Sui Kpakpai—Nyɔŋmɔ Webii Akadimɔ Nii

¹ Ajieee sui kpakpai akpo ŋmɛnɛ. Mɛni eha eba lɛ nakai? Yɛ oyai ni gbɔmɛi yeɔ sɔŋŋ hewɔ lɛ, amɛkɛ shishijee agwaseaŋ wiemɔi tamɔ “Ofainɛ,” “Miida Bo Shi,” loo “Oyiwaladɔŋŋ” efɔɔɔ nitsumɔ dɔŋŋ. Nyɔŋmɔ Wiemɔ lɛ gba sui kpakpai ni ajieŋ lɛ kpo yɛ naagbee gbii lɛ amli ní mli baawo wu lɛ he sane efɔ̃ shi beni ekɛɛ akɛ, gbɔmɛi baatsɔmɔ ‘hesuɔlɔi, shwãlɔi, hewolɔi, trumui, mɛi ni edɔɔɔ mɔ he, mɛi ni nyɛɛɛ amɛ akɔnɔ nɔ amɛye, mɛi ni sumɔɔɔ ekpakpa, kɛ yiwalɔ’ lɛ. (2 Tim. 3:1-4) Sui fɛɛ ni tamɔ nɛkɛ etsɔɔɔ sui kpakpai. Ákɛ Nyɔŋmɔ webii lɛ, esa akɛ Kristofoi ahiɛ ahi amɛhe nɔ bɔni afee ni bulɛ ni je lɛ bɛ kɛha mɛi krokomɛi lɛ akaná wɔnɔ hewalɛ.

² Mɛni Ji Sui? Abaanyɛ atsɔɔ sui kpakpai ashishi akɛ, ní mɔ aaaha ehiɛ ahi mɛi krokomɛi ahenumɔi anɔ, bɔ ni anyɛɔ akɛ mɛi krokomɛi hiɔ shi yɛ toiŋjɔlɛ mli. Nifeemɔi ni tsɔɔ sui kpakpai lɛ ateŋ ekomɛi ji mɔ he susumɔ, bulɛ, mlihilɛ, mlijɔlɛ, ŋaalee, kɛ niiahesusumɔ. Nɛkɛ jeŋbai nɛɛ jɛ suɔmɔ ni ayɔɔ kɛha Nyɔŋmɔ kɛ naanyo gbɔmɔ lɛ mli. (Luka 10:27) Sui kpakpai nɛɛ ní wɔɔjie lɛ kpo lɛ fiteee nɔ ko, shi ekɛ sɛɛnamɔ kpele baa wɔkɛ mɛi krokomɛi ateŋ sharamɔ mli.

³ Yesu Kristo fee nɔkwɛmɔnɔ kpakpa efɔ̃ shi. Ekɛ Mla Kpakpa lɛ tsuɔ nii be fɛɛ be, nɔ ni kɛɔ akɛ: “Bɔ ni nyɛtaoɔ akɛ mɛi afee aha nyɛ lɛ, nyɛ hu nyɛfea nakai nɔŋŋ nyɛhaa amɛ” lɛ. (Luka 6:31) Ani bɔ ni Yesu susuɔ nii ahe kɛ bɔ ni ekɛ ekaselɔi lɛ ye yɛ suɔmɔ mli lɛ haaa wɔnaa akpɛ wɔhe? (Mat. 11:28-30) Sui kpakpai ni ejie lɛ kpo lɛ jɛɛɛ jeŋba kpakpa he mlai ni aŋmala yɛ woji amli lɛ mli. Sui nɛɛ jɛɔ tsui krɔŋŋ kɛ tsui ni mli tse mli. Esa akɛ wɔbɔ mɔdɛŋ ni wɔkase enɔkwɛmɔnɔ kpakpa lɛ.

⁴ Mɛɛ be sui kpakpai ahe hiaa Kristofoi? Yɛ bei pɔtɛɛ komɛi pɛ amli, beni wɔmiitao ni mɛi aná wɔhe jwɛŋmɔ kpakpa? Ani wɔkɛtsuɔ nii pɛ beni wɔmiitao ni wɔná mɛi krokomɛi anɔ hewalɛ? Dabida! Esa akɛ wɔjie sui kpakpai akpo be fɛɛ be. Yɛ mɛɛ gbɛ̀i titrii komɛi anɔ esa akɛ wɔsusu enɛ he, beni wɔkɛ mɛi krokomɛi bɔɔ yɛ asafo lɛ mli lɛ?

⁵ Yɛ Maŋtsɛyeli Asa lɛ Nɔ: Maŋtsɛyeli Asa lɛ ji wɔjamɔhe. Wɔyaa jɛmɛ yɛ ninefɔɔ ni Yehowa Nyɔŋmɔ kɛha wɔ lɛ hewɔ. Yɛ nakai shishinumɔ naa lɛ, wɔji gbɔi. (Lala 15:1) Ani wɔji gbɔi ní feɔ nɔkwɛmɔnɔ kpakpa kɛ́ wɔba Maŋtsɛyeli Asa lɛ nɔ? Ani wɔsusuɔ wɔ atadei kɛ wɔhesaamɔi ahe jogbaŋŋ? Eka shi faŋŋ akɛ, esa akɛ wɔkwa hesaamɔ ko kɛkɛ ni bɛ hiŋmɛi nɔ loo nɔ ni yɔɔ haŋtsii. Kɛji Yehowa webii miiya kpokpaa nɔ kpeei loo wɔ daa otsi kpeei lɛ, mɛi kadiɔ sui kpakpai ni wɔjieɔ lɛ kpo taakɛ bɔ ni sa mɛi ni tsɛɔ amɛhe Nyɔŋmɔ jálɔi lɛ. (1 Tim. 2:9, 10) No hewɔ lɛ, wɔjieɔ mɔ hesusumɔ kɛ bulɛ kpo wɔtsɔɔ wɔŋwɛi Gbɔfeelɔ lɛ kɛ gbɔi krokomɛi hu ni efɔ̃ amɛ nine kɛba lɛ.

⁶ Gbɛ kroko ni kɔɔ kpeei ahe ni wɔtsɔɔ nɔ wɔjieɔ sui kpakpai akpo ji ní wɔyashɛ jɛmɛ yɛ be naa. Yɛ anɔkwale mli lɛ, jeee be fɛɛ be enɛ feemɔ feɔ mlɛo. Mɛi komɛi jɛ shɔŋŋ loo amɛyɛ wekui ni dara ni esa akɛ asaa amɛhe aha amɛ. Ni kɛlɛ, ayɔse akɛ, yɛ asafoi komɛi amli lɛ, shiɛlɔi lɛ ateŋ mɛi oha mlijaa 25 kɛfee amɛsu akɛ, be fɛɛ be lɛ, amɛbaaba amɛbashɛ kpeehei lɛ beni akɛ lala kɛ sɔlemɔ eje shishi sɛɛ. Enɛ ji hiɛdɔɔ sane diɛŋtsɛ. Esa akɛ wɔkai akɛ, sui kpakpai kɔɔ wɔhiɛ ni aaahi mɛi krokomɛi ahenumɔi anɔ lɛ he. Yehowa, wɔ-Gbɔfeelɔ ní mli hi lɛ, eto nɛkɛ mumɔŋ niyenii nɛɛ ahe gbɛjianɔ eha wɔ koni wɔná he sɛɛ. Wɔtsɔɔ hiɛsɔɔ ni wɔyɔɔ kɛ ehenumɔi ahe susumɔ kɛtsɔ ba ni wɔɔba mra lɛ nɔ. Kɛfata he lɛ, sɛɛ ni wɔɔkpe kɛba kpeei lɛ jieɔ mɛi ajwɛŋmɔ kɛjɛɔ nɔ ni yaa nɔ lɛ nɔ, ni etsɔɔ bulɛ ni abɛ kɛha mɛi ni eba kpee lɛ shishi momo lɛ.

⁷ Kɛji wɔtee kpee lɛ, ani wɔyɔseɔ mɛi heei ni eba kpee lɛ? Hiɛmɛɛ ní wɔɔhere amɛ lɛ ji sui kpakpai lɛ ateŋ ekome. (Mat. 5:47; Rom. 15:7) Ŋamɔ ni mlihilɛ yɔɔ mli, dɛ̃taa ni hedɔɔ yɔɔ mli, miishɛɛ ŋmɔlɔ—enɛɛmɛi fɛɛ ji nibii ni amɛhe ehiaaa tsɔ shi amɛfata nibii ni haa anaa wɔ akɛ anɔkwa Kristofoi lɛ ahe. (Yoh. 13:35) Beni nuu ko ba Maŋtsɛyeli Asa lɛ nɔ klɛŋklɛŋ kwraa lɛ, ekɛɛ akɛ: “Mikɛ mɛi babaoo ni jieɔ anɔkwa suɔmɔ kpo kpe, amɛji gbɔi kwraa, yɛ gbi kome pɛ mli fe mɛi abɔ ni mikɛkpe yɛ sɔlemɔ ni afɔ mi awo mli lɛ mli. Ebafee faŋŋ akɛ, mina anɔkwale lɛ.” No hewɔ lɛ, etsake eshihilɛ gbɛ ni nyɔji kpawo sɛɛ lɛ, abaptisi lɛ. Hɛɛ, sui kpakpai baanyɛ aná mɛi anɔ hewalɛ waa diɛŋtsɛ!

⁸ Kɛji wɔjieɔ sui kpakpai akpo wɔtsɔɔ gbɔi ni wɔkɛ amɛ kpeɔ lɛ, ani esaaa akɛ wɔfeɔ nakai nɔŋŋ wɔtsɔɔ ‘mɛi ni wɔkɛ amɛ hiɛ hemɔkɛyeli kome lɛ’? (Gal. 6:10) Shishitoo mla lɛ kɔɔ enɛ he, akɛ: ‘Wó nuumo loo yoomo hiɛ nyam.’ (3 Mose 19:32) Ekaba lɛ kɔkɔɔkɔ akɛ wɔɔku wɔhiɛ wɔshwie mɛi ni tamɔ nɛkɛ nɔ yɛ wɔ henaabuamɔi ashishi.

⁹ Sane Toi ni Wɔɔbo Jogbaŋŋ: Yɛ asafoŋ kpeei ashishi lɛ, Nyɔŋmɔ sɔɔlɔi Kristofoi wieɔ bɔni afee ni amɛha wɔnine ashɛ mumɔŋ nikeenii anɔ, koni no awo wɔ hewalɛ. (Rom. 1:11) Ebaatsɔɔ sui kpakpai diɛŋtsɛ ni abɛ yɛ wɔgbɛfaŋ kɛji wɔwɔ wɔdɔ̃i, wɔta amã ní wɔdaaŋ miigbɛɛ, wɔkɛ mɛi ni tara wɔmasɛi lɛ wie ablɛbi shii abɔ, loo wɔfɔ nushwiemɔhe loo niiasɛɛyaahe lɛ yaa, wɔkane nibii ni kɔɔɔ nɔ ni yaa nɔ lɛ he, loo wɔtsuɔ nibii krokomɛi ahe nii beni kpee lɛ miiya nɔ lɛ. Esa akɛ onukpai lɛ afee nɔkwɛmɔnɔ kpakpa yɛ enɛ gbɛfaŋ. Kristofoi asui kpakpai baatsirɛ wɔ ni wɔjie bulɛ kpakpa kpo wɔtsɔɔ wielɔ lɛ kɛ wiemɔ ni ekɛhaa ni damɔ Biblia lɛ nɔ lɛ kɛtsɔ sane toi ni wɔɔbo jogbaŋŋ lɛ nɔ.

¹⁰ Kɛfata he lɛ, yɛ mɔ hesusumɔ ni ajieɔ lɛ kpo atsɔɔ wielɔ lɛ kɛ toibolɔi lɛ hewɔ lɛ, esaaa akɛ wɔhaa ilɛtrɔnik nibii ni gbɛɛɔ kɛ tɛlifoŋ ni ahiɛɔ kɛyaa he fɛɛ he lɛ gbaa wɔkpee lɛ naa.

¹¹ Sui Kpakpai kɛ Gbekɛbii: Esa akɛ be fɛ be lɛ, fɔlɔi aha amɛhiɛ ahi amɛhe nɔ yɛ amɛbii lɛ ajeŋba he. Kɛji akɛ abifao ko bɔi yaafo loo ebɔi mɔ naagbamɔ beni kpee lɛ miiya nɔ, ni ekɛmiigba mɛi krokomɛi anaa lɛ, ebaafee nɔ ni hi jogbaŋŋ ákɛ akɛ abifao lɛ aaaje kpo kɛjɛ asa lɛ nɔ oya nɔŋŋ bɔni afee ni aha efee dioo. Enɛ feemɔ baawa bei komɛi, shi kaimɔ akɛ, enɛ tsɔɔ akɛ ohiɛ yɛ ohe nɔ yɛ bɔ ni mɛi krokomɛi nuɔ nii ahe amɛhaa lɛ he. Fɔlɔi ni hiɛ gbekɛbii ni ebaanyɛ eba akɛ amɛbaafo lɛ fɔɔ sɛɛgbɛ tamɔ bɔni afee ni amɛkagba mɛi anaa tsɔ̃ kɛji ehe bahia ni amɛte shi beni kpee lɛ miiya nɔ lɛ. Ni kɛlɛ, mɛi krokomɛi ni amɛba kpee lɛ baanyɛ amɛjie mɔ hesusumɔ ni sa kpo amɛtsɔɔ wekui ni tamɔ nɛkɛ kɛtsɔ sɛɛgbɛ sɛii lɛ ní amɛaashi amɛha amɛ lɛ nɔ kɛji akɛ amɛmiisumɔ lɛ nakai.

¹² Esa akɛ fɔlɔi ale jeŋba hu ni amɛbii lɛ jieɔ lɛ kpo dani kpee lɛ jeɔ shishi kɛ beni eba naagbee. Esaaa akɛ gbekɛbii joɔ foi kɛnyiɛɔ asa lɛ nɔ akɛni enɛ baanyɛ ekɛ osharai aba lɛ hewɔ. Nakai nɔŋŋ hu Maŋtsɛyeli Asa lɛ ní aaajo foi kɛaabɔle he lɛ baanyɛ ekɛ oshara aba, titri lɛ beni je ena ní ewa akɛ aaana nii jogbaŋŋ lɛ. Wɔgbee nɔ ni wɔɔwo beni wɔkɛ mɛi gbaa sane lɛ baanyɛ agba akutsoŋbii lɛ anaa ni enɛ baaha aná wɔjamɔ lɛ he jwɛŋmɔ fɔŋ. Esa akɛ ajie fɔlɔi ni bɔɔ mɔdɛŋ ni amɛkwɛ amɛbii anɔ jogbaŋŋ beni ayɔɔ Maŋtsɛyeli Asa lɛ nɔ kɛ agbó lɛ naa lɛ ayi waa diɛŋtsɛ, ejaakɛ no haa ni wɔhiɔ shi yɛ ekomefeemɔ kɛ miishɛɛ mli.—Lala 133:1.

¹³ Yɛ Woloŋ Nikasemɔhe Lɛ: Wɔhiɛ sɔɔ gbɔfeemɔ su ni wɔnyɛmimɛi ni kɛ amɛshiai eha ni wɔfeɔ asafoŋ kpeei yɛ jɛmɛ lɛ jieɔ lɛ kpo jogbaŋŋ lɛ. Kɛji wɔtee nikasemɔ yɛ jɛmɛ lɛ, ebaabi ni wɔjie bulɛ kɛ mɔ hesusumɔ kpo yɛ amɛnibii ahe. Dani wɔbaabote tsũ lɛ mli lɛ, esa akɛ wɔtsumɔ wɔnajiaŋ ashi jogbaŋŋ bɔni afee ni wɔkawo shikpɔŋ loo kapɛt ni akɛhà shikpɔŋ lɛ nɔ muji. Esa akɛ fɔlɔi akwɛ amɛbii anɔ jogbaŋŋ, ni amɛfee bɔ fɛɛ bɔ ni amɛaanyɛ ni gbekɛbii lɛ ahi hei pɛ ni akɛha ni afee woloŋ nikasemɔ yɛ jɛmɛ lɛ. Yɛ be mli ni kuu lɛ edaaa tsɔ̃ ni shihilɛ lɛ baaha wɔle wɔhe jogbaŋŋ lɛ, no haaa wɔ hegbɛ ni wɔfee nɔ fɛɛ nɔ kɛkɛ ni wɔsumɔɔ yɛ mɛi krokomɛi ashiai amli. Esa akɛ fɔlɔi afata amɛbii ahe kɛya nushwiemɔhe lɛ loo niiasɛɛyaahe lɛ, kɛji eba lɛ akɛ amɛbaaya jɛmɛ lɛ. Kɛfata he lɛ, akɛni woloŋ nikasemɔ lɛ ji asafoŋ kpee hewɔ lɛ, esa akɛ wɔsaa wɔhe jogbaŋŋ tamɔ bɔ ni wɔsaa wɔhe beni wɔyaa Maŋtsɛyeli Asa lɛ nɔ lɛ.

¹⁴ Sui Kpakpai Ahe Miihia: Kristofoi asui kpakpai ní wɔjieɔ lɛ kpo lɛ haaa awie wɔ sɔɔmɔ nitsumɔ lɛ he ekpakpa kɛkɛ, shi ehaa wekukpaa kpakpa bakãa mɔ kɛ mɔ teŋ hu. (2 Kor. 6:3, 4, 6) Ákɛ Nyɔŋmɔ ni yɔɔ miishɛɛ lɛ jálɔi lɛ, esa akɛ ŋmɔlɔ afee wɔsu, ní wɔkɛ mɛi ahi shi jogbaŋŋ, ní wɔjie mlihilɛ nifeemɔ nii bibii po ni haa mɛi krokomɛi náa miishɛɛ lɛ akpo. Nɛkɛ sui kpakpai nɛɛ baasaa wɔshihilɛ jogbaŋŋ ni ebaaha ana wɔ akɛ wɔji Nyɔŋmɔ webii.