She Yehowa Gbeyei Gbi Fɛɛ Gbi
1 “Yehowa gbeyeishemɔ ji nilee shishijee.” (Lala 111:10) No tsirɛɔ wɔ koni wɔtsu nitsumɔi kpakpai, ni eyeɔ ebuaa wɔ koni wɔtsi wɔhe kɛjɛ efɔŋfeemɔ he. (Abɛi 16:6) Nɛkɛ gbeyeishemɔ nɛɛ ji bulɛ ni mli kwɔ ni wɔyɔɔ kɛha wɔ-Bɔlɔ lɛ, ni etsirɛɔ wɔ koni wɔkafee nɔ ko ni esaŋ ehiɛ, ní wɔkafee toigbele nii wɔshi lɛ. Eji nɔ ko ni ehe miihia ni wɔna ni wɔjie lɛ kpo gbi fɛɛ gbi.—Abɛi 8:13.
2 Satan je lɛ mumɔ lɛ nyɛɔ wɔnɔ waa diɛŋtsɛ daa gbi koni wɔnyiɛ egbɛ̀i fɔ̃ji lɛ anɔ. (Efe. 6:11, 12) Wɔheloo ni yeee emuu lɛ feɔ esha, ni yɛ adebɔɔ su naa lɛ eyajeɔ nɔ fɔŋ feemɔ mli. (Gal. 5:17) No hewɔ lɛ, bɔni afee ni wɔbo Yehowa kitãi atoi, ní wɔná miishɛɛ, ní wɔná wala lɛ, esa akɛ wɔshe lɛ gbeyei gbi fɛɛ gbi.—5 Mose 10:12, 13.
3 Awoɔ wɔ ŋaa yɛ Hebribii 10:24, 25 koni wɔbua wɔhe naa bɔni afee ni wɔwowoo wɔhe hewalɛ, “ni titri lɛ” yɛ nɛkɛ bei ni wɔyɔɔ mli nɛɛ mli. Kpeeiyaa daa he miihia kɛ́ wɔbaaná yibaamɔ yɛ naagbee gbii nɛɛ amli. Gbeyei ni wɔsheɔ akɛ wɔɔfee nɔ ni esaaa Nyɔŋmɔ hiɛ lɛ tsirɛɔ wɔ koni wɔya kpeei ni wɔbu yiŋtoo ni yɔɔ enɛ sɛɛ lɛ akɛ nɔ ni jara wa waa diɛŋtsɛ. Mɛi ni sheɔ Nyɔŋmɔ gbeyei lɛ buɔ Kristofoi akpeei ni amɛkɛ amɛhe woɔ mli lɛ akɛ hegbɛ ni yɔɔ krɔŋkrɔŋ.
4 Famɔ ni wɔboɔ toi koni wɔshiɛ Maŋtsɛyeli lɛ he sanekpakpa lɛ ji gbɛ kroko ni wɔtsɔɔ nɔ wɔjieɔ Nyɔŋmɔ gbeyeishemɔ kpo. (Mat. 28:19, 20; Bɔf. 10:42) Wɔ shiɛmɔ nitsumɔ lɛ yiŋtoo titri ji koni wɔye wɔbua mɛi krokomɛi ni amɛshe Yehowa gbeyei ní amɛfee esuɔmɔnaa nii. Wɔfeɔ enɛ kɛtsɔ sɛɛsaramɔi afeemɔ nɔ, mɔdɛŋ ni wɔbɔɔ koni wɔje shia Biblia mli nikasemɔi ashishi, kɛ agbɛnɛ mɛi krokomɛi ni wɔtsɔɔ amɛ Nyɔŋmɔ kitãi lɛ fɛɛ he nii. No hewɔ lɛ, wɔjieɔ Yehowa gbeyeishemɔ kɛ suɔmɔ ni wɔyɔɔ kɛha naanyo gbɔmɔ lɛ kpo.—Mat. 22:37-39.
5 Mɛi ni sheee Nyɔŋmɔ gbeyei lɛ náaa hiɛsɔɔ amɛhaaa mumɔŋ nibii, ni amɛŋmɛɛɔ amɛhe amɛhaa je lɛŋ kɔɔyɔɔ ni gbeɔ mɔ lɛ, aloo bɔ ni je lɛ susuɔ nii ahe ehaa. (Efe. 2:2) Eba akɛ wɔɔtswa wɔfai shi akɛ ‘wɔɔsɔmɔ Nyɔŋmɔ bɔ ni sa ehiɛ kɛ woo kɛ gbeyeishemɔ.’ (Heb. 12:28) No hewɔ lɛ, wɔbaaná jɔɔmɔi ni mɛi ni sheɔ Yehowa gbeyei gbi fɛɛ gbi lɛ anine shɛɔ nɔ lɛ.