Ye Odase akɛ Naanyo Kpakpa
1 Yesu kɛɛ “suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mat. 22:39) Ŋwanejee ko bɛ he akɛ ‘ofeɔ’ nanemɛi heyelilɔi ‘ejurɔ,’ shi ani obaanyɛ olɛɛ osuɔmɔ lɛ mli oha mɛi ni yɔɔ omasɛi lɛ? (Gal. 6:10) Yɛ mɛɛ gbɛ̀i anɔ?
2 Kɛtsɔ Ohe Shi ní Ooojie Nɔ: Ani okutsoŋbii lɛ le akɛ oji Odasefonyo? Kɛ́ jeee nakai lɛ, mɛni hewɔ oyaaa amɛŋɔɔ yɛ shiɛmɔ nitsumɔ lɛ mli? Nɔ ni baajɛ mli aba lɛ baanyɛ aha onaa akpɛ ohe! Aloo bɔɔ mɔdɛŋ ni oye amɛ trukaa odase kɛji onuɔ he akɛ no baafee mlɛo kɛha bo. Kɛ́ oje kpo lɛ, ekolɛ obaana ni amɛmiitsu nii yɛ amɛshia kpo lɛ nɔ loo amɛmiishara shi yɛ gbɛjegbɛi lɛ ahe kɛkɛ. Bɛŋkɛmɔ amɛ kɛ ŋmɔlɔ ni suɔmɔ yɔɔ mli. Bɔɔ mɔdɛŋ ni owie ohemɔkɛyelii lɛ ahe, he ni Maŋtsɛyeli Asa lɛ yɔɔ, kɛ nɔ ni yaa nɔ yɛ jɛmɛ, ni oha amɛle mɔ kroko hu ni yɔɔ akutso lɛ mli ni baa kpeei. Fɔ̃ɔ amɛ nine kɛba kpeei lɛ ashishi. Bɔɔ mɔdɛŋ ni oye sanekpakpa lɛ he odase jogbaŋŋ otsɔɔ mɔ fɛɛ mɔ ni ole.—Bɔf. 10:42; 28:23.
3 Kɛtsɔ Ojeŋba Kpakpa Nɔ: Onaanyobɔɔ su lɛ wieɔ babaoo yɛ ohe ni ebaanyɛ egbele gbɛ ni okɛye odase. ‘Ewulaa Nyɔŋmɔ ni ji wɔyiwalaherelɔ lɛ tsɔɔmɔ lɛ’ hu. (Tito 2:7, 10) Jiemɔ anɔkwa miishɛɛ kpo yɛ okutsoŋbii lɛ ahe. Jiemɔ naanyobɔɔ su kɛ niiashishinumɔ kpo. Okɛ bulɛ aha hegbɛ ni amɛyɔɔ kɛha amɛshia shihilɛ kɛ shihilɛhe ni yɔɔ kpoo lɛ. Kɛ́ hela mɔ amɛteŋ mɔ ko lɛ, jiemɔ mɔ hesusumɔ kpo ni okɛɛ akɛ obaaye obua. Kɛ́ weku ko fã kɛba akutso lɛ mli lɛ, yaa jɛmɛ ni oyaŋa amɛ. Mlihilɛ nifeemɔ ní tamɔ nɛkɛ lɛ saa mɛi ahiɛ ni esaa Yehowa hiɛ.—Heb. 13:16.
4 Kɛtsɔ Bɔ ni Oshihilɛhe lɛ Yɔɔ lɛ Nɔ: Nɔ ni fata akutsoŋnyo kpakpa ni oooji lɛ he ji bo diɛŋtsɛ oshia ní oookwara jogbaŋŋ bɔni afee ni efee fɛo. Shia kɛ kpo ní nɔ tse ni yɔɔ fɛo lɛ ji odaseyeli diɛŋtsɛ kɛha mɛi. Shi shia ni mli ewo muji loo nibii ni asumɔɔɔ ni jwere shi yɛ jɛmɛ lɛ baajie jwɛŋmɔ kɛjɛ Maŋtsɛyeli shɛɛ sane lɛ nɔ. No hewɔ lɛ, ehe miihia waa ní oha oshia, kpo nɔ, kɛ tsɔji ahe atse ni asaa lɛ jogbaŋŋ.
5 Kɛ́ osusu mɛi ni yɔɔ Kristofoi asafo lɛ sɛɛ lɛ ahe lɛ, ebaatsɔɔ suɔmɔ ni oyɔɔ kɛha okutsoŋbii lɛ. Mɛni baanyɛ ajɛ mli kɛba? Eeenyɛ eba akɛ “nyɛnitsumɔi kpakpai lɛ ni amɛnaa lɛ” hewɔ lɛ, amɛteŋ mɛi komɛi ‘baawo Nyɔŋmɔ hiɛ nyam.’—1 Pet. 2:12.