Maŋtsɛyeli lɛ Shiɛmɔ Yeɔ Ebuaa Kɛhereɔ Mɛi Ayiwala!

¹ Eji nitsumɔ ni he hiaa fe fɛɛ ni miiya nɔ yɛ je lɛŋ yɛ nɛkɛ be nɛɛ mli. Yehowa Nyɔŋmɔ, Yesu Kristo, kɛ bɔfoi akpekpei abɔ egbala amɛjwɛŋmɔ kɛba nɔ. Mɛni ji nitsumɔ nɛɛ, ni mɛni hewɔ ni ehe hiaa lɛ? No ji Maŋtsɛyeli shiɛmɔ lɛ, ni eyeɔ ebuaa ni ahereɔ mɛi ayiwala!—Rom. 1:16; 10:13, 14.

² Ekolɛ mɛi komɛi baanu he akɛ, kulɛ wɔbaanyɛ wɔye wɔbua mɛi krokomɛi jogbaŋŋ kɛji akɛ wɔkɛ wɔhe wo mli koni wɔbɔ mɔdɛŋ ni wɔha shihilɛ ni ebɔle wɔhe kɛkpe lɛ aya hiɛ lɛ. Mɛi pii bɛ dekã kwraa kɛmiibɔ mɔdɛŋ koni amɛná toiŋjɔlɛ, amɛtsa helai, loo ni amɛha shika he gbɛjianɔtoo aya hiɛ. Shi mɛni baaye abua gbɔmɛi fe fɛɛ?

³ Nitsumɔ ko ni He Hiaa Waa: Maŋtsɛyeli shɛɛ sane lɛ pɛ tsɔɔ yiŋtoo ni yɔɔ shihilɛ sɛɛ, nɔ̃ hewɔ ni adesai piŋɔ, kɛ hiɛnɔkamɔ kome pɛ kɛha wɔsɛɛ lɛ mli. Sanekpakpa lɛ yeɔ ebuaa mɛi koni amɛbatsɔmɔ Yehowa nanemɛi, koni amɛnine ashɛ “Nyɔŋmɔ hejɔlɛ ni fe jwɛŋmɔi fɛɛ lɛ” nɔ. (Fil. 4:7) Maŋtsɛyeli shɛɛ sane lɛ pɛ kɛ gbɛtsɔɔmɔ ni anyɛɔ atsuɔ he nii haa, koni eye ebua gbɔmɛi ni amɛdamɔ shihilɛ mli naagbai anaa amrɔ nɛɛ, ni etsɔɔ bɔ ni aaafee aná yibaamɔ beni akpataa jeŋ fɔŋ lɛ hiɛ yɛ wɔsɛɛ be mli lɛ. (1 Yoh. 2:17) Ani enɛ jeee nɔ ni sa mɔdɛŋ fɛɛ ni wɔbaanyɛ wɔbɔ yɛ Maŋtsɛyeli shiɛmɔ nitsumɔ lɛ mli lɛ?

⁴ Ákɛ nɔkwɛmɔnɔ lɛ: Mɛni baafee gbɛ ni hi fe fɛɛ ni aaatsɔ nɔ aye abua akrowa ko mli bii ní miiwɔ, ni faa ko ni átsĩ naa miihe afɛ ní ekɛ amɛ awo oshara mli lɛ? Ni aaaloo nu lɛ kɛjɛ faa ni atsĩ naa lɛ gbogbo ni ewɔtsɔ lɛ sɛɛ? Ni akɛ nibii fɛfɛji aaasaa akrowa ni hiɛ baakpata lɛ? Dabi! Esa akɛ atsiɛ akrowa lɛŋ bii lɛ ahiɛ, ni abɔ amɛ kɔkɔ yɛ hiɛkpatamɔ ni baa lɛ he, koni aye abua amɛ ni amɛje mli! Mɛi ni ewɔ yɛ mumɔŋ ŋmɛnɛ lɛ yɛ oshara ni hiɛdɔɔ yɔɔ mli waa mli. (Luka 21:34-36) Akɛni etsɛŋ ni nibii agbɛjianɔtoo nɛɛ baaho aya hewɔ lɛ, nyɛhaa wɔbɔa mɔdɛŋ koni wɔkɛ oyaiyeli henumɔ ashiɛ atsɔɔ mɛi fɛɛ ni wɔbaanyɛ!—2 Tim. 4:2; 2 Pet. 3:11, 12.

⁵ Nyɛkãa He Nyɛtsua Nitsumɔ Nɛɛ: Nyɛhaa wɔtaoa gbɛ̀i anɔ ni wɔɔtsɔ ni wɔgba sanekpakpa lɛ he sane wɔtsɔɔ gbɔmɛi anɔkwafoi babaoo—yɛ amɛshiai amli, yɛ gbɛjegbɛi anɔ, yɛ tɛlifoŋ nɔ, kɛ kɛtsɔ trukaa odaseyeli nɔ. Nitsumɔ ni Yehowa kɛha wɔ ni wɔtsu lɛ ji nitsumɔ ni he hiaa fe fɛɛ ni wɔbaanyɛ wɔtsu. Kɛji wɔkɛ ekãa tsu he nii lɛ, ‘wɔbaahere wɔ diɛŋtsɛ kɛ mɛi ni boɔ wɔ toi lɛ fɛɛ yiwala.’—1 Tim. 4:16.