Hiɛ ni Atsɔɔ Asaa He lɛ Kɛ Miishɛɛ Baa
1 Shiɛmɔ nitsumɔ lɛ ni wɔkɛ wɔhe woɔ mli lɛ haa wɔnáa miishɛɛ waa. (Lala 89:16, 17) Yɛ anɔkwale mli lɛ, hesaamɔ ji nɔ̃ titri ni haa anyɛɔ anáa nakai miishɛɛ lɛ kɛmɔɔ shi. Kɛ́ wɔsaa wɔhe jogbaŋŋ lɛ, wɔtsuɔ babaoo, ni babaoo ni wɔtsuɔ lɛ kɛ miishɛɛ kpele diɛŋtsɛ baa.
2 Dɛŋdadei ni Akɛha lɛ Kɛ Nitsumɔ: Jee ohesaamɔ lɛ shishi kɛtsɔ Wɔ Maŋtsɛyeli Sɔɔmɔ lɛ mli saji akanemɔ kɛ ehesusumɔ nɔ. Bei pii lɛ ekɛ shiɛmɔ wiemɔi ni aje gbɛ ato he gbɛjianɔ jogbaŋŋ haa, bɔni afee ni eye ebua bo ni okɛ Maŋtsɛyeli shɛɛ sane lɛ aha yɛ gbɛ ni yɔɔ mlɛo ni mɔɔ shi nɔ. Obaana nɔkwɛmɔnii ni tsɔɔ bɔ ni obaanyɛ otsu naagbai ahe nii yɛ mli. Akɛ susumɔi krɛdɛɛi komɛi ni tsɔɔ bɔ ni aaafee afee sɛɛsaramɔ ni mɔɔ shi eha, kɛ oti lɛ akɛ aje Biblia mli nikasemɔ shishi. Oyɛ hegbɛ ni otsakeɔ nɛkɛ ŋaawoi nɛɛ amli bɔ ni onuɔ he akɛ ekɛ nitsumɔ baahi eha bo. Kɛfata enɛ he lɛ, oyɛ Bɔ ni Ajeɔ Biblia Mli Sanegbaa Shishi ni Atsaa Nɔ wolo bibioo lɛ ni kɛ hiɛkpamɔ wiemɔi srɔtoi kɛ agbɛnɛ hu naajiemɔi srɔtoi kɛha wiemɔ lɛ he shitee-kɛ-wolɔi eha, ni yeɔ ebuaa bo koni ohe asa babaoo yɛ shihilɛi pii ni okɛkpeɔ lɛ amli.
3 Kwɛmɔ wolo ni akɛbaatsu nii lɛ mli, ni ohala sane kome loo enyɔ ni yɔɔ miishɛɛ ni obaanyɛ okɛha shiatsɛ lɛ. Adafitswaa ko ni haa mɔ susuɔ nii ahe ni onu aloo okane lɛ baanyɛ aye abua bo ni oje sanegbaa shishi. Susumɔ naagbai ni fɔɔ baa ni eka shi faŋŋ akɛ okɛbaakpe lɛ he, ni osusu gbɛ̀i fioo komɛi ni obaatsɔ nɔ otsu amɛhe nii lɛ ahe. Koni agbɛnɛ okɛ minitii fioo ko aka nɔ ni obaakɛɛ yɛ shinaa lɛ naa lɛ okwɛ.
4 Yaa Sɔɔmɔ Kpee lɛ Eko Fɛɛ Eko: Bo toi jogbaŋŋ yɛ Sɔɔmɔ Kpee lɛ shishi, kɛji akɛ aasusu, aatĩ, aloo aafee gbɛtsɔɔmɔi ni akɛha yɛ Wɔ Maŋtsɛyeli Sɔɔmɔ lɛ mli lɛ he nɔkwɛmɔ nɔ lɛ. Kadimɔ otii komɛi ni onuɔ he akɛ obaanyɛ okɛtsu nii yɛ oshiɛmɔ wiemɔ lɛ mli. Kaimɔ shihilɛi komɛi ni okɛkpeɔ yɛ sɔɔmɔ nitsumɔ lɛ mli, koni osusu gbɛ̀i anɔ ni obaanyɛ otsɔ oye odase jogbaŋŋ kɛmɔ shi lɛ he. Okɛ shiɛlɔi krokomɛi agba enɛɛmɛi ahe sane dani aje kpee lɛ shishi aloo yɛ no sɛɛ.
5 Obaanyɛ oná nɔmimaa akɛ, kɛ ‘osaa ohe oha nitsumɔ kpakpa fɛɛ nitsumɔ kpakpa’ lɛ, obaaná he nyɔmɔwoo ni ji miishɛɛ babaoo, kɛ omanyeyeli yɛ mɛi krokomɛi ayelikɛbuamɔ mli koni amɛna wala gbɛ lɛ.—2 Tim. 2:21.