Oblahii kɛ Oblayei Náa Kpeei Ahe Sɛɛ
1 Gbekɛ yoo ko ni yeko afii nyɔŋmai enyɔ kɛɛ akɛ: “Bei komɛi lɛ, misusuɔ akɛ oblahii kɛ oblayei kɛ shihilɛ ni mli wa fe fɛɛ kpeɔ. Wɔyɛ gbɔmɛi ni bɔɔ ajwamaŋ, ní kɛ tsofai fɔ̃ji tsuɔ nii, ní nuɔ dãa ateŋ.” Ani nakai ji bɔ ni onuɔ he? Kɛ nakai ni lɛ, mɛni osusuɔ akɛ ebaaye ebua koni owu oshi nibii fɔ̃ji nɛɛ? Ehe miihia ni oná hemɔkɛyeli, hemɔkɛyeli ni mli wa yɛ bɔ ni Yehowa gbɛ̀i lɛ ja ha lɛ mli, ejaakɛ kɛ́ jeee nakai lɛ, “anyɛŋ Nyɔŋmɔ hiɛ asa.” (Heb. 11:6) Asafoŋ kpeeiyaa baaye ebua bo koni eha Kristofoi ahemɔkɛyeli kɛ faishitswaa ni oyɔɔ lɛ mli awa koni okafee efɔŋ.
2 Obaanyɛ Oná Kpeei Ahe Sɛɛ Babaoo: Mɛni haa niyenii ni ŋɔɔ ni akɛ nanemɛi ni bɛŋkɛ kpaakpa yeɔ lɛ feɔ miishɛɛ? Ani jeee niyenii kpakpa ni akɛ nanemɛi kpakpai yeɔ yɛ miishɛɛ mli lɛ? Ojogbaŋŋ, kpeei ni wɔfeɔ lɛ kɛ niiashikpamɔ ni ŋɔɔ tamɔ nɛkɛ haa wɔ, shi yɛ mumɔŋ shishinumɔ naa.
3 Nibii ni awieɔ he yɛ kpeei ashishi lɛ tswaa mɔ emaa shi, kɛjɛ saji ni kɔɔ daa gbi shihilɛ mli naagbai ahe lɛ nɔ aahu kɛyashi Biblia mli gbalɛi ni yɔɔ miishɛɛ lɛ ahe nikasemɔi anɔ. Akɛ gbɛtsɔɔmɔ kpakpa ni anyɛɔ atsuɔ he nii ni tsɔɔ bo bɔ ni ooofee oná nɔ ni hi fe fɛɛ yɛ shihilɛ mli ni odamɔ naagbai ni okɛkpeɔ lɛ naa haa. Nanemɛi ni onaa amɛ yɛ kpeei ashishi lɛ ji mɛi ni hi fe fɛɛ ni oooná yɛ he fɛɛ he, ni mumɔŋ shihilɛ ni yɔɔ jɛmɛ lɛ ŋɔɔ ni oshara bɛ he. (Lala 133:1) Ŋwanejee ko bɛ he akɛ no hewɔ ni oblayoo fioo ko kɛɛ akɛ: “Miyaa skul gbi muu lɛ fɛɛ, ni ehaa etɔɔ mi. Shi kpeei lɛ tamɔ hejɔɔmɔhe yɛ ŋã nɔ, ni ehaa mihe jɔɔ mi koni manyɛ maya skul enɔjetsɛremɔ.” Mɔ kroko hu kɛɛ: “Mina akɛ naanyobɔɔ gbagbalii ni mikɛ mɛi krokomɛi ni sumɔɔ Yehowa lɛ náa lɛ yeɔ ebuaa mi koni mahi emasɛi.”
4 Kɛ oha aŋma ogbɛi awo Teokrase Sɔɔmɔ Skul lɛ mli lɛ, okaseɔ bɔ ni ooofee obua Biblia mli saji anaa ní okɛfee wiemɔ, koni agbɛnɛ oha otsɔɔ toibolɔi ni yɔɔ Maŋtsɛyeli Asa lɛ nɔ lɛ yɛ sanegbaa gbɛ nɔ. Susumɔ sɛɛnamɔ ni yɔɔ tsɔsemɔ ni akɛhaa bo koni okɛ hesaa atsɔɔ mɛi Nyɔŋmɔ Wiemɔ lɛ mli anɔkwalei ni hereɔ mɔ yiwala lɛ he okwɛ! Mɛɛ he kroko oblahii kɛ oblayei baanyɛ aná tsɔsemɔ kpakpa ni tamɔ nɛkɛ yɛ?
5 Bɔ ni Ooofee Oná Kpeei Ahe Sɛɛ Jogbaŋŋ Kɛmɔ Shi: Bɔni afee ni aná kpeei ahe sɛɛ jogbaŋŋ kɛmɔ shi lɛ, nibii etɛ komɛi ahe miihia. Enɛɛmɛi ji hesaamɔ, ohe ni okɛaawo mli, kɛ ekɛ nitsumɔ.
6 Saamɔ Ohe Oha Enɛɛmɛi: Too be oma shi koni okɛsaa ohe kɛha kpeei lɛ daa. Kaaha skul nikasemɔ, be fã nitsumɔ, aloo hiɛtserɛjiemɔ nifeemɔi fee nɔ ni haaa oná be ni he hiaa bo lɛ ní okɛaatĩ nibii ni abaasusu he yɛ kpee fɛɛ kpee shishi kɛtsɔ hiɛ lɛ amli. Sɛɛnamɔ yɛ he akɛ oooto gbɛjianɔ kpakpa daa. Nɔ ni he hiaa fe fɛɛ lɛ, okɛ daa otsi Biblia kanemɔ he gbɛjianɔtoo kɛha Teokrase Sɔɔmɔ Skul lɛ anyiɛ pɛpɛɛpɛ. Eheɔ minitii fioo ko pɛ daa gbi koni okane yitsei ni akɛha lɛ ni ojwɛŋ nɔ. Too be oma shi koni okɛsaa ohe kɛha Asafo Woloŋ Nikasemɔ kɛ Buu-Mɔɔ Nikasemɔ lɛ. Mɛi komɛi feɔ enɛ kɛ hoo lɛ kɛ́ eshwɛ gbi kome loo gbii enyɔ ni nakai kpeei lɛ baashɛ lɛ. Feemɔ nakai nɔŋŋ oha fãi ni ato he gbɛjianɔ yɛ Sɔɔmɔ Kpee lɛ mli lɛ daa otsi bɔ ni ooonyɛ.
7 Okɛ Ohe Awo Enɛɛmɛi Amli: Biblia lɛ kɛɔ akɛ, beni Yesu ye afii 12 lɛ, ana lɛ yɛ sɔlemɔwe lɛ, ní eebo saji atoi, ní eebibii saji, ní eeha saji ahetoo. (Luka 2:46, 47) Yɛ gbɛ kroko nɔ lɛ, ekɛ ehe ewo mli kwraa. Obaaná kpeei lɛ ahe sɛɛ babaoo kɛ́ obɔ mɔdɛŋ akɛ okɛ ohe aaawo mli.—Abɛi 15:23.
8 Ehe miihia ni okɛ ojwɛŋmɔ ama nɔ ni atsɔɔ yɛ kpeei ashishi lɛ nɔ jogbaŋŋ. Bei komɛi lɛ, wiemɔ toiboo wa fe nɔ ni aaha eko. Mɛni hewɔ? Ekolɛ ojwɛŋmɔ baakpa shi kɛ́ mɔ kroko miiwie. Te ooofee tɛŋŋ ote shi owo enɛ? Kɛtsɔ saji fioo ko ŋmalamɔ nɔ. Ŋmalamɔ saji otii fioo ko ni he hiaa ni obaasumɔ ni okwɛ mli be kroko. Nibii fioo ko ŋmalamɔ lɛ baaye abua koni eha ojwɛŋmɔ ahi wiemɔ he gbɛjianɔtoo lɛ nɔ. Agbɛnɛ hu, gbelemɔ ŋmalɛi lɛ, ni onyiɛ sɛɛ beni wielɔ lɛ kaneɔ lɛ.
9 Kɛfata he lɛ, ha efee oti ni ma ohiɛ akɛ okɛ ohe aaawo kpeei lɛ ashishi sanebimɔ kɛ hetoo he sanegbaa fɛɛ mli. Obaaná he sɛɛ babaoo po fe nakai, kɛ́ osusu nɔ ni otaoɔ owie he lɛ he jogbaŋŋ lɛ. Abɛi 15:28 kɛɔ akɛ: “Jalɔ tsui jwɛŋɔ hetoohamɔ he.”
10 Okɛ Nɔ ni Okaseɔ lɛ Atsu Nii: Naagbee nifeemɔ ji ni okwɛ koni nɔ ni okaseɔ lɛ ‘atsu nii yɛ omli.’ (1 Tes. 2:13) Yɛ be mli ni okɛ saji otii kpakpai ni okaseɔ yɛ kpee fɛɛ kpee shishi lɛ tsuɔ nii lɛ, obaabɛŋkɛ Yehowa Nyɔŋmɔ waa. Ebaafee mɔ ni yɔɔ diɛŋtsɛ kɛha bo, ni obaaná miishɛɛ babaoo diɛŋtsɛ kɛ tsui ni nyɔɔ mɔ mli yɛ be mli ni ‘onyiɛɔ anɔkwale lɛ mli’ ní ohaa etsɔɔ onɔ̃ lɛ.—3 Yoh. 4.
11 Nyɛmimɛi hii kɛ yei bibii, yɛ be mli ni nyɛsaa nyɛhe daa kɛhaa kpeei, ní nyɛkɛ nyɛhe woɔ mli, ní nyɛkɛ nɔ ni nyɛkaseɔ lɛ tsuɔ nii lɛ, kpeei lɛ baaŋɔɔ nyɛnaa jogbaŋŋ. Yɛ nakai beaŋ nɔŋŋ lɛ, nyɛbaaná amɛmli sɛɛnamɔi fɛɛ ni nyɛaanyɛ lɛ kɛjɛ mli. Ebaaha nyɛ hemɔkɛyeli mli awa, tamɔ bɔ ni nyɛtswa nyɛfai shi akɛ nyɛbaaya nɔ nyɛye nyɛ ŋwɛi Tsɛ Yehowa anɔkwa lɛ.—Lala 145:18.