Ani Oshiɛɔ kɛ Ekãa?
1 Yɛ mɔmɔ ni shitee-kɛ-wolɔi mɔ Petro kɛ Yohane ni amɛwo amɛhe gbeyei lɛ fɛɛ sɛɛ lɛ, amɛtee nɔ amɛkɛ ekãa jaje Maŋtsɛyeli lɛ he shɛɛ sane lɛ. (Bɔf. 4:17, 21, 31) Te ekãa ni wɔkɛaashiɛ ŋmɛnɛ lɛ tsɔɔ tɛŋŋ?
2 Ekãafeemɔ ni Akɛyeɔ Odase: Wiemɔ kroko kɛha “ekãa” ji “mɔ ni hiɛ wa waa,” ni tsɔɔ akɛ ní “aaafee shiŋŋ ní asheee gbeyei, ní aaadamɔ oshara naa, kɛ nyɛmɔ ni akɛdamɔɔ shihilɛ ni naa wa naa.” Yɛ anɔkwa Kristofoi agbɛfaŋ lɛ, ekãafeemɔ ni akɛshiɛɔ lɛ tsɔɔ gbeyei ni asheee akɛ aaawie faŋŋ be fɛɛ be ni aaaná hegbɛ ni sa ni akɛaagba mɛi krokomɛi sanekpakpa lɛ. (Bɔf. 4:20; 1 Pet. 3:15) No tsɔɔ akɛ wɔhiɛ gbooo akɛ wɔɔshiɛ sanekpakpa lɛ. (Lala 119:46; Rom. 1:16; 2 Tim. 1:8) No hewɔ lɛ, ekãafeemɔ ji su ko ni he hiaa ni wɔkɛaatsu Maŋtsɛyeli he sanekpakpa ni akɛha wɔ akɛ wɔshiɛ lɛ he famɔ lɛ he nii yɛ naagbee be nɛɛ mli. Etsirɛɔ wɔ koni wɔshiɛ sanekpakpa lɛ wɔtsɔɔ mɛi yɛ he fɛɛ he ni wɔɔna amɛ yɛ lɛ.—Bɔf. 4:29; 1 Kor. 9:23.
3 Ekãa ni Aaafee yɛ Skul: Ani gbeyeishemɔ loo tsuifãa ni onyɛɔ onáa lɛ haa efeɔ nɔ ni wa kɛhaa bo akɛ oooshiɛ otsɔɔ onanemɛi skulbii? Bei komɛi lɛ ebɛ mlɛo; lɛɛlɛŋ, ebaanyɛ efee kaa diɛŋtsɛ. Shi kɛlɛ, Yehowa baanyɛ awaje bo kɛ́ osɔle koni oná ekãa ni okɛaashiɛ otsɔɔ mɛi krokomɛi lɛ. (Lala 138:3) Ekãafeemɔ baaha oha ayɔse bo akɛ Yehowa Odasefoi lɛ ateŋ mɔ kome, ni ebaaye ebua bo koni odamɔ hefɛoyeli naa. No hewɔ lɛ, shiɛmɔ ni oooshiɛ yɛ skul lɛ baanyɛ ahere mɛi ni boɔ bo toi lɛ yiwala.—1 Tim. 4:16.
4 Ekãa ni Aaafee yɛ Nitsumɔhe: Ani ale bo yɛ nitsumɔhe lɛ akɛ oji Yehowa Odasefoi lɛ ateŋ mɔ kome? Gbɛ kome pɛ ni obaatsɔ nɔ ní okɛ sanekpakpa lɛ aya onanemɛi nitsulɔi aŋɔɔ ji, kɛtsɔ shiɛmɔ ni oooshiɛ otsɔɔ amɛ lɛ nɔ. Ekãa ni ooofee lɛ hu baaye abua bo koni oná be kɛha Kristofoi akpeei kɛ kpeei wuji ni oooya lɛ.
5 Ekãa ni Aaafee Beni Ayɔɔ Kaa Shishi: Ekãa ni wɔɔná lɛ he hiaa waa beni wɔkɛ shitee-kɛ-woo kpeɔ. (1 Tes. 2:1, 2) Eyeɔ ebuaa wɔ koni wɔkpɛtɛ wɔhemɔkɛyeli lɛ he kɛ́ awo wɔhe gbeyei, aye wɔhe fɛo, aloo awa wɔ yi kwraa lɛ. (Fil. 1:27, 28) Ewajeɔ wɔ koni wɔdamɔ shi shiŋŋ beni anyɛɔ wɔnɔ ni wɔkɛ tɛi ni wɔ-Nyɔŋmɔ Yehowa efolɔ eshwie shi ni wɔkɛaatsu nii jogbaŋŋ lɛ aŋmɛɛ sane he kɛsaa lɛ. Ewajeɔ wɔ koni wɔhiɛ wɔkɛ mɛi krokomɛi ateŋ toiŋjɔlɛ lɛ mli be fɛɛ be kɛ́ mɛi krokomɛi kɛ béi miitsɔ̃ wɔnaa.—Rom. 12:18.
6 Yɛ shihilɛi ni naa wa ni wɔkɛkpeɔ lɛ fɛɛ sɛɛ lɛ, eba akɛ wɔɔkã he ni wɔkɛ ekãa ashiɛ sanekpakpa lɛ.—Efe. 6:18-20.