Yehowa Tsɔɔ Wɔ Nii
1 Majimaji ateŋ nitsɔɔmɔ he gbɛjianɔtoo miiya nɔ amrɔ nɛɛ yɛ shikpɔji 233 nɔ yɛ ŋwɛi gbɛtsɔɔmɔ shishi. Nɔ ko nɔ ko bɛ ni je nɛɛ kɛbaaha ni abaanyɛ akɛto he. Yehowa, wɔ-Tsɔɔlɔ Kpeteŋkpele lɛ miitsɔɔ wɔ nii ni wɔ diɛŋtsɛ wɔná he sɛɛ amrɔ nɛɛ, yɛ be mli ni etsɔɔ wɔ nii hu kɛha naanɔ wala lɛ.—Yes. 30:20; 48:17.
2 Ŋwɛi Nitsɔɔmɔ Skul Srɔtoi: Susumɔ skul srɔtoi ni afeɔ bianɛ kɛha Yehowa webii lɛ asɛɛnamɔ lɛ he okwɛ. Teokrase Sɔɔmɔ Skul lɛ ni afeɔ daa otsi yɛ asafoi aaafee 87,000 mli lɛ tsɔseɔ Maŋtsɛyeli shiɛlɔi akpekpei abɔ koni amɛtsɔmɔ sanekpakpa lɛ he sɔɔlɔi ni he esa. Ani okɛ ohe ewo mli? Ani ofata mɛi akpei abɔ ni étee Gbɛgbamɔ Sɔɔmɔ Skul ni akɛ otsii enyɔ feɔ lɛ ahe? Ekolɛ ŋmɛlɛtswai ni ataoɔ yɛ daa gbɛgbalɔi adɛŋ ni atse nɔ lɛ baaye abua koni mɛi babaoo kɛ amɛhe awo gbɛgbamɔ nitsumɔ lɛ mli, ni amɛhe asa kɛha skul nɛɛ eko yaa. Sɔɔmɔ Tsɔsemɔ Skul lɛ ni akɛ nyɔji enyɔ feɔ, ni amrɔ nɛɛ aafee yɛ wiemɔi titrii komɛi amli yɛ jeŋ fɛɛ lɛ miisaa onukpai kɛ sɔɔlɔi ni boteko gbalashihilɛ mli lɛ koni amɛnine ashɛ teokrase hegbɛi ni nɔ kwɔlɔ anɔ. Onukpai kɛ asafoŋ sɔɔlɔi anine shɛɔ tsɔsemɔ krɛdɛɛ nɔ yɛ be kɛ bei amli yɛ Maŋtsɛyeli Sɔɔmɔ Skul lɛ shishi.
3 Akɛ tsũi ni yɔɔ Watchtower Educational Center ni yɔɔ Patterson, New York lɛ miitsu nii koni atsɔ hiɛ akɛ teokrase tsɔsemɔ aha yɛ skul srɔtoi etɛ krɛdɛɛi amli. Gilead Buu Mɔɔ Biblia Skul lɛ ni akɛ nyɔji enumɔ feɔ lɛ saa sɔɔlɔi kɛhaa maŋsɛɛ nitsumɔ yɛ maŋsɛɛ shikpɔji anɔ. Nitsumɔhe Nine Ajinafoi Akuu ni yɔɔ je lɛŋ hei srɔtoi kɛ nyɔji enyɔ yakaseɔ nitsumɔhe nine lɛ he gbɛjianɔtoo he nii. Yɛ May 1999 mli lɛ, aje nikasemɔ hee ni akɛ nyɔji enyɔ yaa shishi kɛha nɔkwɛlɔi gbɛfalɔi, ni nikaselɔi 48 ni jɛ United States kɛ Canada tee eko. Yɛ naagbee kwraa lɛ Yehowa tsuji fɛɛ náa tsɔsemɔ ni Yehowa kɛhaa yɛ nɛkɛ skul srɔtoi nɛɛ amli lɛ ahe sɛɛ waa.
4 Aatsɔɔ Amɛ Nii Kɛha Mɛɛ Yiŋtoo? Nɔyeli Kuu lɛ mlinyo ko jaje akɛ: “Ato nikasemɔ gbɛjianɔtoo ni wɔkɛtsuɔ nii amrɔ nɛɛ he gbɛjianɔ koni ekɛ Yehowa webii ni yɔɔ he fɛɛ he lɛ aba shihilɛ kpakpa, ni ji mumɔŋ dalɛ mli, taakɛ awie he yɛ Abɛi 1:1-4 lɛ.” Eba akɛ Yehowa baaha wɔteŋ mɔ fɛɛ mɔ “nikaselɔi alilɛi.”—Yes. 50:4.