1999 “Nyɔŋmɔ Gbalɛ Wiemɔ” Kpokpaa Wulu nɔ Kpeei
1 Beni eshwɛ fioo ni Israelbii lɛ baashɛ Shiwoo Shikpɔŋ lɛ nɔ lɛ, Mose kpá amɛ fai koni amɛhiɛ asɔ Nyɔŋmɔ nitsɔɔmɔ lɛ. Ekɛɛ amɛ akɛ: “Jeee wiemɔ folo ji ha nyɛ, shi moŋ nyɛyiwala ni.” (5 Mose 32:45-47) Ani esaaa akɛ wɔdaa Yehowa shi yɛ bɔ ni wɔwala jara wa yɛ ehiɛ kɛ bɔ ni eyaa nɔ ekɛ e-Wiemɔ ni jara wa waa lɛ kudɔɔ wɔ lɛ hewɔ? No hewɔ lɛ, wɔmiikpa gbii etɛ-“Nyɔŋmɔ Gbalɛ Wiemɔ” Kpokpaa Wulu nɔ Kpee lɛ kɛ nɔ ni Yehowa esaa eto eha wɔ lɛ gbɛ waa diɛŋtsɛ.
2 Afi nɛɛ, ato kpokpaa wulu nɔ kpeei ahe gbɛjianɔ jogbaŋŋ yɛ hei 17 yɛ Ghana fɛɛ. Abaafee kpee lɛ yɛ Blɔfo, Dangme, Ewe, Frafra, Ga, Nzema, Mumuii Awiemɔ, kɛ Twi wiemɔ mli. Kɛfata he lɛ, enɛ ji klɛŋklɛŋ be ni abaafee kpee yɛ Blɔfo wiemɔ mli yɛ maŋ nɛɛ mli yɛ kpee wulu fɛɛ kpee wulu ni abaaya lɛ shishi aha mɛi ni yɔɔ he miishɛɛ akɛ amɛaasɔmɔ yɛ Betel lɛ.
3 Ŋwanejee ko bɛ he akɛ oto gbɛjianɔ momo akɛ obaaya kpee lɛ gbi fɛɛ gbi akɛni oheɔ oyeɔ akɛ Yehowa miikpá gbɛ akɛ obaaya eko lɛ hewɔ. Ná nɔmimaa akɛ enaa mɔdɛŋbɔɔi kɛ afɔleshaai fɛɛ ni etsuji kɛtsuɔ nii koni amɛya kpeei lɛ, ni ekɛ hiɛsɔɔ kaiɔ enɛɛmɛi. (Heb. 6:10) Kɛ wɔtee kpee lɛ eko fɛɛ eko kɛjɛ lala ni akɛjeɔ shishi lɛ nɔ kɛyashi naagbee sɔlemɔ lɛ nɔ lɛ, wɔhaa Yehowa leɔ kɛtsɔ nakai feemɔ nɔ akɛ wɔbuɔ ewiemɔi ni ekɛha wɔ lɛ akɛ ejara wa. (5 Mose 4:10) Agbɛnɛ hu, wɔjieɔ hiɛsɔɔ kpo wɔtsɔɔ yɛ nitsumɔ ni wa ni wɔ nyɛmimɛi babaoo lɛ tsuɔ kɛtoɔ kpee lɛ he gbɛjianɔ lɛ hewɔ.
4 Gbɛjianɔ ni atoɔ koni Nyɔŋmɔ webii akpei abɔ abua amɛhe naa yɛ he fɛɛ he ni afeɔ kpee yɛ lɛ biɔ ni ato gbɛjianɔ kɛtsɔ hiɛ koni nibii aya nɔ yɛ gbɛjianɔtoo kpakpa naa. Esa akɛ le ni wɔle akɛ ato kpee he gbɛjianɔ yɛ suɔmɔ mli lɛ atsirɛ wɔ, ní wɔkɛ ekomefeemɔ atsu nii, koni “afee nii fɛɛ bɔ ni yɔɔ fɛo kɛ gbɛnaa gbɛnaa.” (1 Kor. 14:40) Akɛ saji kɛ kaimɔ wiemɔi ni nyiɛ sɛɛ nɛɛ miiha koni onyɛ oyashɛ kpee lɛ shishi yɛ be mli ni osaa ohe jogbaŋŋ akɛ obaaná mumɔŋ niyenii kɛ Kristofoi anaanyobɔɔ mli ŋɔɔmɔ lɛ.
Dani Kpee Be lɛ Baashɛ
5 Ani ehe miihia ni aye abua mɛi ni okɛ amɛ feɔ Biblia mli nikasemɔi lɛ kɛ mɛi krokomɛi ni yɔɔ wiemɔ lɛ he miishɛɛ lɛ koni amɛto gbɛjianɔ kɛha kpee lɛ yaa? Nɔ ni amɛnaa ni amɛnuɔ beni amɛyɔɔ jɛmɛ lɛ baanyɛ atsirɛ amɛ koni amɛtsɔmɔ Yehowa jálɔi. (1 Kor. 14:25) Esa akɛ onukpai lɛ ale mɔ fɛɛ mɔ ni sumɔɔ ni aye abua lɛ koni ená wɔɔhe loo tsɔne ni ebaatá mli lɛ, titri lɛ asafo lɛ mli bii ni egbɔlɔ lɛ, koni amɛkwɛ ni atsu amɛhiamɔ nii ahe nii yɛ suɔmɔ mli.—Gal. 6:10.
6 Ani ogbe gbɛjianɔ ni otoɔ koni oná wɔɔhe lɛ naa? Kɛ obaawɔ gbɔiatoohe lɛ, ani oná nɔ ni maa nɔ mi akɛ onine baashɛ wɔɔhe lɛ nɔ, ni okɛ oshika lɛ eyaha mɛi ni toɔ kpee lɛ he gbɛjianɔ lɛ? Kɛbashi amrɔ nɛɛ, esa akɛ asafoŋ woloŋmalɔ lɛ kɛ “Room Request” woji fɛɛ ni Asafoŋ Sɔɔmɔ Ajinafoi Akuu lɛ ekpɛlɛ nɔ lɛ emaje kpee shishi adrɛs ni sa lɛ. Kɛ aha bo wɔɔhe yɛ hiamɔ nii krɛdɛɛ he gbɛjianɔtoo lɛ naa, ni osumɔɔɔ dɔŋŋ lɛ, ofainɛ ni okɛɛ nyɛmimɛi ni yɔɔ Rooming Department ni yɔɔ jɛmɛ lɛ amrɔ nɔŋŋ koni anyɛ akɛ wɔɔhe lɛ aha mɔ kroko. Abaanyɛ ana adrɛs lɛ yɛ nɔ ni aŋma ahɔ June 1999 Wɔ Maŋtsɛyeli Sɔɔmɔ lɛ mli lɛ baafa 6.
7 Kɛ ootao saji ni kɔɔ kpee ko he lɛ, no lɛ okɛ adrɛs ni akɛha yɛ nɔ ni aŋma ahɔ June 1999 Wɔ Maŋtsɛyeli Sɔɔmɔ lɛ mli lɛ atsu nii. Ofainɛ, kaatswa Asafo lɛ loo gbɛjianɔtoo ni kwɛɔ he ni afeɔ kpee lɛ yɛ lɛ nɔ lɛ tɛlifoŋ ni kaaŋma amɛ wolo.
8 Akɛni ato Tsofafeemɔ Nitsumɔhe ni yɔɔ kpee lɛ shishi lɛ he gbɛjianɔ koni etsu nibii ni baa trukaa pɛ he nii hewɔ lɛ, wɔmiijie yi akɛ, okɛ bo diɛŋtsɛ o-asprin, falafii mamai, tsofai ni ashwɔɔ awoɔ gugɔŋ, tsofai ni haa mɔ mli kãa, kɛ nibii ni tamɔ nakai aya kpee lɛ, kɛ́ ole ojogbaŋŋ akɛ nibii ni tamɔ nakai ahe baanyɛ ahia. Kɛ bo loo osuɔlɔ ko yɛ hela ko ni naa wa ni ehiii tsamɔ, tamɔ tsui hela, sikli hela, loo akɛ, gbiligbili baanyɛ afee bo loo lɛ lɛ, ofainɛ ni okɛ tsofa ni he hiaa lɛ aba kpee lɛ koni akɛtsu hiamɔ nii nɛɛ ahe nii tamɔ nɔ ni oyɛ shia loo otee gbɛhamɔ pɛpɛɛpɛ. Eeefee nɔ ni nilee yɔɔ mli akɛ weku lɛ mlinyo loo naanyo ko ni bɛŋkɛ lɛ kpaakpa ni le eshihilɛ lɛ ahi emasɛi be fɛɛ be ejaakɛ nakai mɔ lɛ ji mɔ ni baanyɛ ekɛ yelikɛbuamɔ ni he hiaa jogbaŋŋ lɛ aha.
9 Ekolɛ obaaná hegbɛi ni baaha oye trukaa odase yɛ be mli ni ofãa gbɛ kɛyaa kpee lɛ kɛbaa lɛ. Ani obaasaa ohe koni ogba mɛi krokomɛi anɔkwale lɛ he sane? Wɔ fɛɛ, ní gbekɛbii bibii fata he lɛ baanyɛ ni wɔkɛ wɔhe awo mli kɛtsɔ dɛhiɛmɔ woji ni wɔkɛaaha pɛtro hɔɔlɔi, toohelɔi, kɛ mɛi krokomɛi ni wɔkɛkpeɔ yɛ wɔ gbɛfãa lɛ mli lɛ nɔ. Abaaná hegbɛi koni akɛ woji tɛtrɛbii, woji bibii, loo woji krokomɛi aha mɛi ni yɔɔ wiemɔ lɛ he miishɛɛ lɛ. Saamɔ ohe koni oye mɛi ni kulɛ onine shɛŋ amɛnɔ kɛtsɔ shiɛmɔ nitsumɔ gbɛi ni bei pii lɛ wɔkɛtsuɔ nii lɛ nɔ lɛ trukaa odase.
Beni Afeɔ Kpee Lɛ
10 Obaanyɛ oshi sɛii oha oweku kɔkrɔɔ lɛ mli bii kɛ mɛi ni kɛ bo baafã gbɛ yɛ bo diɛŋtsɛ otsɔne mli lɛ pɛ. Abaashi sɛii ni hi jogbaŋŋ aha nyɛmimɛi hii kɛ yei ni egbɔlɔ lɛ, ni abaatao he ko aha mɛi ni bɛ gbɔmɔtsoŋ hewalɛ kɛ mɛi ni ehe baahia ni amɛná he ni amɛkɛ helatsɛmɛi ashwiilii baatsɔ lɛ. Anyɛŋ aná tsũi krɛdɛɛi komɛi yɛ kpee lɛ shishi aha mɛi ni yeɔ tsɛŋemɔ helai loo nibii komɛi kɛ amɛ yeee lɛ. Gbi fɛɛ gbi ni oooshi he ni otá lɛ, ofainɛ ni okwɛ akɛ onibii lɛ fɛɛ eshɛ lo.
11 Bɔni afee ni wɔkpe akɛ kui ni dara kɛha wɔ kpokpaa wulu nɔ kpeei lɛ, aabi koni wɔkɛ maŋ mlai, la he mlai, kɛ nibii krokomɛi ni kɔɔ shweshweeshwefeemɔ he lɛ atsu nii. No hewɔ lɛ, esaaa akɛ akɛ abifabii ashwiilii kɛ agbónaa sɛii mamɔɔ hei ni atsɔɔ kɛjeɔ kpo lɛ yɛ asa lɛ nɔ loo yɛ agba lɛ shishi he ni wɔbua wɔhe naa yɛ lɛ. Enɛɛmɛi ji nibii ni kɛ́ mɔ ko nane shi lɛ lɛ ebaanyɛ epila lɛ yɛ hei ni atsɔɔ kɛjeɔ kpo loo yɛ sɛii ni ato naa lɛ ateŋ. Shi kɛlɛ, abaaŋmɛ gbɛ koni akɛ abifabii asɛii ni abaanyɛ akɛma fɔlɔi lɛ amasɛi yɛ sɛi ni amɛtara nɔ lɛ he ní abaanyɛ akwɛ nɔ jogbaŋŋ yɛ jɛmɛ lɛ aba.
12 Ani abaabaptisi bo yɛ kpokpaa wulu nɔ kpee lɛ shishi? Abaashi sɛii lɛ ekomɛi aha mɛi ni abaabaptisi amɛ lɛ yɛ Hɔɔ leebi nifeemɔ lɛ mli, ni mɛi ni kwɛɔ mɛi ashitaramɔ nɔ lɛ baatsɔɔ bo gbɛ kɛya jɛmɛ. Kɛ eeehi kwraa lɛ, ofainɛ ni oyata jɛmɛ dani nifeemɔ lɛ aje shishi. Okɛ o-Biblia, lala wolo, papam, kɛ atade ni sa ni akɛboteɔ nu mli aba. Atadei ni amɛkɛlɛmɔ hooo nakutsei anaa, T-shɛɛtii ni aŋmala nibii yɛ nɔ, kɛ atadei ni tamɔ nakai lɛ jeee nɔ ni sa kɛha be ni yɔɔ nyam tamɔ nɛkɛ. Onukpai ni kɛ mɛi ni abaabaptisi amɛ lɛ tĩɔ sanebimɔi ni yɔɔ Biblia Mli Shishijee Tsɔ̃ɔmɔi wolo bibioo lɛ mli lɛ akwɛ koni mɔ fɛɛ mɔ anu saji otii nɛɛ ashishi. Akɛni baptisimɔ ji mɔ lɛ diɛŋtsɛ he nɔ ni ejɔɔ ehaa Yehowa Nyɔŋmɔ lɛ he okadi hewɔ lɛ, ebafeŋ nɔ ni sa akɛ mɛi ni abaabaptisi amɛ lɛ aaamɔmɔ amɛniji amli yɛ be mli ni abaptisiɔ amɛ lɛ.
13 Obaanyɛ okɛ kamera, tsɔnei bibii ni akɛshaa vidio, kɛ nibii ni akɛmɔmɔɔ wiemɔi atsu nii yɛ kpee lɛ shishi. Shi kɛlɛ, esaaa akɛ bɔ ni akɛmamɔɔ shi loo akɛtsuɔ nii ahaa lɛ tsĩɔ hei ni atsɔɔ kɛjeɔ kpo, loo etsĩɔ mɛi krokomɛi ahiɛ, loo egbalaa amɛjwɛŋmɔ kɛjɛɔ nifeemɔ lɛ nɔ. Esa akɛ amɛfee tsɔnei ni hiɛ amɛhe—ní tsɔɔ akɛ, akɛ amɛhe kpaai lɛ tsaraaa sarawa hewalɛ loo adekai ni wiemɔi tsɔɔ mli lɛ asɛɛ kpaai lɛ.
14 Akɛni tɛlifoŋ ni kpaa bɛ sɛɛ kɛ nibii ni gbɛɛɔ ni akɛtsuɔ nii lɛ miifá waa hewɔ lɛ, ofainɛ ni okwɛ jogbaŋŋ koni nɛkɛ tsɔnei nɛɛ akagbala ojwɛŋmɔ kɛmiijɛ nifeemɔ lɛ nɔ loo egba mɛi ni tara he ni oyɔɔ ni boɔ toi waa lɛ ajwɛŋmɔ naa. Esaaa akɛ ahaa tsɔnei nɛɛ gbɛɛɔ waa beni otá toibolɔi lɛ ateŋ. Kɛ ehe miihia ni okɛ tɛlifoŋ ni kpaa bɛ sɛɛ atsu nii beni nifeemɔ lɛ yaa nɔ lɛ, ofainɛ ni oje agba lɛ shishi koni okɛyatsu nii yɛ sɛɛgbɛ.
15 Yɛ sɛɛnamɔ ni yɔɔ be kɛ nibii ni afeɔ lɛ kukuji lɛ ahe hewɔ lɛ, Asafo lɛ ebi koni wɔkɛ wɔ diɛŋtsɛ wɔshwane niyenii aba kpee lɛ shishi daa gbi. Nyɛmimɛi babaoo kɛ gbɛtsɔɔmɔ nɛɛ etsu nii, ni amɛna akɛ, amɛbaanyɛ amɛkɛ amɛwekui lɛ atara shi ni amɛye nɔ ni amɛkɛba nakai gbi lɛ yɛ be mli ni akpa fioo shwane lɛ. Mɛi babaoo ekɛɛ akɛ, hegbɛ ni amɛnáa koni amɛkɛjɔɔ amɛhe beni akpa fioo shwane, ní amɛnáa be amɛkɛ amɛnyɛmimɛi hii kɛ yei lɛ bɔɔ lɛ efee miishɛɛ sane. Enɛ biɔ ni ahe niyenii kɛ nibii ni abaanu lɛ kɛtsɔ hiɛ, ní abua naa awo nɔ ko loo nɔ ko fioo ni haa niyenii mli jɔɔ lɛ mli ni anyɛ akɛwo sɛi lɛ shishi. Wɔmiibi ni mɛi fɛɛ ni baa kpee lɛ kɛ gbɛtsɔɔmɔ nɛɛ atsu nii. Niyenii hɔɔlɔi komɛi ni yɔɔ hei ni wɔfeɔ wɔkpeei lɛ yɛ lɛ naa akɛ, nyɛmimɛi komɛi shĩɔ asa lɛ loo kpeehe lɛ koni amɛyahe niyenii kɛjɛ mɛi ni hɔɔ nii yɛ gbɛjegbɛi lɛ nɔ lɛ adɛŋ kɛ niyelihei ni bɛŋkɛ lɛ. Enɛ haa amɛteŋ mɛi komɛi gbeleɔ amɛnihɔɔmɔhei lɛ anaa yɛ kpeehei lɛ koni amɛhɔɔ nii amɛha mɛi ni baa wɔkpeei lɛ. Kɛ aŋmɛ enɛ feemɔ gbɛ lɛ, jeŋbii pii kɛ amɛhe baafutu wɔ yɛ shwane mli. Agbɛnɛ hu, mɛi ni yi fáa babaoo yɛ he kome kɛ bɔ ni atoɔ sɛrɛnɛɛ kɛdamɔɔ niyenii ahe lɛ baaba ekoŋŋ taakɛ eji tsutsu ko lɛ, ni ebaagba wɔkpeei ni wɔkɛ miishɛɛ feɔ lɛ naa. No hewɔ lɛ, wɔmiibi ni mɔ fɛɛ mɔ abɔ mɔdɛŋ ni ekɛ lɛ diɛŋtsɛ eniyenii kɛ nii ni ebaanu lɛ aba kpee lɛ shishi daa gbi. Esa akɛ mɛi ni yɔɔ wiemɔ lɛ he miishɛɛ ni fataa ohe kɛbaa kpee lɛ hu kɛ amɛ diɛŋtsɛ amɛniyenii aba. Akɛ glasei ni akɛ niyenii woɔ mli kɛ dãa ni wa akaba he ni afeɔ kpee lɛ yɛ lɛ.
16 Ani obaanyɛ okɛ ohe aha koni aha he ni afeɔ kpee lɛ yɛ lɛ afee falefale yɛ be mli ni akpa kpee lɛ yɛ gbi lɛ eko fɛɛ eko nɔ? Aloo ani obaanyɛ otsu nii yɛ nitsumɔhei lɛ eko mli yɛ kpee lɛ shishi? Kɛ obaanyɛ oye obua lɛ, ofainɛ ni oya Volunteer Service Department lɛ yɛ kpee lɛ shishi. Gbekɛbii ni yeko afii 16 lɛ baanyɛ ni amɛkɛ amɛhe awo nitsumɔ lɛ mli yɛ amɛfɔlɔ loo onukpa kroko kwɛmɔ shishi. Shi kɛlɛ, mɔ fɛɛ mɔ baanyɛ aye abua koni aha he ni afeɔ kpee lɛ yɛ lɛ afee falefale kɛtsɔ jwɛi fɛɛ ni aaahala yɛ shikpɔŋ koni akɛwo jwɛiniiaŋ lɛ nɔ.
17 Wɔnine eshɛ gbɛtsɔɔmɔi kpakpai anɔ ni tsɔɔ nɔ ni ji atade kɛ hesaamɔ ni sa yɛ wɔkpeei wuji ashishi. Ákɛ nɔkwɛmɔnɔ lɛ: Wɔyɛ enɛ he gbɛtsɔɔmɔ yɛ nɔ ni aŋmala ahɔlɔ Wɔ Maŋtsɛyeli Sɔɔmɔ srɔtoi lɛ amli, wɔyɛ mfonirii yɛ wɔwoji lɛ amli, ni nɔ ni fe fɛɛ lɛ, wɔyɛ nɔ ni Yehowa kɛɔ yɛ Biblia lɛ mli lɛ. (Rom. 12:2; 1 Tim. 2:9, 10) Mɛi le mɛi ni ji wɔ kɛ nɔ hewɔ ni wɔbua wɔhe naa yɛ amɛmaŋ lɛ mli. No hewɔ lɛ, wɔtadewoo kɛ hesaamɔ lɛ po diɛŋtsɛ yeɔ odase jogbaŋŋ diɛŋtsɛ. Yehowa webii lɛ ateŋ mɛi babaoo feɔ nɔkwɛmɔnɔ kpakpa yɛ enɛ mli. Shi kɛlɛ, yɛ bei komɛi amli lɛ, wɔnaa akɛ je lɛŋ mumɔ lɛ boteɔ mɛi komɛi ni yaa wɔkpeei wuji lɛ atadewoo kɛ hesaamɔ mli. Atadei fɛɛ ni haa mɔ he kãa lɛ haa anáa yiŋkɔshikɔshifeemɔ yɛ kɛɛmɔ ni mɔ lɛ kɛɔ akɛ eji mumɔŋ gbɔmɔ lɛ he. Hesaamɔ ni sa, ní he tse, ní yɔɔ falefale lɛ ji nɔ ni sa hiɛ waa. No hewɔ lɛ, esa akɛ weku yitsei lɛ ale atade ni amɛweku lɛ mli bii toɔ he gbɛjianɔ akɛ amɛaawo lɛ. Akɛ enɛ baatsu nii hu beni wɔshi kpeehe lɛ. Wɔtsitsinaa-tsɛɛ nii lɛ ni wɔɔtsɛ dani aje kpee lɛ shishi kɛ beni akpa kpee lɛ hu haa ayɔseɔ wɔ akɛ, wɔji mɛi ni kɛ Yehowa kɛ ewebii ni he tse lɛ bɔɔ.—Okɛto Marko 8:38 he.
18 Mumɔ kanya Maŋtsɛ Salomo nilelɔ lɛ koni ewie akɛ, “buulufeemɔ kpɛtɛ gbekɛ tsui he” kɛ “gbekɛ ni akpoo ejeŋ afɔ̃ enɔ lɛ, ewoɔ enyɛ hiɛgbele.” (Abɛi 22:15; 29:15) Beni kpee lɛ yaa nɔ lɛ, gbekɛbii Odasefoi ni akwɛɛɛ amɛnɔ lɛ kɛ naagba eba nyɛmimɛi hii kɛ yei ni bɔɔ mɔdɛŋ koni amɛná kpee lɛ he sɛɛ lɛ anɔ. Yɛ nyɛsɛɛ afi lɛ kpeei ni afee lɛ mli lɛ, ana gbekɛbii komɛi ni amɛmiishwɛ yɛ tsɔnei ni mamɔ shi lɛ amli loo amɛmiifo shi kɛkɛ yɛ agba lɛ sɛɛ loo yɛ asa lɛ sɛɛ beni kpee lɛ yaa nɔ lɛ. Eyɛ faŋŋ akɛ, nɛkɛ gbekɛbii nɛɛ náaa mumɔŋ gbɛjianɔtoo ni asaa ato amɛ hu lɛ he sɛɛ. Akɛni fɔlɔi baabu akɔntaa amɛha Yehowa yɛ amɛbii lɛ ajeŋba he hewɔ lɛ, nyɛ lɛ loo tsɛ lɛ baanyɛ aná nɔmimaa akɛ kɛ́ gbekɛbii lɛ baaba amɛjeŋ ojogbaŋŋ yɛ Yehowa gbɛtsɔɔmɔi anaa ni amɛaabo toi lɛ, ja gbekɛbii lɛ tara amɛmasɛi. Mɛi ni kwɛɔ shitaramɔ nɔ lɛ baabɛŋkɛ mɛi fɛɛ ni jieɔ mɔ jwɛŋmɔ kɛjɛɔ nifeemɔ lɛ nɔ lɛ, ní amɛkɛɛ amɛ koni amɛfɔ̃ɔ nakai feemɔ, ní amɛkɛ mlihilɛ akai amɛ koni amɛbo nifeemɔ lɛ toi.
19 Akɛni wɔhereɔ maŋbii kɛbaa wɔkpeei ashishi hewɔ lɛ, nilee yɛ mli akɛ wɔkɛ nibii ni tsɔɔ akɛ wɔmiikwɛ wɔhe nɔ jogbaŋŋ yɛ wɔbii kɛ wɔ nibii ahe lɛ atsu nii. Wɔbii lɛ ji nikeenii ni jɛ Yehowa dɛŋ. Shi wɔle akɛ je lɛ jieɔ su ni Satan kɛtsuɔ nii ni tsɔɔ akɛ ebaaye mɔ awui lɛ kpo. No hewɔ lɛ, ofainɛ ni ole he ni obii lɛ yɔɔ be fɛɛ be. Agbɛnɛ hu, hiɛmɔ kamera, shika kotokui, kɛ nibii krokomɛi ni jara wa lɛ be fɛɛ be, ni kaashi yɛ osɛi lɛ nɔ. Kwɛmɔ koni oŋmɛ otsɔne mli, ni okɛ onibii awo tsɔne lɛ sɛɛ loo ohiɛ enɛɛmɛi. Enɛ haa kaa ni yɔɔ akɛ mɔ ko aaabote otsɔne mli koni eyaju nɔ ko lɛ baa shi.
20 Rooming Department ni yɔɔ jɛmɛ lɛ miisumɔ waa akɛ eye ebua bo, kɛ́ oná naagba ni kɔɔ owɔɔhe lɛ he. Ofainɛ, kɛ́ oná naagbai komɛi beni oyɔɔ kpee lɛ shishi lolo lɛ, kɛɛmɔ nyɛmimɛi ni yɔɔ Rooming Department lɛ. Nyɛmimɛi lɛ baaná he miishɛɛ akɛ amɛaaye amɛbua bo koni osaa sane lɛ ní onyɛ oná kpee lɛ mli ŋɔɔmɔ daa. Ofainɛ ni okadi nɔ ni nyiɛ sɛɛ nɛɛ hu yɛ otsutaomɔ lɛ he:
▪ Bei pii lɛ tɛlivishiŋ kɛ vidio ni yɔɔ gbɔiatoohei lɛ haa anáa adafitswaa gbɛ̀i ni jieɔ mɛi ni ejie amɛhe efoji amɛtsɔɔ. Gbɔiatoohei babaoo baatsĩ adafitswaa gbɛ̀i komɛi loo nibii komɛi ni ajieɔ atsɔɔ lɛ anaa yɛ be ni akɛha bo koni okɛhi tsũ lɛ mli lɛ gbɛ kɛ́ obi ni amɛfee nakai. Taakɛ eji yɛ shia lɛ, ofainɛ ni okwɛ obii anɔ beni amɛkwɛɔ tɛlivishiŋ lɛ.
21 Eji hewalɛwoo akɛ aaana ni nyɛmimɛi hii kɛ yei miiŋmala nibii bibii beni kpeei lɛ yaa nɔ lɛ. Saji kukuji ni oooŋmala lɛ baaye abua koni ojwɛŋmɔ ahi nifeemɔ lɛ nɔ, ní okai saji otii lɛ. Kɛ bo kɛ oweku lɛ loo nanemɛi tĩ saji bibii ni oŋmala lɛ mli yɛ sɛɛ mli lɛ, ehaa nyɛjwɛŋɔ kpee lɛ mli saji otii lɛ anɔ koni nyɛhiɛ akakpa nɔ.
22 Yehowa webii efee mɛi ni kɛ tsuijurɔ haa nii yɛ be mli ni amɛyeɔ too kɛha teokrase nitsumɔi lɛ. (2 Mose 36:5-7; 2 Kron. 31:10; Rom. 15:26, 27) Akɛ too ni ojɛɔ suɔmɔ mli okɛhaa koni akɛtsu jeŋ muu fɛɛ nitsumɔ lɛ woɔ nyɔmɔ ni abɔɔ yɛ tsũ haimɔ loo hei wuji asaamɔ kɛha kpeei lɛ afeemɔ lɛ mli. Kɛ okɛ too ni oyeɔ lɛ miiha kɛmiitsɔ tsɛk nɔ lɛ, ofainɛ ni otsɔɔ akɛ oowo kɛmiiha “Watch Tower.”
23 Taakɛ aŋma yɛ Amos 3:7 lɛ, Yehowa kɛɛ “efeŋ nɔ ko, akɛ ja ejie eyiŋtoo lɛ kpo etsɔɔ etsuji, gbalɔi lɛ, dã.” Ákɛ “teemɔŋ saji akpojielɔ” lɛ, Yehowa eha aŋma gbalɛi ohai abɔ ni eba mli anɔkwale pɛpɛɛpɛ lɛ awo Biblia lɛ mli. (Dan. 2:28, 47) Shiwoi wuji yɛ lolo ni baaba mli. Afi 1999 “Nyɔŋmɔ Gbalɛ Wiemɔ” Kpokpaa Wulu nɔ Kpeei lɛ baawaje hemɔkɛyeli ni oyɔɔ yɛ Nyɔŋmɔ shiwoi amli lɛ. Bó wiemɔ ni Yehowa kɛhaa bo lɛ toi jogbaŋŋ. Okɛ nɔ ni obaana ni obaanu lɛ atsu nii—yɛ shiɛmɔ nitsumɔ lɛ mli, yɛ asafo lɛ mli, kɛ oshihilɛ mli. Wɔmiisɔle koni Yehowa jɔɔmɔ ahi gbɛjianɔ fɛɛ ni otoɔ koni oyaye mumɔŋ niyenii ni fá babaoo yɛ gbi lɛ fɛɛ eko mli lɛ nɔ!
[Akrabatsa ni yɔɔ baafa 3]
Too gbɛjianɔ koni oya fɛɛ, Sohaa, Hɔɔ, kɛ Hɔgbaa!