Ani Oofã Kɛya?
Kɛ nakai sanebimɔ lɛ hetoo ji hɛɛ lɛ, belɛ nibii babaoo yɛ ni ehe hiaa ni bo kɛ mɛi krokomɛi afee kɛtsɔ hiɛ. Kɛ okɛ nifeemɔi ni he hiaa ni atsɔɔ yɛ shishigbɛ lɛ tsu nii lɛ, etsɛŋ ni obaahi shi jogbaŋŋ yɛ asafo hee ni oyaa mli lɛ mli.
(1) Kɛ oná ole he ni oyaa lɛ, ekolɛ asafo ni oyɔɔ mli amrɔ nɛɛ woloŋmalɔ lɛ baanyɛ aná asafo hee ni oyaa mli lɛ Maŋtsɛyeli Asa lɛ adrɛs. Kɛ oyashɛ nakai akutso lɛ mli nɔŋŋ pɛ lɛ, taomɔ he ni asa lɛ yɔɔ amrɔ nɔŋŋ ni onyɛ ole asafo lɛ kpee bei lɛ jogbaŋŋ. Kɛ nɔ ni fá fe asafo kome kpeɔ yɛ Maŋtsɛyeli Asa lɛ nɔ lɛ, bi onukpai lɛ koni amɛtsɔɔ bo asafo ni oyɔɔ eshikpɔŋkuku lɛ mli lɛ. Kaakpe sɛɛ kɛtee kpeei lɛ, ni kaaha etsɛ dani ole jɛmɛ asafoŋ onukpai lɛ.
(2) Asafo ni oyɔɔ mli bianɛ lɛ kɛ asafo hee ni oyaa mli lɛ mli woloŋmalɔi lɛ baafee ekome koni akɛ “Congregation’s Publisher Record” woji kɛha bo kɛ oweku lɛ amaje. Akɛ wolo ni tsɔɔ mɔ ni oji lɛ hu baamaje asafo hee ni oyaa mli lɛ mli onukpai lɛ. (Kwɛmɔ March 1991 [Vol. 34, No. 3] Wɔ Maŋtsɛyeli Sɔɔmɔ lɛ Sanebimɔ He.) Esa akɛ Asafoŋ Sɔɔmɔ Ajinafoi Akuu ni yɔɔ jɛmɛ lɛ akɛɛ woloŋ nikasemɔ nɔkwɛlɔ lɛ akɛ oba, bɔni afee ni enyɛ ebana bo ni eye ebua bo ni ole woloŋ nikasemɔ kuu hee ni oyaa mli lɛ.—Rom. 15:7.
(3) Shiɛlɔi fɛɛ ni yɔɔ asafo hee ni oyaa mli lɛ mli lɛ yɛ gbɛfaŋnɔ ni amɛkɛ miishɛɛ baatsu he nii—no ji, koni amɛle bo ojogbaŋŋ ni amɛha ohiɛ amɛ. (Okɛto 3 Yohane 8 he.) Shi, enɛ tsɔɔ akɛ esa akɛ oba kpeei bɔni afee ni onyɛ okɛ onyɛmimɛi hii kɛ onyɛmimɛi yei lɛ aná naanyobɔɔ ni woɔ mɔ hewalɛ ni tswaa mɔ emaa shi mli ŋɔɔmɔ.
(4) Esaaa akɛ omɛɔ ni agbeɔ nitsumɔ fɛɛ nitsumɔ ni kɔɔ fã ni ofãa kɛya lɛ he lɛ naa dani okɛ asafo hee ni oyaa mli lɛ mli bii yaa shiɛmɔ. Be mli ni okɛ Maŋtsɛyeli lɛ he nibii yeɔ klɛŋklɛŋ gbɛhe lɛ, abaatsu saji krokomɛi ahe nii ni ohe baajɔ bo ojogbaŋŋ yɛ akutso hee ni oyaa mli lɛ mli. (Mat. 6:33) Kɛ otsui nyɔ omli ojogbaŋŋ yɛ oshia hee lɛ mli lɛ, ekolɛ obaasumɔ ni ofɔ̃ nine otsɛ mɛi komɛi kɛjɛ asafo lɛ mli koni amɛbasara bo koni ole amɛ ojogbaŋŋ.—Rom. 12:13b.
Fã ni afãa kɛyaa he kroko lɛ ji nitsumɔ wulu. Shi kɛlɛ, kɛ́ mɔ fɛɛ mɔ ni ekɔɔ ehe lɛ fee taakɛ atsɔɔ lɛ, akpalaŋ kɛyaŋ sɛɛ kɔkɔɔkɔ yɛ mumɔŋ. Mɔ fɛɛ mɔ baaná wɔ Kristofoi anyɛmifeemɔ lɛ he miishɛɛ waa.