United by Divine Teaching—Nyɛmimɛi Ekomefeemɔ Diɛŋtsɛ ní Anaa

Kpokpaa nɔkwɛlɔ ko fata he kɛtee Biblia mli nikasemɔ ní akɛ yoo ko ní bɔiko asafoŋ kpeei baa lɛ feɔ lɛ kɛha nikasemɔ lɛ. Efɔ̃ yoo lɛ nine akɛ ebakwɛ United by Divine Teaching vidio lɛ. Nakai otsi lɛ, yoo lɛ ba kpee ni ewie akɛ ená miishɛɛ waa akɛ eba kpee lɛ. Mɛni hewɔ vidio nɛɛ ye omanye oyá nɔŋŋ nakai lɛ? Yoo lɛ ná bɔ ni ajie wɔnyɛmimɛi ekomefeemɔ ní jara wa, ní tsuɔ nii yɛ yiwalɛ jeŋ ní nyɛɛ yɔɔ mli nɛɛ mli lɛ kpo faŋŋ lɛ he miishɛɛ waa.—Yoh. 13:35.

Kwɛmɔ nɛkɛ vidio nɛɛ koni ona toiŋjɔlɛ kɛ suɔmɔ ní Yehowa Odasefoi náa mli ŋɔɔmɔ yɛ shikpɔŋ lɛ nɔ fɛɛ lɛ ní onu he hu. No sɛɛ lɛ, susumɔ sanebimɔi nɛɛ ahe okwɛ:

(1) Mɛni hewɔ “Ŋwɛi Nitsɔɔmɔ” ji saneyitso ní sa kɛha afi 1993 kɛyashi afi 1994 kpeei lɛ?—Mika 4:2.

(2) Mɛni Biblia mli anɔkwale lɛ etsɔɔ kɛha wekui komɛi? Mɛni etsɔɔ kɛha oweku lɛ?

(3) Mɛni hewɔ ehe hiaa ní Yehowa atsɔɔ wɔ nii lɛ?—Lala 143:10.

(4) Mɛɛ jaramɔ shihilɛi esa akɛ atsu he nii koni akɛsaa he kɛha majimaji ateŋ kpeei wuji?

(5) Te ona bɔ ni Lala 133:1 kɛ Mateo 5:3 lɛ fee anɔkwale yɛ Kristofoi akpeei wuji ní otee lɛ ashishi oha tɛŋŋ?

(6) Mɛɛ hewalɛ kpele ní ŋwɛi nitsɔɔmɔ náa yɛ mɛi anɔ lɛ he odaseyeli anaa faŋŋ?—Kpoj. 7:9.

(7) Mɛni ji anɔkwa Kristofoi ayifalɛ ní fe fɛɛ ní abaptisi yɛ be kome mli dã?

(8) Mɛɛ wiemɔi ní Mika, Petro, kɛ Yesu wie lɛ baa mli yɛ Yehowa Odasefoi ateŋ?

(9) Mɛni maa nɔ mi kɛhaa bo akɛ adesai aweku ní yɔɔ miishɛɛ, ní efee ekome lɛ jeee lamɔ folo ko kɛkɛ?

(10) Namɛi obaajie vidio nɛɛ otsɔɔ, ni mɛni hewɔ?

Beni nyɛmi yoo ko kwɛ vidio nɛɛ egbe naa lɛ, emu saji anaa yɛ gbɛ ní yɔɔ miishɛɛ nɔ akɛ: “Vidio lɛ baaye abua mi ni maha ahi mijwɛŋmɔ mli waa akɛ, wɔ nyɛmimɛi hii kɛ yei Kristofoi babaoo ni yɔɔ jeŋ fɛɛ lɛ kɛ anɔkwayeli miisɔmɔ Yehowa bianɛ. . . . Kwɛ bɔ ni wɔ ekomefeemɔ ákɛ nyɛmimɛi lɛ jara wa babaoo ha!”—Efe. 4:3.