Sanebimɔ He
◼ Te mɛi ni kwɛɔ shitaramɔ nɔ lɛ baanyɛ afee tɛŋŋ afata fɔlɔi ahe koni amɛye amɛbua amɛbii lɛ ni amɛba amɛjeŋ jogbaŋŋ be fɛɛ be yɛ kpeei ashishi lɛ?
Yɛ adebɔɔ su naa lɛ, gbekɛbii feɔ amɛnii gidigidi, ni bei pii lɛ amɛtaraaa shi diŋŋ yɛ be kakadaŋŋ mli. Kɛ agbe kpee naa lɛ, gbekɛbii náa ekãa waa ni baanyɛ eha amɛbɔi foijee ni amɛhiɛ foi kɛnyiɛ gbekɛbii krokomɛi asɛɛ yɛ Maŋtsɛyeli Asa lɛ nɔ loo yɛ kpeehei krokomɛi, yɛ he ni akɛ tsɔnei mamɔɔ, loo yɛ he ni anyiɛɔ kɛhoɔ lɛ. Shi kɛlɛ, abɛbua nɛɛ ji anɔkwale, nɔ ni kɛɛ akɛ: ‘Gbekɛ ni akpoo ejeŋ afɔ̃ enɔ lɛ woɔ efɔlɔ hiɛgbele.’—Abɛi 29:15.
Mɔbɔ sane ji akɛ, wɔnyɛmimɛi hii kɛ yei ní egbɔlɔ lɛ ateŋ mɛi komɛi epila waa diɛŋtsɛ ejaakɛ gbekɛbii hiɛ foi ni amɛkɛ amɛhe shi amɛ, ni enɛ ha amɛgbee shi. Enɛ kɛ piŋmɔ ni naa wa kɛ shikafitemɔ hu ni he ehiaaa eba fɔlɔi lɛ kɛ asafo lɛ nɔ. Bɔni afee ni oshara akajɛ mli eha gbekɛbii lɛ diɛŋtsɛ kɛ mɛi krokomɛi lɛ, esaaa akɛ aŋmɛɔ amɛ gbɛ ni amɛjoɔ foi ni amɛshwɛɔ yɛ Maŋtsɛyeli Asa lɛ mli kɛ esɛɛ fɛɛ.
Fɔlɔi yɛ Ŋmalɛ naa gbɛnaa nii ákɛ amɛtsɔse amɛbii lɛ koni amɛkɛ bulɛ ni sa aha wɔjamɔhei lɛ. (Jaj. 4:17a) Akɛ nitsumɔ woɔ mɛi ni kwɛɔ shitaramɔ nɔ lɛ adɛŋ yɛ wɔ Kristofoi asafoŋ kpeei, kpeei bibii, kɛ kpeei wuji ashishi koni amɛkwɛ ní “afee nii fɛɛ bɔ ni yɔɔ fɛo” ni ‘gbɛjianɔtoo kpakpa’ ahi jɛmɛ. (1 Kor. 14:40; Kol. 2:5) Esa akɛ amɛha amɛhiɛ ahi amɛhe nɔ be fɛɛ be dani wiemɔ he gbɛjianɔtoo lɛ aje shishi, beni eyaa nɔ, kɛ no sɛɛ, yɛ asa lɛ nɔ kɛ esɛɛ fɛɛ. Kɛ gbekɛ ko miijo foi loo ebaaa ejeŋ jogbaŋŋ lɛ, mɔ ni kwɛɔ shitaramɔ nɔ lɛ baanyɛ ekɛ mlihilɛ aha gbekɛ lɛ awa kɛdamɔ shi, ni ebaanyɛ etsɔɔ gbekɛ lɛ nɔ hewɔ ni nifeemɔi ni tamɔ nɛkɛ esaaa. Esa akɛ ekɛ mlihilɛ akɛɛ gbekɛ lɛ fɔlɔ lɛ hu naagba lɛ he sane kɛ bɔ ni ehe hiaa ni akwɛ gbekɛ lɛ nɔ. Esa akɛ fɔlɔ lɛ atsu he nii jogbaŋŋ.
Shishinumɔ yɛ he akɛ yɛ bei komɛi amli lɛ abifabii kɛ gbekɛbii bibii baanyɛ afo loo amɛgba mɛi anaa yɛ kpeei ashishi. Kɛ hoo lɛ, kɛ́ mɛi ni kwɛɔ shitaramɔ nɔ lɛ shɛ shi minitii 20 dani aje wiemɔ he gbɛjianɔtoo lɛ shishi lɛ, amɛbaanyɛ amɛha sɛɛgbɛ sɛii akui enyɔ ni mamɔ asa lɛ nɔ lɛ ahi shi aha fɔlɔi ni baasumɔ ni amɛkɛ amɛbii bibii lɛ atara jɛmɛ lɛ. Wɔteŋ mɛi ni eshwɛ lɛ kɛ lɛ afee ekome koni wɔshi nakai sɛii lɛ wɔha amɛ.
Kɛ gbekɛ ko miigba mɛi anaa lɛ, esa akɛ fɔlɔ lɛ afee he nɔ ko. Kɛ fɔlɔ lɛ efeee he nɔ ko ni mɛi anaagbamɔ lɛ bafee nɔ ni gbalaa mɛi ajwɛŋmɔ kɛjeɔ nifeemɔ lɛ nɔ lɛ, no lɛ mɔ ni kwɛɔ shitaramɔ nɔ lɛ kɛ mlihilɛ abi fɔlɔ lɛ kɛji lɛ ni ji fɔlɔ lɛ baasumɔ ni ekɛ gbekɛ lɛ ashĩ asa lɛ nɔ. Kɛ wɔfɔ̃ nine wɔtsɛ mɛi heei ni hiɛ bii kɛba kpeei lɛ ashishi lɛ, esa akɛ wɔtara amɛmasɛi ni wɔkɛ wɔhe aha kɛye wɔbua amɛ kɛ amɛbii lɛ kɛ́ amɛfo loo amɛgba mɛi anaa yɛ gbɛ̀i krokomɛi anɔ.
Ebafeɔ miishɛɛ sane kɛhaa wɔ akɛ wɔɔna gbekɛbii ni esoro afii ni amɛye yɛ Maŋtsɛyeli Asa lɛ nɔ, ni wɔna bɔ ni amɛbaa amɛjeŋ jogbaŋŋ yɛ Nyɔŋmɔ we lɛ. (1 Tim. 3:15) Kɛ amɛkɛ bulɛ ha gbɛjianɔ ni Yehowa eto kɛha jamɔ lɛ, amɛkɛ woo bahaa lɛ ni mɛi fɛɛ ni yɔɔ asafo lɛ mli lɛ ahiɛ sɔɔ.