ akɛ he fɔ̃ɔ nɔ, ni kɔɔ sane nɛɛ he lɛ yɛ? [Ŋmɛɛ gbɛ koni eha hetoo.] Oblahii kɛ oblayei fɔɔ kɛɛmɔ akɛ amɛleee akɛ amɛshɛ kɛha gbalashihilɛ loo amɛshɛko. Ha ni mikɛ bo asusu nɔ ni wolo bibioo nɛɛ kɛɔ yɛ sane lɛ he lɛ he.” Gbelemɔ Weku Miishɛɛ wolo lɛ baafa 14 lɛ, ni nyɛkane kuku 3 lɛ. Koni agbɛnɛ, okɛ saneyitsei bibii ni yɔɔ yitso lɛ mli lɛ atsɔɔ lɛ. Okɛ wolo lɛ aha lɛ, ni oto gbɛjianɔ koni oku osɛɛ.
3 Kɛ okɛ fɔlɔ ko miiwie lɛ obaanyɛ okɛɛ akɛ:
◼ “Wɔkɛ fɔlɔi miisusu gbɛtsɔɔmɔi ni anyɛɔ akɛtsuɔ nii ni hi jogbaŋŋ kɛha gbekɛbii atsɔsemɔ lɛ ahe. Áŋmala enɛɛmɛi awo nɛkɛ wolo bibioo nɛɛ ni ji Nɔ Diɛŋtsɛ ni Kɛ Weku Miishɛɛ Baa lɛ mli.” Gbelemɔ baafa 55. Kanemɔ kuku 10 lɛ, ni okɛ 5 Mose 6:6, 7 lɛ ni yɔɔ kuku 11 lɛ afata he. Koni agbɛnɛ, okɛ saji ni ama nɔ mi ni yɔɔ kukuji 12 kɛyashi 16 lɛ afata he. Yaa nɔ ni okɛɛ akɛ: “Wolo nɛɛ eye ebua mɛi pii ni ji fɔlɔi, ni amɛye omanye babaoo. Ebaaŋɔɔ minaa akɛ mikɛ enɛ aaaha bo.”
4 Kɛ okɛ mɔ ko ni eda miiwie lɛ, obaanyɛ okɛɛ akɛ:
◼ “Ofainɛ, kɛ mikane sane kuku nɛɛ migbe naa lɛ, kɛɛmɔ mi nɔ ni osusuɔ yɛ he.” Gbelemɔ Weku Miishɛɛ wolo lɛ baafa 169 lɛ, ni okane klɛŋklɛŋ saji enyɔ ni yɔɔ kuku 17 lɛ. Koni obi ni eha hetoo. Obaanyɛ odamɔ hetoo ni ehaa lɛ nɔ, ni okane wolo lɛ mli saji krokomɛi hu dani okɛha lɛ.
5 Kɛ ooku osɛɛ oyasara mɛi ni okɛ Weku Miishɛɛ wolo lɛ eha amɛ lɛ, ha mɔdɛŋ ni ooobɔ koni oje Biblia mli nikasemɔ shishi lɛ ahi ojwɛŋmɔ mli. Taoɔ wolo bibioo lɛ Nikasemɔ 8 lɛ, aloo Nilee wolo lɛ yitso 15 lɛ baanyɛ afee he ni hi jogbaŋŋ ni aaanyɛ aje shishi kɛjɛ. Yɛ fɛɛ mli lɛ, nyɛhaa wɔbɔa mɔdɛŋ wɔyea wɔbuaa gbɔmɛi ni eye afii srɔtoi fɛɛ koni amɛtswa Kristofoi aweku shihilɛ ni miishɛɛ yɔɔ mli amɛma shi.