Okɛ Dɛhiɛmɔ Woji Atsu Nii ni Okɛje Sanegbai Ashishi
1 Ani okpɛlɛŋ nɔ akɛ odase ni mɔɔ shi ni oooye lɛ babaoo damɔ hegbɛ ni oooŋɔ koni okɛje sanegbai ashishi lɛ nɔ? Nɔ ni ebiɔ ji ni okɛɛ nɔ ko ni baaha gbɔmɔ lɛ aná he miishɛɛ ni ekɛ ehe awo mli. Shi te aaafee tɛŋŋ afee enɛ ni emɔ shi lɛ?
2 Shiɛlɔi babaoo ena akɛ kɛ ahala wiemɔi komɛi jogbaŋŋ lɛ, wɔ dɛhiɛmɔ woji ni damɔ Biblia lɛ nɔ lɛ ateŋ ekome ni akɛaaha lɛ baanyɛ aje sanegbai ashishi. Asumɔɔ saneyitsei lɛ, ni emli mfonirii lɛ yɛ fɛo ni egbalaa mɔ jwɛŋmɔ. Dɛhiɛmɔ wolo lɛ yeee mɔ nɔ, ní eeeha enu he akɛ saji babaoo yɛ ni esa akɛ ekane. Shi kɛlɛ, shɛɛ saji ni yɔɔ dɛhiɛmɔ woji lɛ amli lɛ mɔɔ mɔ jwɛŋmɔ ni abaanyɛ akɛtsu nii ni akɛfee Biblia mli nikasemɔ.
3 Nɛkɛ ji bɔ ni Odasefonyo ko nu he: “Yɛ jeŋ ni yeɔ oyai nɛɛ mli lɛ, gbɔmɛi sumɔɔɔ ni amɛfiteɔ be babaoo kɛkaneɔ nii, shi dɛhiɛmɔ woji lɛ sɛɛ kɛ bɔ ni sa ni ekɛ shɛɛ sane ni he hiaa haa, shi jeee bɔ ni kɛ tsɔ ni ebaashwie gbɔmɛi kɛya dani amɛkwɛ nɔ ni yɔɔ mli lɛ. Mikane dɛhiɛmɔ woji babaoo, ni naagbee mli lɛ, mibale anɔkwale lɛ.” Kaabu hewalɛ ni Nyɔŋmɔ Wiemɔ lɛ yɔɔ taakɛ atsɔɔ mli yɛ shɛɛ saji kukuji ní akala nɛɛ mli lɛ akɛ nɔ ko bibioo.—Heb. 4:12.
4 Gbɛ̀i Ejwɛ ni Yɔɔ Mlɛo: Mɛi babaoo eye omanye kɛtsɔ gbɛ kuku ni amɛkɛtsuɔ nii lɛ nɔ. (1) Jiemɔ dɛhiɛmɔ woji fioo komɛi otsɔɔ mɔ lɛ ni obi lɛ amɛteŋ nɔ ni ebaasumɔ. (2) Kɛ gbɔmɔ lɛ hala eko sɛɛ lɛ, bi sane ko ni asaa he jogbaŋŋ yɛ mli ni baama sane oti ni yɔɔ dɛhiɛmɔ wolo lɛ mli lɛ nɔ mi. (3) Kɛ ooha sanebimɔ lɛ hetoo lɛ, kanemɔ kuku loo ŋmalɛ ko ni sa kɛjɛ dɛhiɛmɔ wolo lɛ mli. (4) Kɛ abo bo toi lɛ, yaa nɔ ni ogba dɛhiɛmɔ wolo lɛ mli saji loo tsɛ nikasemɔ ko ni yɔɔ Taoɔ wolo bibioo lɛ loo Nilee wolo lɛ mli yitso ko ni kɛ saji krokomɛi baaha lɛ sɛɛ. Kɛtsɔ nɛkɛ gbɛ nɔ lɛ, obaanyɛ okɛje Biblia kasemɔ shishi amrɔ nɔŋŋ. Ŋaawoi ni nyiɛ sɛɛ lɛ baaye ebua bo ni esaa bo kɛha nɔ ni obaakɛɛ kɛ́ okɛ dɛhiɛmɔ woji lɛ ejwɛ miitsu nii.
5 Abaanyɛ akɛ dɛhiɛmɔ wolo lɛ yitso ni ji “Namɔ Diɛŋtsɛ Yeɔ Je lɛ Nɔ?” lɛ abi sane: Kɛ́ mɔ ni okɛwieɔ lɛ ha hetoo akɛ “Nyɔŋmɔ” loo “mileee” lɛ, kanemɔ shishijee wiemɔi enyɔ ni yɔɔ baafa 2 lɛ kɛ klɛŋklɛŋ kuku ni yɔɔ baafa 3 lɛ. Maa 1 Yohane 5:19 kɛ Kpojiemɔ 12:9 nɔ mi. Kɛji mɔ lɛ jeɔ shihilɛ mli ni Satan Abonsam yɔɔ lɛ he ŋwane loo ejeee he ŋwane, loo ekpɛlɛɔ nɔ akɛ eyɛ je lɛ nɔ hewalɛ loo ekpɛlɛɛɛ nɔ lɛ, obaanyɛ okɛ lɛ asusu susumɔi ni anaa yɛ saneyitso bibioo ni ji, “Gbɛtsɔɔmɔ ni Jɛ Jeŋ Shihilɛi Amli” lɛ he ní nyɛkɛtsa sanegbaa lɛ nɔ. Kɛ́ ejie miishɛɛ kpo lɛ, kɛɛmɔ lɛ akɛ obaasumɔ ni otsɔɔ lɛ he ni Abonsam jɛ kɛba, ni okɛ sane otii ni yɔɔ dɛhiɛmɔ wolo lɛ baafai 3 kɛ 4 lɛ mli lɛ atsu nii.
6 Ekolɛ, dɛhiɛmɔ wolo ni ji “Mɛɛ Hiɛnɔkamɔ Yɔɔ Kɛha Suɔlɔi ni Amɛgboi?” lɛ baanyɛ atee miishɛɛ shi amrɔ nɔŋŋ. Obaanyɛ oje sanegbaa shishi kɛtsɔ sanebimɔ nɛɛ nɔ:
◼ “Ani osusuɔ akɛ wɔbaana wɔsuɔlɔi ni egboi lɛ ekoŋŋ gbi ko?” Beni mɔ lɛ eha hetoo sɛɛ lɛ, wiemɔ kuku enyɔ ni yɔɔ dɛhiɛmɔ wolo lɛ baafa 4 lɛ he, ni okane Yohane 5:28, 29. Kɛkɛ lɛ, tsɔɔmɔ mli akɛ, eyeɔ ebuaa ni anuɔ saji ni yɔɔ dɛhiɛmɔ wolo lɛ mli klɛŋklɛŋ saneyitso bibioo lɛ mli lɛ. Kɛɛmɔ akɛ obaasumɔ ni nyɛgba he sane kutuu.
7 Wekui fɛɛ sumɔɔ “Na Weku Shihilɛ Mli Ŋɔɔmɔ” dɛhiɛmɔ wolo lɛ. Kɛ́ okɛmiitsu nii lɛ, obaanyɛ okɛɛ akɛ:
◼ “Ekolɛ, obaakpɛlɛ nɔ akɛ weku lɛ yɛ tutuamɔ shishi ŋmɛnɛ. Mɛni osusuɔ akɛ abaanyɛ afee ni akɛwaje weku tsakpaa lɛ?” Beni mɔ lɛ eha hetoo sɛɛ lɛ, gbalamɔ ejwɛŋmɔ kɛba otii ni yɔɔ klɛŋklɛŋ kuku ni yɔɔ baafa 6 lɛ nɔ. Halamɔ ŋmalɛi ni atsɛ yisɛɛ yɛ dɛhiɛmɔ wolo lɛ baafai 4 kɛ 5 lɛ mli lɛ ekome, ní ogbala nɔ ni etsɔɔ lɛ mli. Kɛkɛ lɛ, kɛɛmɔ lɛ akɛ obaasumɔ ni okɛ lɛ afee shia Biblia mli nikasemɔ ni aheee nɔ ko.
8 Abaanyɛ akɛ dɛhiɛmɔ wolo ni ji “Nɔ Hewɔ ni Obaanyɛ Okɛ Ohe Afɔ Biblia lɛ Nɔ” lɛ atsu nii kɛ nɛkɛ shiɛmɔ wiemɔ nɛɛ:
◼ “Mɛi babaoo enu Kain kɛ Habel he sane ní anaa yɛ Biblia lɛ mli klɛŋklɛŋ wolo lɛ mli lɛ he. Sane ni yɔɔ Mose Klɛŋklɛŋ Wolo lɛ mli lɛ hu wieɔ Kain ŋa he. Ani osusu he ni ejɛ lɛ he dã?” Okɛ dɛhiɛmɔ wolo lɛ naagbee kuku ni yɔɔ baafa 2 lɛ atsu nii ni okɛha hetoo. Tsɔɔmɔ lɛ akɛ dɛhiɛmɔ wolo lɛ gbaa saji ni he hiaa ni Biblia lɛ wieɔ yɛ nɔ ni baaba wɔnɔ wɔsɛɛ lɛ he. Okɛ kuku etɛ ni yɔɔ baafa 5 lɛ aje shishi, koni otsa sanegbaa lɛ nɔ ni okɛ ŋmalɛi ni akɛfiɔ sɛɛ lɛ atsu nii.
9 Akɛ Biblia dɛhiɛmɔ woji ni ajaa lɛ etsu nii yɛ be kakadaŋŋ mli, ni eji gbɛ ni mɔɔ shi ni atsɔɔ nɔ akɛ sanekpakpa lɛ haa. Akɛni anyɛɔ ahiɛɔ kɛyaa he fɛɛ he hewɔ lɛ, obaanyɛ okɛtsu nii jogbaŋŋ kɛmɔ shi yɛ oshia kɛ shia nitsumɔ lɛ mli kɛ beni ooye trukaa odase. Dɛhiɛmɔ woji tsuɔ gbɛfaŋnɔ ni he hiaa yɛ wɔ shiɛmɔ nitsumɔ lɛ mli. Kwɛmɔ ni ohiɛ srɔtoi ni okɛha mɛi babaoo ni okɛje sanegbai ashishi.—Kol. 4:17.