Kaimɔ Anɔkwafoi ni Egbɔlɔ Lɛ
1 Eyɛ mli akɛ Hana ni eye afii 84 lɛ ji okulafo ni egbɔ moŋ, shi “ejeee sɔlemɔwe lɛ kwraa.” Enɔkwayeli lɛ tsirɛ Yehowa ni ejɔɔ lɛ yɛ gbɛ ni yɔɔ srɔto kwraa nɔ. (Luka 2:36-38) Ŋmɛnɛ lɛ, nyɛmimɛi hii kɛ yei babaoo jieɔ mumɔ ni tamɔ Hana nɔ lɛ kpo yɛ shihilɛi ni mli wawai ni amɛkɛkpeɔ lɛ fɛɛ sɛɛ. Kɛji ebalɛ akɛ nɛkɛ anɔkwafoi nɛɛ baagbo deŋme kɛkpee gbɔmɔtsoŋ hewalɛnamɔ he naagbai anaa loo amɛnyɛɛɛ amɛfee nibii komɛi lɛ, no lɛ ekolɛ amɛnijiaŋ baanyɛ aje wui yɛ be kɛ bei amli. Nyɛhaa wɔsusua gbɛ̀i komɛi ni anyɛɔ atsuɔ he nii ni wɔbaanyɛ wɔtsɔ nɔ wɔwo amɛ hewalɛ ni wɔkɛye wɔbua amɛ koni amɛya nɔ amɛhiɛ mumɔŋ nifeemɔi ni atsuɔ he nii daa lɛ mli.
2 Kpeei kɛ Shiɛmɔ Nitsumɔ Lɛ: Kɛ mɛi krokomɛi jɛ amɛsuɔmɔ mli amɛto tsɔne he gbɛjianɔ amɛha anɔkwafoi babaoo ni egbɔlɔ lɛ, no lɛ ebaafee mlɛo kwraa eha amɛ akɛ amɛaaya Kristofoi akpeei daa. Enɛ tswaa anɔkwafoi ni kɛ afii babaoo esɔmɔ nɛɛ emaa shi yɛ mumɔŋ, ni ehe baa sɛɛnamɔ kɛhaa asafo lɛ hu. Ani oná gbɛfaŋnɔ yɛ nitsumɔ ni sa nɛɛ mli?—Heb. 13:16.
3 He ni akɛwoɔ shiɛmɔ nitsumɔ lɛ mli daa lɛ kɛ miishɛɛ kɛ tsui ni nyɔɔ mɔ mli bahaa anɔkwa Kristofoi. Shi nakai feemɔ lɛ baanyɛ afee kaa kɛha mɛi ni egbɔlɔ kɛ mɛi ni bɛ gbɔmɔtsoŋ hewalɛ lɛ. Ani obaanyɛ oha nɛkɛ suɔlɔi nɛɛ ateŋ mɔ ko afata ohe akɛ ‘naanyo nitsulɔ’ yɛ odaseyeli nitsumɔ lɛ henɔ ko mli? (Rom. 16:3, 9, 21) Ekolɛ obaanyɛ ofɔ̃ nine otsɛ lɛ ni efata ohe kɛná tɛlifoŋ nɔ odaseyeli mli gbɛfaŋnɔ loo ni efata ohe kɛfee sɛɛkuu kɛ saramɔ loo Biblia mli nikasemɔ ko. Kɛji mɔ ni egbɔ lɛ ji mɔ ko ni eka tsu mli ni enyɛɛɛ enyiɛ lɛ, no lɛ ani eeenyɛ eba akɛ Biblia mli nikaselɔ lɛ aaaba nakai mɔ lɛ shia kɛha nikasemɔi lɛ afeemɔ?
4 Nikasemɔ kɛ Naanyobɔɔ: Yɛ be kɛ bei amli lɛ, mɛi komɛi fɔ̃ɔ mɔ ni egbɔ loo mɔ ko ni bɛ gbɔmɔtsoŋ hewalɛ lɛ nine kɛbaa amɛweku nikasemɔ shishi, ni amɛfeɔ nikasemɔ lɛ po yɛ nakai mɔ lɛ shia. Fɔlɔ ko ni ji yoo kɛ ebii enyɔ ni darako lɛ tee nyɛmi yoo ko ni egbɔ shia kɛha nikasemɔ ni amɛfeɔ yɛ Mi-Wolo ni Gbaa Biblia Mli Saji lɛ mli lɛ feemɔ, ni amɛ fɛɛ amɛná hewalɛwoo kɛtsɔ naanyobɔɔ lɛ nɔ. Nɛkɛ aŋkroaŋkroi nɛɛ náa he miishɛɛ hu akɛ aaafɔ̃ amɛ nine kɛha niyeli loo shwɛmɔ nifeemɔ ko. Kɛ mɛi ni bɛ gbɔmɔtsoŋ hewalɛ lɛ egbɔjɔ aahu akɛ amɛnyɛɛɛ amɛje kpo kɛyasara mɔ ko lɛ, no lɛ ekolɛ obaanyɛ otswa amɛ tɛlifoŋ loo otsɔ̃ amɛshia yɛ be kukuoo mli koni okane nii oha amɛ, okɛ amɛ asɔle, loo ogba amɛ niiashikpamɔ ko ni tswaa mɔ emaa shi.—Rom. 1:11, 12.
5 Yehowa buɔ mɛi ni egbɔlɔ lɛ akɛ mɛi ni jara wa. (Heb. 6:10, 11) Wɔbaanyɛ wɔkase lɛ kɛtsɔ hiɛsɔɔ kpo ni wɔɔjie wɔtsɔɔ amɛ lɛ nɔ, kɛ yelikɛbuamɔ ni wɔkɛaaha amɛ koni amɛya nɔ amɛhiɛ mumɔŋ nifeemɔ kpakpa ni atsuɔ he nii daa lɛ mli.