Bó Sanejajemɔi Krɔŋkrɔŋi Atoi
1 Jeee nɔ fɛɛ nɔ ni gbɔmɔ wieɔ lɛ ji nɔ ni esa akɛ abo toi jogbaŋŋ. Shi kɛ́ Nyɔŋmɔ wie lɛ, yiŋtoo ni he hiaa ni esa akɛ abo toi yɛ. (5 Mose 28:1, 2) Wɔmiida shi akɛ, niŋmalɔi ni mumɔ kanya amɛ lɛ ŋmala ‘Nyɔŋmɔ sanejajemɔi krɔŋkrɔŋi lɛ’ koni wɔná he sɛɛ. (Rom. 3:2) Kpokpaa wulu nɔ kpee ni baa lɛ kɛ hegbɛi ni sɛɛnamɔ yɔɔ he waa baaha koni akɛnu sanejajemɔi nɛɛ yɛ be mli ni akaneɔ ni asusuɔ he lɛ. Te obaanyɛ ofee tɛŋŋ obo toi jogbaŋŋ?
2 Shɛ́ Jɛmɛ Mra Daa Leebi: Bo lɛ susumɔ miishɛɛ ni Israelbii lɛ ná beni akɛɛ amɛ akɛ amɛkɛ Yehowa ayakpe yɛ Sinai Gɔŋ lɛ nɔ koni amɛyanu e-Mla lɛ he okwɛ! (2 Mose 19:10, 11, 16-19) Kɛ oyɛ su ni tamɔ nɛkɛ yɛ Yehowa ni oooha etsɔɔ bo nii yɛ kpokpaa wulu nɔ kpee lɛ shishi lɛ he lɛ, obaato gbɛjianɔ koni oyashɛ jɛmɛ mra gbi fɛɛ gbi. Wɔnyɛŋ wɔbo wiemɔ ni ahaa lɛ fɛɛ toi kɛ́ wɔkpe sɛɛ kɛba ni wɔgbá mɛi krokomɛi anaa yɛ be mli ni wɔbɔɔ mɔdɛŋ koni wɔná he ko wɔtara lɛ. Nifeemɔ lɛ jeɔ shishi leebi 9:30 daa gbi.
3 Mɛi komɛi ni yashɛɔ jɛmɛ mra lɛ po yataraaa shi kɛhaaa nifeemɔ lɛ shishijee. Mɛni hewɔ ebaa lɛ nɛkɛ? Amɛmɛɔ kɛyashiɔ beni sɛinɔtalɔ lɛ tsɛ́ɔ shishijee lala lɛ dani amɛkɛ amɛnanemɛi lɛ kpaa sanegbaa ni agbɛnɛ amɛyaa koni amɛyatao he ko amɛtara. Esa akɛ wɔyɔse akɛ, sɛinɔtalɔ lɛ baata wiemɔ kpoku lɛ nɔ beni atswaa shishijee Maŋtsɛyeli lala lɛ minitii babaoo sɛɛ dani akɛ lala baaje nifeemɔ lɛ eko fɛɛ eko shishi. Enɛ ji okadi ni wɔkɛhaa akɛ be eshɛ ni esa akɛ atara shi! Kɛkɛ lɛ kɛ́ atsɛ́ shishijee lala lɛ, wɔbaafee klalo akɛ wɔɔfata he kɛlá yijiemɔ lalai wɔha Yehowa.
4 Nyɛboa Toi akɛ Weku ni Efee Ekome: Beni akane sanejajemɔi lɛ atsɔɔ Israelbii ni ebabua amɛhe naa lɛ, ehe bahia ni wekui ni “gbekɛbii” fata he lɛ abo toi ni amɛkase nii. (5 Mose 31:12) Esaaa akɛ ‘akpooɔ’ gbekɛbii ‘ajeŋ afɔ̃ɔ amɛnɔ’ yɛ wɔ kpeei ashishi. (Abɛi 29:15) Fɔlɔi, nyɛtoa gbɛjianɔ koni nyɛweku muu lɛ fɛɛ atara he kome—mɛi ni yeko afii nyɔŋmai enyɔ hu fata he. Fɔlɔi komɛi mɛɔ aahu kɛyashiɔ beni aláa kɛjeɔ shishi dani amɛkɛ amɛbii bibii lɛ yaa niiasɛɛyaahe lɛ. Shi kɛlɛ, ebaafee nɔ ni wa waa akɛ enɛ aaatsɔɔ gbekɛbii lɛ bɔ ni lalai kɛ sɔlemɔi he hiaa jogbaŋŋ diɛŋtsɛ yɛ wɔ jamɔ lɛ mli. Kwɛ bɔ ni ehi jogbaŋŋ akɛ aaatsu niiasɛɛyaahe lɛ hiamɔ nii ahe nii dani aje nifeemɔ lɛ eko fɛɛ eko shishi kɛ́ eeehi feemɔ!
5 Ebaaye ebua wɔ koni wɔbo sane toi kɛ́ wɔjɔɔ wɔhe babaoo daa gbɛkɛ ni wɔyeee niyenii ni tsiitsii nakai gbi lɛ. Okɛ ojwɛŋmɔ ama nɔ ni wielɔ lɛ kɛɔ lɛ nɔ. Kaaha ojwɛŋmɔ miikpa shi kwraa. Nyiɛmɔ Biblia lɛ sɛɛ beni akaneɔ ŋmalɛi lɛ. Ŋmalamɔ saji bibii oto. Beni ahaa wiemɔ fɛɛ wiemɔ lɛ, tĩi nɔ ni wielɔ lɛ ekɛɛ lɛ mli yɛ ojwɛŋmɔ mli, ní osusu bɔ ni okɛ nikasemɔ lɛ baatsu nii oha lɛ he. Kɛ akpa kpee lɛ ni atee shia lɛ, nyɛsusua wiemɔi ni aha lɛ he akɛ weku. Mɛɛ saji otii mɔ fɛɛ mɔ ná he miishɛɛ? Mɛɛ gbɛ nɔ oweku lɛ baanyɛ amɛkɛ saji nɛɛ atsu nii jogbaŋŋ?
6 Ná Bulɛ Oha Nyɔŋmɔ Wiemɔ Lɛ: Kpeei haa wɔnáa hegbɛ kpakpa koni wɔkɛ nanemɛi agba sane ni wɔná naanyobɔɔ ni tswaa mɔ emaa shi mli ŋɔɔmɔ. Kɛ wɔshɛ jɛmɛ mra lɛ, no lɛ wɔbaaná be ni wɔkɛbaagba sane dani wiemɔi ni ahaa lɛ aje shishi. Shi kɛlɛ, mɛi komɛi gbaa sane beni ahaa wiemɔ lɛ, ni amɛsusuɔ yɛ gbɛ ni ejaaa nɔ akɛ enɛ gbalaaa mɔ jwɛŋmɔ tsɔ̃ yɛ kpeehe wulu shishi. Kɛ aafee kpeei yɛ he ni mɛi babaoo kpeɔ yɛ po lɛ, eji be ni esa akɛ abo sane toi, taakɛ eji beni ayaa kpee ko yɛ Maŋtsɛyeli Asa lɛ nɔ lɛ. Esaaa akɛ ahaa tɛlifoŋ ni kpãa bɛ sɛɛ, nibii ni gbɛɛɔ, tsɔnei bibii ni akɛshaa vidio, kɛ kamera ni akɛtsuɔ nii lɛ gbalaa mɛi ajwɛŋmɔ beni ahaa wiemɔ lɛ.
7 Beni Mose heɔ Mla lɛ kɛjɛɔ Yehowa dɛŋ lɛ, “eyeee aboloo lɛ, enuuu nu hu.” (2 Mose 34:28) Nakai nɔŋŋ efeŋ nɔ ni sa akɛ oooye nii ni onu nii beni kpee shishi nifeemɔi lɛ yaa nɔ lɛ. Mɛɛ kɛyashi ‘be ni ato’ ni akɛaatsu enɛ he nii lɛ, ja hela ni mli wa miigba onaa.—Jaj. 3:1.
8 Ayaa nɔ anáa naagba lolo yɛ nyɛmimɛi hii kɛ yei babaoo kɛ gbekɛbii bibii po ahewɔ yɛ kpeei komɛi ashishi yɛ bɔ ni amɛbuaa amɛhe naa yɛ hei ni atsɔɔ kɛjeɔ kpo beni kpee lɛ yaa nɔ lɛ hewɔ. Nɔ ni ana ji akɛ gbekɛbii babaoo kpaa shi yɛ be mli ni kpee lɛ yaa nɔ lɛ, ni amɛkɛ nibii kɛ amɛnaa piɔpiɔ halaa jwɛi yɛ shikpɔŋ. Yɛ be mli ni yiŋtoo ni yɔɔ sɛɛ lɛ sa jogbaŋŋ lɛ, ani ehaa gbekɛbii nɛɛ náa wiemɔi ni ahaa lɛ he sɛɛ? Nyɛhaa wɔkaia akɛ, gbekɛbii ni yeko afii 16 lɛ baanyɛ asɔmɔ akɛ mɛi ni kɛ amɛhe eha ja amɛkɛ amɛfɔlɔ loo onukpa kroko ni baakwɛ amɛnɔ miitsu nii. No po diɛŋtsɛ lɛ, esaaa akɛ atsuɔ nitsumɔ ni tamɔ nɛkɛ beni ahaa wiemɔ lɛ! Abaaha mɛi ni kwɛɔ shitaramɔ nɔ lɛ abi mɛi ni tamɔ nɛkɛ lɛ ní amɛku amɛsɛɛ kɛya agba lɛ shishi. Mɛi ni kɛ amɛhe eha ni tsuɔ nii yɛ nitsumɔhei bibii lɛ atara toibolɔi lɛ ateŋ kɛ́ amɛgbe amɛnitsumɔ lɛ naa nɔŋŋ pɛ lɛ. Esa akɛ mɛi ni kɛ amɛhe eha lɛ atara amɛsɛii anɔ ní amɛbo wiemɔ lɛ toi, ja akɛ nitsumɔ ni he hiaa ewo amɛdɛŋ beni nifeemɔi lɛ yaa nɔ lɛ. Esaaa akɛ amɛtsɛɔ kɛ nitsumɔhei lɛ shimɔ, ní amɛmiisara mɛi beni nifeemɔ lɛ yaa nɔ lɛ.
9 Wɔsumɔŋ ni wɔfee mɛi ni ‘toii esa’ yɛ Nyɔŋmɔ Wiemɔ lɛ toiboo mli. (Heb. 5:11) No hewɔ lɛ, nyɛhaa wɔtswaa wɔfai shi akɛ wɔɔjie bulɛ ni sa kpo kɛtsɔ sane toi ni wɔɔbo jogbaŋŋ lɛ nɔ, yɛ be mli ni asusuɔ sanejajemɔi ni jɛɔ Yehowa ŋɔɔ lɛ he yɛ wɔ kpokpaa wulu nɔ kpee ni baa lɛ shishi lɛ.